•  Smɔl Tɔk fɔ Stat di Mitin 2

•  Di Valyu Tin Dɛn Frɔm Gɔd in Wɔd 3-5

  •  Tɔk 3

  •  Luk Gud Wan fɔ di Valyu Tin dɛn na Gɔd in Wɔd 4

  •  Baybul Ridin 5

•  Du Wetin Yu Dɔn Lan We Yu De Prich 6-14

  •  We Yu De Stat fɔ Tɔk 7

  •  We Yu Go Fɛn Pɔsin Bak 8

  •  Mek Disaypul 9

  •  Ɛksplen Wetin Yu Biliv 10

  •  Tɔk 11

  •  Tɔpik 12

  •  Sɛtin Dɛn 13

  •  Aw fɔ Yuz Vidio ɛn Pɔblikeshɔn Dɛn 14

•  Liv Yu Layf Lɛk Kristian 15-16

  •  Kɔngrigeshɔn Baybul Stɔdi 16

•  Smɔl Tɔk fɔ Dɔn di Mitin 17

•  Fɔ Tɛl Tɛnki ɛn Gi Advays 18

•  Tɛm 19

•  Sakit Ovasia Visit 20

•  Di Wik fɔ Asɛmbli ɔ Kɔnvɛnshɔn 21

•  Di Wik fɔ di Mɛmorial 22

•  Layf ɛn Prichin Wok Mitin Ovasia 23

•  Di Chiaman fɔ di Layf ɛn Prichin Wok Mitin 24

•  Ɔgzilari Kanselɔ 25

•  Sɛkɔn Skul 26

•  Vidio Dɛn 27

1. Di tin dɛn fɔ no bɔt wi Kristian Layf ɛn Prichin Wok Mitin. Dis dɔkyumɛnt go ɛp ɔl di wan dɛn we gɛt pat na Wi Kristian Layf ɛn Prichin Wok Mitin. Dɛn fɔ wach di tin dɛn fɔ no bɔt dɛn pat lɛk aw i de na di Layf ɛn Prichin Wok Mitin Buk ɛn insay dis dɔkyumɛnt bifo dɛn pripia dɛn pat. Ɔl di pɔblisha dɛn fɔ rɛdi ɛn de fɔ dɛn studɛnt asaynmɛnt dɛn. Ɔda pipul dɛn we kin kam mitin ɛn de wit di kɔngrigeshɔn kin tek pat if dɛn gri wit wetin de na di Baybul ɛn dɛn de liv dɛn layf di we aw Kristian fɔ liv. Di Kristian Layf ɛn Prichin Wok Mitin ovasia fɔ tɔk bɔt di tin dɛn we go mek pɔsin we nɔto pɔblisha ɛn we want fɔ jɔyn di skul kwalifay ɛn i fɔ tɛl am if i kwalifay. I fɔ du dis wit di pɔsin ɛn di Baybul ticha (ɔ wit di pɔsin in mama ɔ papa we na Kristian). Na di sem tin pɔsin we want fɔ bi ɔnbaptayz pɔblisha fɔ du.—od chap. 8 par. 8.

2. Wan minit. Ɛni wik, afta di siŋ ɛn prea, di chiaman fɔ di Layf ɛn Prichin Wok Mitin go tɔk smɔl tin bɔt di mitin fɔ mek pipul dɛn want fɔ no mɔ. Di chiaman fɔ pe atɛnshɔn mɔ to di pɔynt dɛn we go rili bɛnifit di kɔngrigeshɔn.

 3. Tɔk: Tɛn minit. Tu ɔ tri men pɔynt dɛn wit di tim de na di Layf ɛn Prichin Wok Mitin Buk. Na ɛlda ɔ ministerial savant we kwalifay fɔ du dis pat. If wi de stat nyu Baybul buk, dɛn go sho di vidio we de tɔk smɔl tin bɔt da Baybul buk de. Di spika kin tɔk bɔt sɔntin dɛn we di vidio tɔk bɔt we gɛt sɔntin fɔ du wit di tim. Bɔt i fɔ mek shɔ se i ɛksplen di pɔynt dɛn we de na di mitin buk. Dɔn if tɛm de, i kin yuz di pikchɔ ɛn di pɔynt dɛn frɔm di skripchɔ we de de, fɔ ɛp fɔ ɛksplen di matirial fayn fayn wan.

 4. Luk Gud Wan fɔ di Valyu Tin dɛn na Gɔd in Wɔd: Tɛn minit. Dis na kwɛstyɔn ɛn ansa pat, ɛn di brɔda we du dis pat nɔ nid fɔ tɔk smɔl tin fɔ stat ɔ fɔ dɔn. Na ɛlda ɔ ministerial savant we kwalifay fɔ du dis pat. Bɔt i fɔ aks di ɔdiɛns ɔl di kwɛstyɔn dɛn. Dɔn, i kin disayd if nid de fɔ rid ɔl di vas dɛn we de na di fɔs tu kwɛstyɔn dɛn. Di wan dɛn we dɛn kɔl fɔ kɔmɛnt nɔ fɔ tɔk pas 30 sɛkɔn.

 5. Baybul Ridin: 4 minit. Na brɔda fɔ du dis pat. Di studɛnt fɔ rid di say we dɛn gi am fɔ rid, ɛn i nɔ fɔ tɔk natin bifo i bigin rid ɛn we i dɔn fɔ rid. Di chiaman fɔ di mitin fɔ pe atɛnshɔn mɔ fɔ ɛp di studɛnt dɛn fɔ rid kɔrɛkt wan, rid di we aw ɔlman go ɔndastand, nɔ fɔ stɔp stɔp we dɛn de rid, strɛs impɔtant pɔynt dɛn, ajɔst dɛn vɔys we dɛn de rid, fɔ stɔp di kɔrɛkt say dɛn, ɛn rid lɛk aw dɛn kin tɔk. Bikɔs sɔm Baybul ridin asaynmɛnt dɛn kin shɔt ɛn ɔda wan dɛn kin lɔng, i go fayn mek di ovasia fɔ di Layf ɛn Prichin Wok Mitin tink bɔt wetin di studɛnt dɛn ebul fɔ du we i de gi di asaynmɛnt dɛn.

6. Fiftin minit. Dɛn mek dis pat na di mitin fɔ mek ɔlman gɛt chans fɔ praktis fɔ fil savis ɛn fɔ lan mɔ bɔt aw fɔ prich ɛn tich fayn fayn wan. If nid de, ɛlda dɛn go gɛt studɛnt asaynmɛnt dɛn. Ɔl di studɛnt dɛn fɔ du wetin di pɔynt we dɛn de wɔk ɔn se, ilɛk i kɔmɔt na di Tich ɔ Lɛk Pipul Dɛn brosho we kin de insay brakɛt, nia di asaynmɛnt na di Layf ɛn Prichin Wok Mitin Buk. Sɔntɛnde, pat go de we na yu ɛn di ɔdiɛns fɔ tɔk bɔt. Da pat de na ɛlda ɔ ministerial savant we kwalifay fɔ du am.—Luk  paregraf 15 fɔ no aw fɔ du dɛn pat we na yu ɛn di ɔdiɛns fɔ tɔk bɔt.

 7. We Yu De Stat fɔ Tɔk: Dis na asaynmɛnt we na man ɔ uman go du am. If na man gɛt di asaynmɛnt na man fɔ ɛp am ɛn if na uman gɛt di asaynmɛnt na uman fɔ ɛp am ɔ pɔsin we de na in famili kin ɛp am. Di studɛnt ɛn di pɔsin we de ɛp am kin sidɔm ɔ tinap.—Fɔ no mɔ bɔt di tɔpik ɛn sɛtin fɔ dis asaynmɛnt, luk  paregraf 12 ɛn  paregraf 13.

 8. We Yu Go Fɛn Pɔsin Bak: Dis na asaynmɛnt we na man ɔ uman go du am. If na man gɛt di asaynmɛnt na man fɔ ɛp am ɛn if na uman gɛt di asaynmɛnt na uman fɔ ɛp am. (km E-5/97 pej 2) Di studɛnt ɛn di pɔsin we de ɛp am kin sidɔm ɔ tinap. Di studɛnt fɔ sho wetin fɔ se we i go bak to pɔsin we i bin dɔn tɔk to.—Fɔ no mɔ bɔt di tɔpik ɛn sɛtin fɔ dis asaynmɛnt, luk  paregraf 12 ɛn  paregraf 13.

 9. Mek Disaypul: Dis na asaynmɛnt we na man ɔ uman go du am. If na man gɛt di asaynmɛnt na man fɔ ɛp am ɛn if na uman gɛt di asaynmɛnt na uman fɔ ɛp am. (km E-5/97 pej 2) Di studɛnt ɛn di pɔsin we de ɛp am kin sidɔm ɔ tinap. Dis pat fɔ sho aw fɔ kɔndɔkt Baybul stɔdi. Nid nɔ de fɔ introdyus ɔ dɔn di tɔk pas if di pɔsin de wɔk ɔn wan patikyula stɔdi pɔynt we de tɔk bɔt introdɔkshɔn ɔ fɔ dɔn di tɔk fayn. I nɔ nid fɔ rid ɔl di skripcho dɛn ɔ pɔynt dɛn we de na di matirial bɔt if tɛm de i kin du am.

 10. Ɛksplen Wetin Yu Biliv: If na tɔk, na man fɔ du dis pat. If na dɛmɔnstreshɔn, man ɔ uman kin du dis pat. If na man gɛt di asaynmɛnt na man fɔ ɛp am ɛn if na uman gɛt di asaynmɛnt na uman fɔ ɛp am. Di studɛnt fɔ tek tɛm ansa di kwɛstyɔn klia wan ɛn i fɔ yuz di rɛfrɛns we dɛn gi am. Di studɛnt kin disayd if i want fɔ tɔk bɔt di say usay di rɛfrɛns kɔmɔt we i de du dis pat.

 11. Tɔk: Na brɔda fɔ du dis studɛnt asaynmɛnt ɛn i fɔ gi am as tɔk na di kɔngrigeshɔn. We di tɔk kɔmɔt na apɛndiks A na di Lɛk Pipul Dɛn brosho, di studɛnt fɔ tɔk mɔ bɔt aw wi go yuz di vas dɛn we wi de prich. Fɔ ɛgzampul, i go ɛksplen ustɛm wi fɔ yuz di vas, wetin di vas min, ɛn aw wi go ɛp pɔsin fɔ ɔndastand di vas. We di tɔk de bɔt wan pan di lɛsin dɛn na di Lɛk Pipul Dɛn brosho, di studɛnt fɔ pe atɛnshɔn mɔ bɔt aw fɔ aplay di pɔynt we i de prich. I go tɔk mɔ bɔt pɔynt 1 na di lɛsin ɔ ɛni ɔda vas we de insay di lɛsin.

   12. Tɔpik: Di infɔmeshɔn dɛn na dis paregraf ɛn di ɔda wan we de dɔŋ na fɔ di “We Yu De Stat fɔ Tɔk” ɛn “We Yu Go Fɛn Pɔsin Bak” asaynmɛnt dɛn. Pas if dɛn se yu fɔ du ɔda tin, di studɛnt in gol na fɔ tɔk bɔt simpul tru tin na di Baybul we go bɛnifit di pɔsin we de lisin ɛn ebul lɛf kwɛstyɔn we dɛn go tɔk bɔt nɛks tɛm. Di studɛnt fɔ fɛn tɔpik bɔt sɔntin we de apin da tɛm de na di eria usay i de. I go disayd if i fɔ yuz pɔblikeshɔn ɔ vidio frɔm di Tichin Tulbɔks. Bifo i kram wetin fɔ tɔk, di studɛnt fɔ tray fɔ praktis aw fɔ tɔk fayn wan to ɔda pipul dɛn bay we i de tɔk nachɔral wan ɛn sho se i bisin bɔt di pɔsin we i de tɔk to.

   13. Sɛtin: Di studɛnt fɔ yuz di pɔynt we i de wɔk ɔn di we we gri wit wetin de apin na di say we i de. Fɔ ɛgzampul:

1.  (1) Os to Os: Dis sɛtin min se di pɔsin de prich frɔm os to os—ilɛk na fes to fes, na fon, ɔ lɛta—ɛn fɔ go bak to di pɔsin we yu bin dɔn tɔk to we yu bin de prich frɔm os to os.

2.  (2) Prich Ɛnitɛm Apat Frɔm Os to Os: Dis sɛtin min fɔ yuz ɛni chans we yu gɛt fɔ prich to pɔsin. I kin min fɔ rid wan skripchɔ wit pɔsin na yu wokples, na skul, na yu eria, insay transpɔt ɔ ɛnisay we yu de go.

3.  (3) Pɔblik Witnɛsin: Dis sɛtin min fɔ prich na kat, fɔ tɔk to pipul dɛn usay dɛn de du biznɛs, strit witnɛsin, ɔ fɔ prich na pak dɛn, say dɛn usay motoka dɛn kin pak ɔ ɛnisay usay pipul dɛn de.

 14. Aw fɔ Yuz Vidio ɛn Pɔblikeshɔn Dɛn: Akɔdin to wetin de apin, di studɛnt kin disayd fɔ ple vidio ɔ gi pɔblikeshɔn. If di studɛnt in asaynmɛnt gɛt vidio ɔ di studɛnt plan fɔ yuz vidio, i fɔ sho ɛn tɔk bɔt am, bɔt i nɔ fɔ ple am.

15. Afta di siŋ, di ɔda 15 minit na dis sɛkshɔn go gɛt wan ɔ tu pat we de fɔ ɛp di ɔdiɛns fɔ du wetin dɛn de lan na Gɔd in Wɔd. Apat frɔm di lokal nid we na ɛlda nɔmɔ fɔ du, if dɛn nɔ tɔk ɔda tin, na ɛlda ɔ ministerial savant we kwalifay fɔ du dɛn pat dɛn ya. We di pat na fɔ yu ɛn di ɔdiɛns, di pɔsin we gɛt di pat kin aks ɔda kwɛstyɔn dɛn apat frɔm di wan dɛn we ɔlrɛdi de, te di pat dɔn. I nɔ fɔ tɔk bɔku so dat di men pɔynt dɛn go kɔmɔt ɛn di ɔdiɛns go ebul fɔ gi kɔmɛnt. If di pat gɛt intavyu, i go fayn lɛ di pɔsin kam na stej ɛn tɔk bifo in sidɔm na in sidɔm ples.

  16. Kɔngrigeshɔn Baybul Stɔdi: 30 minit. Na ɛlda we kwalifay dɛn de gi dis pat fɔ du. (If di kɔngrigeshɔn nɔ gɛt bɔku ɛlda dɛn, dɛn kin yuz ministerial savant we kwalifay fɔ du dis pat.) Na di ɛlda dɛn fɔ sho udat kwalifay fɔ kɔndɔkt di Kɔngrigeshɔn Baybul Stɔdi. Di wan we dɛn gi dis pat, fɔ du am di we we go mek dɛn nɔ ovataym, tɔk mɔ bɔt di men skripchɔ dɛn, ɛn ɛp ɔlman fɔ si aw di pɔynt dɛn we dɛn tɔk bɔt go bɛnifit dɛn. Dɛn go ebul fɔ fɛn prinsipul dɛn we go ɛp dɛn we dɛn rid di dayrɛkshɔn bɔt aw fɔ kɔndɔkt Wachtawa Stɔdi. (w23.04 pej 24, bɔks) Afta una dɔn di matirial we una fɔ stɔdi fɔ di wik, nid nɔ de fɔ dile di stɔdi. If i pɔsibul, una kin yuz difrɛn pipul dɛn fɔ kɔndɔkt ɛn rid ɛni wik. If di chiaman fɔ di Layf ɛn Prichin Wok Mitin tɔk se fɔ ridyus di tɛm fɔ yuz fɔ dis pat, di pɔsin we de kɔndɔkt go disayd aw fɔ du di stɔdi. I kin disayd nɔ fɔ rid sɔm paregraf dɛn.

17. 3 minit. Di chiaman fɔ di Layf ɛn Prichin Wok Mitin go tɔk bɔt di patikyula pɔynt dɛn we wi lan frɔm di mitin we go ɛp wi. I kin tɔk bak bɔt di matirial we wi go du nɛks wik, sɔntɛm i kin ivin tɔk bɔt wan kwɛstyɔn we wi go ansa di ɔda wik. If tɛm de, i go anawns di nem dɛn fɔ di studɛnt dɛn we go gi tɔk di ɔda wik. If dɛn nɔ tɔk ɔda tin, na di chiaman fɔ rid ɛni anawnsmɛnt we dɛn fɔ mek ɔ lɛta to di kɔngrigeshɔn we i de gi smɔl tɔk fɔ dɔn di mitin. Nɔmal tin dɛn lɛk usay fɔ mit fɔ fil savis ɛn shɛdul fɔ klin di Kiŋdɔm Ɔl fɔ de na notis bɔd, dɛn nɔ fɔ anawns dɛn na stej. If bɛtɛ tɛm nɔ de fɔ mek anawnsmɛnt ɛn rid lɛta dɛn insay di tɛm we dɛn gi fɔ du di smɔl tɔk fɔ dɔn di mitin, di chiaman fɔ aks di ɔda brɔda dɛn we gɛt pat na Liv Yu Layf Lɛk Kristian sɛkshɔn fɔ ridyus di tɛm we dɛn de yuz fɔ dɛn pat dɛn. (Luk  paregraf 16 ɛn  paregraf 19.) Di mitin go dɔn wit siŋ ɛn prea.

18. Afta ɛni studɛnt dɔn in asaynmɛnt, di chiaman fɔ di Layf ɛn Prichin Wok Mitin gɛt lɛk 1 minit fɔ tɔk bɔt di pɔynt we di pɔsin de wɔk ɔn, tɛl di studɛnt tɛnki ɛn gi am advays. We di chiaman de introdyus di studɛnt in asaynmɛnt, i nɔ fɔ anawns di stɔdi pɔynt. Bɔt we di studɛnt dɔn fɔ du in asaynmɛnt ɛn di chiaman dɔn tɛl am tɛnki, di chiaman kin anawns di stɔdi pɔynt ɛn sho wetin mek di studɛnt du wɛl ɔ i kin tek tɛm ɛksplen wetin mek di studɛnt fɔ pe atɛnshɔn mɔ to da patikyula pɔynt de. Dɔn bak, di chiaman kin kɔmɛnt bɔt ɔda tin dɛn bɔt di tɔk if i fil se dat go bɛnifit di studɛnt ɔ di ɔdiɛns. Di chiaman kin yuz di Lɛk Pipul Dɛn brosho, di Tich brosho, ɔ di Ministry School buk fɔ gi advays to di pɔsin in wan afta mitin ɔ ɛni ɔda tɛm, ilɛk na pan di sem pɔynt ɔ ɔda wan.—Fɔ no mɔ bɔt wetin di Layf ɛn Prichin Mitin chiaman ɛn ɔgzilari kanselɔ fɔ du, luk  paregraf 19,  24, ɛn  paregraf 25.

19. Nɔbɔdi nɔ fɔ ovataym, ivin di chiaman fɔ di Layf ɛn Prichin Wok Mitin nɔ fɔ ovataym. If dɛn ovataym pan ɔda pat dɛn na di mitin, di ɔgzilari kanselɔ go gi advays bɔt dat prayvet wan. (Luk  paregraf 24 ɛn  paregraf 25.) Di wan ol mitin wit di siŋ ɛn prea fɔ bi 1 awa ɛn 45 minit.

20. We di kɔngrigeshɔn gɛt sakit visit, di program fɔ bi jɔs lɛk aw i de na di Layf ɛn Prichin Wok Mitin Buk, bɔt dɛn tin dɛn ya go chenj: Di Kɔngrigeshɔn Baybul Stɔdi pat we de ɔnda Liv Yu Layf Lɛk Kristian nɔ go de, na di sakit ovasia go yuz di 30 minit fɔ gi di savis tɔk. Bifo di savis tɔk bigin, di chiaman fɔ di Layf ɛn Prichin Wok Mitin fɔ tɔk smɔl bɔt wetin wi dɔn lan ɛn wetin wi go lan nɛks wik, dɔn if ɛni anawnsmɛnt de ɛn lɛta de fɔ rid i kin rid am bifo i kɔl di sakit ovasia fɔ go na stej. Afta di savis tɔk, di sakit ovasia go ɛnd di mitin wit di siŋ we i dɔn pik. I kin kɔl ɔda brɔda fɔ kam dɔn di mitin wit prea. We wi gɛt sakit visit, sɛkɔn skul nɔ go de insay di langwej we di kɔngrigeshɔn de tɔk. If di kɔngrigeshɔn gɛt grup, dɛn kin stil gɛt dɛn mitin pan ɔl we di sakit ovasia de wit di men kɔngrigeshɔn. Bɔt di grup fɔ jɔyn di men kɔngrigeshɔn bak fɔ di sakit ovasia in savis tɔk.

21. Insay di wik fɔ di asɛmbli ɔ kɔnvɛnshɔn, mitin nɔ fɔ de. Ɔlman fɔ stɔdi di matirial we wi fɔ du na mitin da wik de fɔ insɛf ɔ as famili.

22. If wi go gɛt di Mɛmorial insay di wik, wi nɔ go gɛt ɛni pat fɔ di Layf ɛn Prichin Wok Mitin. Bɔt wi go stil gɛt mitin fɔ fil savis di de fɔ di Mɛmorial.

23. Na ɔl di ɛlda dɛn na di kɔngrigeshɔn go disayd udat fɔ pik fɔ bi di Layf ɛn Prichin Wok Mitin ovasia. Na in gɛt di wok fɔ mek shɔ se dis mitin ɔganayz fayn fayn wan ɛn dɛn du ɔltin lɛk aw i de insay ya. I fɔ mek shɔ se in ɛn di ɔgzilari kanselɔ de tɔk. We di Layf ɛn Prichin Wok Mitin Buk kam fɔ da mɔnt de, di Layf ɛn Prichin Wok Mitin ovasia nɔ fɔ westɛm fɔ mek di studɛnt asaynmɛnt dɛn. Dis gɛt fɔ du wit asaynmɛnt dɛn we nɔto fɔ studɛnt ɛn asaynmɛnt dɛn we dɛn kin gi fɔ di mid-wik mitin chiaman dɛn we di ɛlda dɛn apruv ɛn i gɛt fɔ du bak wit studɛnt dɛn we gɛt asaynmɛnt. (Luk  paregraf 3-16 ɛn  paregraf 24.) We i de mek studɛnt asaynmɛnt, i fɔ tek tɛm tink bɔt di studɛnt in ej, ɛkspiriɛns ɛn aw i kin tɔk bɔt di tin dɛn we wi kin lan na di mitin. I fɔ du di sem tin we i de gi ɔda pat dɛn na di mitin. Ɔl di studɛnt dɛn fɔ gɛt dɛn Kristian Layf ɛn Prichin Wok Mitin Asaynmɛnt (S-89) fɔm tri wik bifo di tɛm fɔ du di asaynmɛnt. Layf ɛn Prich Wok Mitin Asaynmɛnt (S-89) fɔm na in fɔ yuz fɔ di studɛnt asaynmɛnt. Di Layf ɛn Prichin Wok ovasia fɔ mek shɔ se di shɛdul fɔ di mitin pat dɛn de na di notis bɔd. Sɔntɛm di ɛlda dɛn go pik ɔda ɛlda ɔ ministerial savant fɔ ɛp am. Bɔt, na ɛlda dɛn nɔmɔ fɔ pik pɔsin fɔ pat we nɔto fɔ studɛnt.

24. Ɛni wik, na wan ɛlda go bi chiaman fɔ di Layf ɛn Prichin Wok Mitin. (If di kɔngrigeshɔn nɔ gɛt bɔku ɛlda dɛn, dɛn kin yuz ministerial savant we kwalifay fɔ du dis pat.) Na in fɔ pripia wetin fɔ se fɔ stat di mitin ɛn fɔ dɔn di mitin. Dɔn bak, na in ɛn di ɔdiɛns fɔ tɔk bɔt di vidio dɛn we de sho wi aw fɔ prich ɛn di vidio dɛn bɔt di stɔdi pɔynt dɛn frɔm di Kɔntinyu fɔ De Rid ɛn Tich brosho. Na in de introdyus ɔl di pat dɛn, ɛn if di ɛlda dɛn nɔ bɔku i kin gɛt ɔda pat bak na di mitin. I fɔ gi shɔt kɔmɛnt dɛn fɔ ɛni pat we dɛn du na di mitin. Na ɔl di ɛlda dɛn na di kɔngrigeshɔn fɔ disayd us ɛlda go kwalifay fɔ du dis pat. Di ɛlda dɛn we kwalifay go bi chiaman bay tɔn. Akɔdin to di say we una de, sɔntɛm dɛn kin yuz di ovasia fɔ di Layf ɛn Prichin Wok Mitin mɔ pas di ɔda kwalifay ɛlda dɛn na di kɔngrigeshɔn. If ɛlda kwalifay fɔ kɔndɔkt di Kɔngrigeshɔn Baybul Stɔdi, sɔntɛm i go kwalifay bak fɔ bi chiaman fɔ di mitin. Duya mɛmba bak se, di ɛlda we de bi chiaman fɔ ebul gi di studɛnt dɛn we gɛt asaynmɛnt advays we go ɛp dɛn ɛn tɛl dɛn tɛnki di we we go sho se i lɛk dɛn. Na di chiaman gɛt di wok bak fɔ mek shɔ se di mitin dɔn di tɛm we i fɔ dɔn. (Luk  paregraf 17 ɛn  paregraf 19.) If di chiaman want ɛn mɔ spes de, i kin mek dɛn put ɔda maykrofon we i go de yuz fɔ introdyus di pat dɛn as di brɔda dɛn we gɛt di pat de tinap bifo di spika stand. Dɔn, if di chiaman want i kin sidɔm na wan chia na di stej as di studɛnt we gɛt di Baybul ridin de du in asaynmɛnt ɛn fɔ di pat we se Du Wetin Yu Dɔn Lan We Yu De Prich. Dis kin sev tɛm.

25. If i pɔsibul, i go fayn fɔ yuz ɛlda we gɛt ɛkspiriɛns fɔ gi tɔk fɔ du dis wok. Di ɔgzilari kanselɔ in wok na fɔ gi prayvet advays to ɛlda dɛn ɛn ministerial savant dɛn bɔt aw dɛn du dɛn asaynmɛnt, ɛn dis gɛt fɔ du wit di pat dɛn we dɛn kin gɛt na di Layf ɛn Prichin Wok Mitin, pɔblik tɔk, ɛn aw dɛn kɔndɔkt ɔ rid fɔ di Wachtawa Stɔdi ɔ di Kɔngrigeshɔn Baybul Stɔdi. (Luk  paregraf 19.) If di kɔngrigeshɔn gɛt bɔku ɛlda dɛn we sabi gi tɔk ɛn tich fayn fayn wan, dɛn kin yuz difrɛn ɛlda dɛn fɔ bi ɔgzilari kanselɔ ɛni ia. Nid nɔ de fɔ lɛ di ɔgzilari kanselɔ gi advays fɔ ɛni asaynmɛnt we di brɔda dɛn du.

26. If di studɛnt dɛn bɔku, di kɔngrigeshɔn kin gɛt sɛkɔn skul fɔ di studɛnt asaynmɛnt dɛn. Ɛni sɛkɔn skul fɔ gɛt kwalifay kanselɔ, ɛn if i pɔsibul di kanselɔ fɔ bi ɛlda. If nid de, dɛn kin pik ministerial savant we kwalifay fɔ du dat. Di ɛlda dɛn na di kɔngrigeshɔn go disayd udat fit fɔ du dis pat ɛn if dɛn fɔ de du am bay tɔn. Di kanselɔ fɔ fala wetin de na  paregraf 18. If sɛkɔn skul de, dɛn fɔ tɛl di studɛnt dɛn fɔ go na di sɛkɔn skul afta dɛn dɔn du di mitin pat we se Luk Gud Wan fɔ di Valyu Tin dɛn na Gɔd in Wɔd we de ɔnda di Di Valyu Tin dɛn Frɔm Gɔd in Wɔd. Dɛn fɔ jɔyn di kɔngrigeshɔn bak fɔ di pat we se Liv Yu Layf Lɛk Kristian.

27. Vidio dɛn de we dɛn dɔn pik fɔ lɛ wi yuz fɔ dis mitin. Di vidio dɛn we wi fɔ yuz na di mitin we wi de gɛt insay di wik de na JW Laybri® ap ɛn i izi fɔ gɛt na difrɛn ilɛktronik tin dɛn.

© 2023 Watch Tower Bible and Tract Society of Pennsylvania

S-38-KRI 11/23