1 Pita 2:1-25
2 So una lɛf ɔltin we bad, una lɛf fɔ ful pipul dɛn, una lɛf fɔ mek ipokrit ɛn jɛlɔs una kɔmpin dɛn, ɛn una nɔ yuz ɛni bad wɔd.
2 Jɔs lɛk yɔŋbebi dɛn we dɛn jɔs bɔn, una fɔ gɛt apitayt fɔ di klin milk* we de kɔmɔt na Gɔd in wɔd, so dat di milk go mek una machɔ ɛn sev,
3 if nɔmɔ una dɔn si se di Masta gud.
4 Mɔtalman dɛn nɔ gri fɔ tek di ston we de liv, bɔt Gɔd dɔn pik am ɛn i si am se i gɛt valyu. As una de kam to am,
5 unasɛf we na ston dɛn we de liv, una na os we Gɔd in spirit de bil fɔ mek una bi oli prist dɛn, so dat Gɔd in spirit go gayd una fɔ mek sakrifays dɛn we Gɔd go gri wit tru Jizɔs Krays.
6 Di Skripchɔ se: “Luk! A de le na Zayɔn wan ston we a dɔn pik, wan valyu ston fɔ di kɔna na di fawndeshɔn, ɛn ɛnibɔdi we sho se i gɛt fet pan am nɔ go ɛva disapɔynt.”*
7 So na to una i valyu bikɔs una biliv, bɔt to di wan dɛn we nɔ de biliv, “di ston we di wan dɛn we de bil nɔ gri fɔ yuz, na in dɔn bi di men ston na di kɔna”
8 ɛn “wan ston we de mek pɔsin bɔk in fut ɛn wan rɔk we de ɔfɛn pɔsin.” Dɛn de bɔk dɛn fut bikɔs dɛn nɔ de obe di wɔd. Na dis we ya dɛn go ɛnd.
9 Bɔt una na “pipul dɛn we Gɔd dɔn pik, una na kiŋ ɛn prist dɛn, una na oli neshɔn, una na Gɔd in spɛshal prɔpati, so dat una go tɔk ɔlsay bɔt di wɔndaful kwaliti dɛn” we di Wan we pul una na daknɛs ɛn briŋ una na in wɔndaful layt, gɛt.
10 Trade una nɔto bin Gɔd in pipul dɛn, bɔt naw una na in pipul dɛn; trade i nɔ bin sɔri fɔ una, bɔt naw i dɔn sɔri fɔ una.
11 Di wan dɛn we a rili lɛk, bikɔs una na fɔrina dɛn ɛn pipul dɛn we de na di wɔl fɔ shɔt tɛm, a de beg una fɔ mek una kɔntinyu fɔ avɔyd di tin dɛn we di bɔdi want, we de fɛt agens una.*
12 Una kɔntinyu fɔ biev fayn we una de wit di pipul dɛn na di wɔl,* so dat we dɛn se una de du bad, dɛn go si di fayn tin dɛn we una de du, ɛn dat go mek dɛn gi glori to Gɔd di de we i go kam fɔ chɛk una.
13 Fɔ di Masta in sek, una put unasɛf ɔnda ɔl wetin mɔtalman mek,* ilɛk na kiŋ we de oba una
14 ɔ gɔvnɔ dɛn we i sɛn fɔ pɔnish di wan dɛn we du bad ɛn prez di wan dɛn we du gud.
15 We una de du gud, una de mek di man dɛn we nɔ de tink lɛf fɔ tɔk tin we dɛn nɔ no, ɛn dat na tin we Gɔd want.
16 Una biev lɛk fri pipul dɛn, bɔt una nɔ yuz una fridɔm as ɛkskyuz fɔ du wetin bad, una yuz am fɔ bi slev dɛn fɔ Gɔd.
17 Una ɔnɔ ɔlkayn pipul dɛn, una lɛk ɔl una brɔda dɛn, una fred Gɔd, una ɔnɔ di kiŋ.
18 Lɛ savant dɛn put dɛnsɛf ɔnda dɛn masta dɛn ɛn gi dɛn ɔl di rɛspɛkt we dɛn fɔ gɛt, dɛn nɔ fɔ jɔs du dis to di wan dɛn we gud ɛn we nɔ de pin pan sɔntin, bɔt dɛn fɔ du am bak to di wan dɛn we at fɔ pliz.
19 We pɔsin bia prɔblɛm ɛn sɔfa pan ɔl we i nɔ du bad bikɔs i want fɔ gɛt klin kɔnshɛns na Gɔd in yay, dat na fayn tin.
20 Us prez una go gɛt if una bia we dɛn bit una bikɔs una de sin? Bɔt if una bia we una de sɔfa bikɔs una de du gud, dat na fayn tin na Gɔd in yay.
21 Infakt, na fɔ dis mek dɛn kɔl una, bikɔs ivin Krays sɔfa fɔ una ɛn lɛf patan fɔ una fɔ fala in futmak gud gud wan.
22 I nɔ wande sin, ɛn i nɔ lay.
23 We dɛn tɛl am bad wɔd, insɛf nɔ yuz bad wɔd. We i bin de sɔfa, i nɔ trɛtin ɛnibɔdi, bɔt i put in op pan di Wan we de jɔj di rayt we.
24 I tek wi sin dɛn na in bɔdi we i bin de na di tik, so dat wi nɔ go gɛt ɛnitin fɔ du wit sin, ɛn wi go liv fɔ du wetin rayt. Ɛn “in wund dɛn dɔn mɛn una.”
25 Una bin tan lɛk ship we de lɛf di rayt rod, bɔt naw una dɔn kam bak to di shɛpad ɛn ovasia fɔ una layf.*
Futnot Dɛn
^ Dat na, milk we dɛn nɔ miks wit ɛnitin.
^ Insay Grik, “shem.”
^ Ɔ “di sol.”
^ Insay Grik, “pipul dɛn na di neshɔn dɛn.”
^ Ɔ “arenjmɛnt we mɔtalman mek.”
^ Insay Grik, “sol.”
