3 Jɔn 1:1-14
1 Mi we na man we dɔn ol* de rayt to Geɔs we a rili lɛk.
2 Di wan we a rili lɛk, a de pre mek ɔltin kɔntinyu fɔ fayn fɔ yu ɛn mek yu gɛt wɛlbɔdi, jɔs lɛk aw tin fayn fɔ yu* naw.
3 A bin rili gladi we brɔda dɛn kam tɔk bɔt di trut we de insay yu, as yu kɔntinyu fɔ de na di trut.
4 No gladi-at nɔ de* we pas dis: we a de yɛri se mi pikin dɛn de kɔntinyu fɔ de na di trut.
5 Di wan we a rili lɛk, yu de sho se yu fetful bay di tin dɛn we yu de du fɔ di brɔda dɛn, pan ɔl we dɛn na strenja dɛn to yu.
6 Dɛn dɔn tɔk bifo di kɔngrigeshɔn bɔt di lɔv we yu gɛt. Duya we dɛn de go, du yu bɛst fɔ ɛp dɛn di we we go mek Gɔd gladi.
7 Na bikɔs ɔf in nem mek dɛn go fɔ prich, ɛn dɛn nɔ de tek ɛnitin frɔm di pipul dɛn na ɔda neshɔn dɛn.
8 So wi nid fɔ sho dɛn kayn pipul ya se wi lɛk strenja dɛn, so dat wi go wok togɛda fɔ mek di trut go bifo.
9 A rayt sɔntin to di kɔngrigeshɔn, bɔt Dayɔtrifis, we lɛk fɔ put insɛf bifo dɛn, nɔ de lisin to ɛnitin we wi se.
10 Na dat mek if a kam, a go mek dɛn no di tin dɛn we i de du, dat na, we i de go ɛn tɔk bad bɔt wi. We dat nɔ du fɔ am, i nɔ de gri fɔ wɛlkɔm di brɔda dɛn wit rɛspɛkt; ɛn di wan dɛn we want fɔ wɛlkɔm dɛn, i de tray fɔ ambɔg dɛn ɛn pul dɛn kɔmɔt na di kɔngrigeshɔn.
11 Di wan we a rili lɛk, nɔ fala- makata wetin bad, bɔt falamakata wetin gud. Di wan we de du gud kɔmɔt frɔm Gɔd. Di wan we de du bad nɔ wande si Gɔd.
12 Dɛn ɔl dɔn tɔk fayn bɔt Dimitriɔs, ɛn di we aw i de liv akɔdin to di trut dɔn tɔk fayn bɔt am bak. Infakt, wisɛf de tɔk bɔt am, ɛn yu no se di tin we wi de tɔk na tru.
13 A gɛt bɔku tin dɛn fɔ rayt to yu, bɔt a nɔ want fɔ kɔntinyu fɔ rayt to yu wit pɛn ɛn ink.
14 Bɔt a de op fɔ si yu jisnɔ, ɛn wi go tɔk fes-to-fes.
Mek yu gɛt pis.
Wi padi dɛn de grit yu. Grit wi padi dɛn wan bay wan.
