Rɛvɛleshɔn 11:1-19
11 Ɛn dɛn gi mi wan tik we tan lɛk rɔd ɛn i tɛl mi se: “Grap ɛn mɛzhɔ Gɔd in tɛmpul ɛn di ɔlta ɛn di wan dɛn we de wɔship insay de.
2 Bɔt nɔ mɛzhɔ di kɔmpawnd we de rawnd di tɛmpul, lɛf am, bikɔs dɛn dɔn gi am to di neshɔn dɛn, ɛn dɛn go mas di oli siti ɔnda dɛn fut fɔ 42 mɔnt.
3 A go mek mi tu witnɛs dɛn tɔk tin we na prɔfɛsi fɔ 1,260 dez, ɛn dɛn go wɛr klos we pipul dɛn kin wɛr we dɛn at pwɛl.”
4 Di tu ɔliv tik dɛn ɛn di tu stand dɛn we lamp de pan tinap fɔ dɛn, ɛn dɛn tinap bifo di Masta fɔ di wɔl.
5 If ɛnibɔdi want fɔ du dɛn bad, faya de kɔmɔt na dɛn mɔt ɛn bɔn dɛn ɛnimi dɛn. If ɛnibɔdi want fɔ du dɛn bad, na so fɔ kil am.
6 Dɛn gɛt di pawa fɔ lɔk di skay* fɔ mek ren nɔ kam di de dɛn we dɛn de tɔk tin we na prɔfɛsi, ɛn dɛn gɛt pawa oba di wata dɛn fɔ mek dɛn tɔn to blɔd ɛn fɔ mek ɔlkayn bad bad tin dɛn apin na di wɔl bɔku tɛm as dɛn want.
7 We dɛn dɔn fɔ tɔk Gɔd in mɛsej, di wayl animal we kɔmɔt na di ol we nɔ gɛt bɔtɔm go fɛt wɔ wit dɛn, win dɛn, ɛn kil dɛn.
8 Ɛn dɛn dedebɔdi go de na di men strit na di impɔtant siti we na Gɔd in yay dɛn kɔl am Sɔdɔm ɛn Ijipt, usay dɛn kil dɛn Masta pan tik.
9 Ɛn bɔku pan di pipul dɛn, trayb dɛn, pipul dɛn we de tɔk difrɛn langwej dɛn, ɛn neshɔn dɛn go luk dɛn dedebɔdi fɔ tri ɛn af dez, ɛn dɛn nɔ go alaw mek dɛn le dɛn bɔdi dɛn na grev.
10 Ɛn di wan dɛn we de na di wɔl gladi ɛn sɛlibret we dɛn day, ɛn dɛn go sɛn gift dɛn to dɛn kɔmpin dɛn, bikɔs dɛn tu prɔfɛt ya bin tɔmɛnt di wan dɛn we de na di wɔl.
11 Afta di tri ɛn af dez, Gɔd gi dɛn layf* bak, ɛn dɛn tinap ɛn di wan dɛn we si dɛn rili fred.
12 Ɛn dɛn yɛri wan lawd vɔys we kɔmɔt na ɛvin ɛn tɛl dɛn se: “Una kam ɔp ya.” Ɛn dɛn go na ɛvin insay di klawd, ɛn dɛn ɛnimi dɛn si dɛn.*
13 Insay da awa de wan big atkwek apin, ɛn we yu sheb di siti to tɛn pat, wan pat fɔdɔm, ɛn di atkwek kil 7,000 pipul dɛn, ɛn di wan dɛn we lɛf bin fred ɛn gi glori to Gɔd we de na ɛvin.
14 Di sɛkɔn trɔbul dɔn pas. Di tɔd trɔbul de kam kwik kwik wan.
15 Di nɔmba sɛvin enjɛl blo in trɔmpɛt. Ɛn a yɛri lawd vɔys dɛn na ɛvin de se: “Di kiŋdɔm na di wɔl dɔn bi wi Masta ɛn in Krays in yon, ɛn i go rul as kiŋ sote go.”
16 Ɛn di 24 ɛlda dɛn we bin sidɔm na dɛn tron dɛn bifo Gɔd butu ɛn wɔship Gɔd.
17 Dɛn bin de se: “Wi tɛl yu tɛnki Jiova* Gɔd, di Ɔlmayti, di wan we de naw ɛn di wan we bin de, bikɔs yu dɔn tek yu pawa ɛn bigin fɔ rul as kiŋ.
18 Bɔt di neshɔn dɛn vɛks, ɛn yusɛf vɛks, ɛn di tɛm we yu dɔn pik kam fɔ jɔj di wan dɛn we dɔn day ɛn fɔ pe yu slev dɛn we na di prɔfɛt dɛn ɛn di oli wan dɛn ɛn di wan dɛn we de fred yu nem, di kɔmɔn wan dɛn ɛn di wan dɛn we gɛt ay pozishɔn, ɛn fɔ pwɛl di wan dɛn we de pwɛl di wɔl.”
19 Ɛn Gɔd in tɛmpul* na ɛvin opin, ɛn a si di agrimɛnt bɔks insay in tɛmpul. Ɛn laytin flash, tɛnda krak, atkwek apin, ays blɔk fɔdɔm lɛk ren, ɛn a yɛri vɔys dɛn.
Futnot Dɛn
^ Ɔ “ɛvin.”
^ Ɔ “briz.” Insay Grik, “spirit.”
^ Ɔ “bin de luk.”
^ Rid Baybul Wɔd dɛn Minin.
^ Dat na, di say we oli pas ɔl na di tɛmpul.
