Rɛvɛleshɔn 13:1-18
13 Ɛn i* tinap wan ples na di sansan we de nia di si.
Ɛn a si wan wayl animal de kɔmɔt insay di si, i gɛt tɛn ɔn ɛn sɛvin ed, ɛn pan in ɔn dɛn i gɛt tɛn tin dɛn we tan lɛk krawn,* ɛn i gɛt nem dɛn na in ed dɛn we de tɔk bad bɔt Gɔd.
2 Di wayl animal we a bin si tan lɛk liopad, bɔt in fut tan lɛk bia in fut, ɛn in mɔt tan lɛk layɔn mɔt. Ɛn di dragɔn gi di animal in pawa, in tron, ɛn bɔku bɔku rayt.
3 Ɛn a si se i bin tan lɛk wan pan in ed dɛn bin wund bad bad wan, bɔt pan ɔl we di wund fɔ dɔn kil am, i bin wɛl, ɛn di wan ol wɔl bin de fala di wayl animal ɛn kɔle pan am.
4 Ɛn dɛn wɔship di dragɔn bikɔs i gi pawa to di wayl animal, ɛn dɛn bin de wɔship di wayl animal wit dɛn wɔd ya. Dɛn bin de se: “Udat tan lɛk di wayl animal, ɛn udat ebul fɔ fɛt am?”
5 Dɛn gi am mɔt fɔ bost ɛn fɔ tɔk bad bɔt tin dɛn we oli, ɛn dɛn gi am pawa fɔ du wetin i want fɔ 42 mɔnt.
6 Ɛn i opin in mɔt fɔ tɔk bad bɔt Gɔd ɛn fɔ tɔk bad bɔt in nem ɛn usay i de, ɛn fɔ ivin tɔk bad bɔt di wan dɛn we de na ɛvin.
7 Dɛn alaw am fɔ fɛt wɔ wit di oli wan dɛn ɛn win dɛn, ɛn dɛn gi am pawa oba ɔl di trayb dɛn, pipul dɛn, pipul dɛn we de tɔk difrɛn difrɛn langwej dɛn, ɛn neshɔn dɛn.
8 Ɛn ɔl di wan dɛn we de na di wɔl go wɔship am. Frɔm we di wɔl bigin, nɔn pan dɛn nem dɛn nɔ rayt na di skrol we de sho se pɔsin go gɛt layf, we di Yɔŋ Ship we dɛn bin kil gɛt.
9 If ɛnibɔdi gɛt yes, lɛ i lisin.
10 If dɛn fɔ kapchɔ ɛnibɔdi, dɛn go kapchɔ am. If ɛnibɔdi gɛt fɔ kil wit sɔd,* dɛn fɔ kil am wit sɔd. Na dis mek di oli wan dɛn nid fɔ bia ɛn gɛt fet.
11 Dɔn a si wan ɔda wayl animal de kɔmɔt na di wɔl, ɛn i gɛt tu ɔn lɛk yɔŋ ship, bɔt i bigin fɔ tɔk lɛk dragɔn.
12 I yuz di sem pawa we di fɔs wayl animal gɛt, bifo in yay. Ɛn i mek di wɔl ɛn di wan dɛn we de de, wɔship di fɔs wayl animal, we in wund bin wɛl.
13 Ɛn i pafɔm pawaful sayn dɛn, i ivin mek faya kɔmɔt na ɛvin ɛn kam dɔŋ na di wɔl bifo mɔtalman.
14 I ful di wan dɛn we de na di wɔl, bikɔs ɔf di sayn dɛn we dɛn alaw am fɔ pafɔm bifo di wayl animal, ɛn i tɛl di wan dɛn we de na di wɔl fɔ mek wan imej fɔ di wayl animal we dɛn chuk wit sɔd bɔt we wɛl bak.
15 Ɛn dɛn alaw am fɔ gi layf* to di wayl animal in imej, so dat di wayl animal in imej go tɔk ɛn mek dɛn kil ɔl di wan dɛn we nɔ gri fɔ wɔship di wayl animal in imej.
16 I fos ɔlman—di kɔmɔn wan dɛn ɛn di wan dɛn we gɛt ay pozishɔn, di wan dɛn we jɛntri ɛn di wan dɛn we po, di wan dɛn we na slev ɛn di wan dɛn we nɔto slev—fɔ mek dɛn mak dɛn na dɛn raytan ɔ na dɛn fɔɛd,
17 ɛn fɔ mek nɔbɔdi nɔ ebul fɔ bay ɔ sɛl pas di wan we gɛt di mak, di wayl animal in nem ɔ in nem in nɔmba.
18 Na ya so sɛns kam insay: Mek di wan we ɔndastand chɛk di wayl animal in nɔmba, bikɔs na mɔtalman nɔmba, ɛn in nɔmba na 666.
Futnot Dɛn
^ Dat na, di dragɔn.
^ Ɔ “kiŋ edban dɛn.”
^ Ɔ i kin bi, “If dɛn fɔ kil ɛnibɔdi wit sɔd.”
^ Insay Grik, “briz.”
