Rɛvɛleshɔn 15:1-8
15 Ɛn a si na ɛvin wan ɔda sayn we gret ɛn wɔndaful; a si sɛvin enjɛl dɛn we gɛt sɛvin bad tin dɛn. Na di las wan dɛn dis, bikɔs na dɛn go mek Gɔd in wamat dɔn.
2 Ɛn a si sɔntin we tan lɛk si we dɛn mek wit glas we miks wit faya, ɛn di wan dɛn we win di wayl animal ɛn in imej ɛn in nem in nɔmba bin tinap nia di si we dɛn mek wit glas, dɛn ol Gɔd in ap dɛn.
3 Dɛn bin de siŋ Mozis, we na Gɔd in slev, in siŋ ɛn di Yɔŋ Ship in siŋ. Dɛn bin de siŋ se:
“Jiova* Gɔd, di Ɔlmayti, di tin dɛn we yu de du gret ɛn wɔndaful. Yu de du tin di rayt we ɛn wetin yu de du de in layn wit wetin tru, yu na Kiŋ we bin dɔn de ɛn we go de sote go.
4 Jiova,* udat nɔ go rili fred yu ɛn prez yu nem, bikɔs na yu nɔmɔ nɔ de kɔmɔt biɛn pɔsin? Ɔl di neshɔn dɛn go kam ɛn wɔship bifo yu, bikɔs dɛn dɔn si se yu de jɔj di rayt we.”
5 Afta dis a si na ɛvin di oli ples we de na di tɛnt we gɛt wetin Gɔd dɔn tɔk, opin,
6 ɛn di sɛvin enjɛl dɛn we gɛt di sɛvin bad tin dɛn kɔmɔt insay di oli ples, dɛn wɛr klin, brayt linin ɛn gold klos bin rap rawnd dɛn chɛst.
7 Wan pan di 4 chɛrɔb* dɛn gi di sɛvin enjɛl dɛn sɛvin gold bol dɛn we ful-ɔp wit Gɔd, we de liv sote go, in wamat.
8 Ɛn di oli ples ful-ɔp wit smok bikɔs ɔf Gɔd in glori ɛn bikɔs ɔf in pawa, ɛn nɔbɔdi nɔ ebul fɔ ɛnta na di oli ples pas te di sɛvin bad tin dɛn we di sɛvin enjɛl dɛn gɛt dɔn apin.
