Rɛvɛleshɔn 19:1-21
19 Afta dis a yɛri sɔntin na ɛvin we tan lɛk bɔku bɔku pipul dɛn vɔys we lawd. Dɛn se: “Prez Ja!* Wi Gɔd we de sev, ɛn na in gɛt di glori ɛn di pawa,
2 bikɔs i de jɔj di tru we ɛn di rayt we. I dɔn jɔj di raregal we ɔlman sabi we kɔrɔpt di wɔl wit in mami ɛn dadi biznɛs di we aw Gɔd nɔ want,* ɛn i dɔn tɔn-am-gi fɔ in slev dɛn we i kil.”
3 Ɛn wantɛm wantɛm dɛn tɔk fɔ di sɛkɔn tɛm se: “Prez Ja!* Ɛn di smok we de kɔmɔt pan am kɔntinyu fɔ go ɔp sote go.”
4 Ɛn di 24 ɛlda dɛn ɛn di 4 chɛrɔb* dɛn butu ɛn wɔship Gɔd we sidɔm na di tron ɛn se: “Emɛn! Prez Ja!”*
5 Ɛn wan vɔys kɔmɔt na di tron ɛn tɔk se: “Una go de prez wi Gɔd, una ɔl we na in slev, we de fred am, di kɔmɔn wan dɛn ɛn di wan dɛn we gɛt ay pozishɔn.”
6 Ɛn a yɛri sawnd we tan lɛk bɔku bɔku pipul dɛn vɔys ɛn lɛk bɔku bɔku wata dɛn sawnd ɛn lɛk big big tɛnda dɛn sawnd. Dɛn se: “Prez Ja,* bikɔs Jiova* wi Gɔd, we na di Ɔlmayti, dɔn bigin fɔ rul as kiŋ!
7 Lɛ wi gladi ɛn gladi pasmak ɛn gi am glori, bikɔs di tɛm fɔ mek di Yɔŋ Ship mared dɔn kam ɛn in wɛf dɔn rɛdi insɛf.
8 Dɛn dɔn alaw in wɛf fɔ wɛr brayt, klin, fayn linin—di fayn linin tinap fɔ di rayt tin dɛn we di oli wan dɛn de du.”
9 Ɛn i tɛl mi se, “Rayt dis: Di wan dɛn we dɛn invayt na di ivintɛm it fɔ di Yɔŋ Ship in mared, gɛt gladi-at.” Dɔn i tɛl mi se: “Dɛn wɔd ya we Gɔd tɔk na tru.”
10 Na de a fɔdɔm bifo in fut fɔ wɔship am. Bɔt i tɛl mi se: “Tek tɛm! Nɔ du dat! Mi na jɔs slev lɛk yu ɛn yu brɔda dɛn we gɛt di wok fɔ tɔk bɔt Jizɔs. Wɔship Gɔd! Bikɔs prɔfɛsi dɛn de fɔ tɛl pipul dɛn bɔt Jizɔs.”
11 A si ɛvin opin, ɛn a si wan wayt ɔs. Ɛn dɛn kɔl di wan we sidɔm pan am Fetful ɛn Tru, ɛn i de jɔj ɛn fɛt wɔ di rayt we.
12 In yay dɛn na faya we de kech, ɛn i gɛt bɔku tin dɛn we tan lɛk krawn* na in ed. I gɛt wan nem we rayt we nɔbɔdi nɔ no pas in nɔmɔ,
13 ɛn di klos we i wɛr pantap bin gɛt blɔd sten, ɛn di nem we dɛn de kɔl am na Gɔd in Wɔd.
14 Ɛn di sojaman dɛn na ɛvin bin de fala am pan wayt ɔs dɛn, ɛn dɛn bin wɛr wayt, klin, fayn linin.
15 Ɛn wan shap, lɔng sɔd de kɔmɔt na in mɔt we i go yuz fɔ kil di neshɔn dɛn, ɛn i go bi shɛpad fɔ di pipul dɛn ɛn na rɔd we dɛn mek wit ayɛn go de na in an. Pantap dat, i mas mas di greps dɛn na Gɔd in say fɔ mas greps, we na Gɔd we na di Ɔlmayti in bad bad vɛksteshɔn.
16 I gɛt wan nem we rayt pan di klos we i wɛr pantap, we kɔba in lɛg. Di nem na Kiŋ fɔ di kiŋ dɛn ɛn Masta fɔ di masta dɛn.
17 A si bak wan enjɛl tinap na di san, ɛn i ala lawd wan ɛn tɛl ɔl di bɔd dɛn we de flay midul di skay se: “Una kam ya, una kam gɛda na Gɔd in big ivintɛm it,
18 so dat una go it di kiŋ dɛn bɔdi, di ami kɔmanda dɛn bɔdi, di strɔng man dɛn bɔdi, di ɔs dɛn bɔdi ɛn di wan dɛn we sidɔm pan dɛn, ɛn ɔlman in bɔdi, di wan dɛn we nɔto slev ɛn di wan dɛn we na slev, di kɔmɔn wan dɛn ɛn di wan dɛn we gɛt ay pozishɔn.”
19 Ɛn a si di wayl animal ɛn di kiŋ dɛn na di wɔl ɛn dɛn sojaman dɛn gɛda fɔ fɛt wɔ wit di wan we sidɔm pan di ɔs ɛn wit in sojaman dɛn.
20 Ɛn dɛn kech di wayl animal ɛn di lay lay prɔfɛt we bin de pafɔm di sayn dɛn bifo am we i yuz fɔ ful di wan dɛn we tek di wayl animal in mak ɛn di wan dɛn we wɔship in imej. We dɛn stil de alayv, dɛn ib dɛn ɔl tu insay di lek we gɛt faya we de bɔn wit sɔlfɔ.
21 Bɔt dɛn kil ɔl di wan dɛn we lɛf wit di lɔng sɔd we kɔmɔt na di wan we sidɔm pantap di ɔs, in mɔt. Ɛn ɔl di bɔd dɛn it dɛn bɔdi dɛn ɛn bɛlful.
Futnot Dɛn
^ Ɔ “Aleluya!” Ja na di shɔt we fɔ kɔl Jiova in nem.
^ Grik, pɔnia. Rid Baybul Wɔd dɛn Minin.
^ Ɔ “Aleluya!” Ja na di shɔt we fɔ kɔl Jiova in nem.
^ Rid Baybul Wɔd dɛn Minin.
^ Ɔ “Aleluya!” Ja na di shɔt we fɔ kɔl Jiova in nem.
^ Ɔ “Aleluya!” Ja na di shɔt we fɔ kɔl Jiova in nem.
^ Rid Baybul Wɔd dɛn Minin.
^ Ɔ “kiŋ edban.”
