Rɛvɛleshɔn 21:1-27
21 Ɛn a si wan nyu ɛvin ɛn wan nyu wɔl; bikɔs di fɔs ɛvin ɛn di fɔs wɔl dɔn lɔs, ɛn di si nɔ de igen.
2 A si bak di oli siti, we na Nyu Jerusɛlɛm, de kɔmɔt to Gɔd na ɛvin de kam dɔŋ, ɛn dɛn rɛdi am lɛk yawo we dɛn mek fayn fɔ in man.
3 Na de a yɛri wan lawd vɔys we kɔmɔt na di tron se: “Luk! Gɔd in tɛnt de wit mɔtalman, ɛn i go liv wit dɛn, ɛn dɛn go bi in pipul dɛn. Ɛn Gɔd insɛf go de wit dɛn.
4 Ɛn i go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn dɛn nɔ go kray igen bikɔs dɛn at pwɛl. Di tin dɛn we bin de apin nɔ go de igen.”
5 Ɛn di Wan we sidɔm na di tron se: “Luk! A de mek ɔltin nyu.” Ɛn i tɔk bak se: “Rayt, bikɔs dɛn wɔd ya na tru ɛn pɔsin kin abop pan dɛn.”
6 Ɛn i tɛl mi se: “Dɛn dɔn apin! Na mi na di Alfa ɛn di Omɛga,* di biginin ɛn di ɛnd. Ɛnibɔdi we tɔsti, a go mek i drink fɔ fri* na di spriŋ wata* we de gi layf.
7 Ɛnibɔdi we win go gɛt dɛn tin ya, ɛn a go bi in Gɔd ɛn i go bi mi pikin.
8 Bɔt as fɔ di wan dɛn we de fred, di wan dɛn we nɔ gɛt fet, di wan dɛn we nɔ klin ɛn we de du ɔlkayn dɔti dɔti tin, di wan dɛn we de kil pɔsin, di wan dɛn we de du mami ɛn dadi biznɛs di we aw Gɔd nɔ want,* di wan dɛn we de pan juju biznɛs, di wan dɛn we de wɔship aydɔl, ɛn ɔl di lay man dɛn, dɛn go ib dɛn na di lek we de bɔn wit faya ɛn sɔlfɔ. Dis min di sɛkɔn day.”
9 Wan pan di sɛvin enjɛl dɛn we gɛt di sɛvin bol dɛn we ful-ɔp wit di las sɛvin bad tin dɛn, kam to mi ɛn tɔk se: “Kam, ɛn a go sho yu di yawo, di Yɔŋ Ship in wɛf.”
10 So i yuz di spirit fɔ kɛr mi go na wan big ɛn ay mawntin, ɛn i sho mi di oli siti, we na Jerusɛlɛm, de kɔmɔt to Gɔd na ɛvin de kam dɔŋ,
11 ɛn i gɛt Gɔd in glori. I de shayn lɛk wan ston we rili gɛt valyu, lɛk jaspa ston we de shayn lɛk glas we klia.
12 I gɛt big ɛn ay wɔl, ɛn i gɛt 12 get ɛn 12 enjɛl dɛn de na di get dɛn, ɛn di 12 trayb dɛn we kɔmɔt frɔm Izrɛl in pikin dɛn, dɛn nem bin rayt na di 12 get dɛn.
13 Tri get bin de na di ist, tri get bin de na di nɔt, tri get bin de na di sawt, ɛn tri get bin de na di wɛst.
14 Di siti in wɔl bin gɛt bak 12 fawndeshɔn ston dɛn, ɛn di Yɔŋ Ship in 12 apɔsul dɛn 12 nem dɛn bin rayt pan dɛn.
15 Di wan we de tɔk wit mi bin ol wan gold tik we tan lɛk rɔd fɔ mɛzhɔ, so dat i go mɛzhɔ di siti, in get dɛn, ɛn in wɔl.
16 Ɛn dɛn bil di siti lɛk skwaya, ɛn di we aw i lɔng ɛn di we aw i wayd na di sem. Ɛn we i mɛzhɔ di siti wit di tik we tan lɛk rɔd, na bin lɛk 1,379 mayl;* di we aw i lɔng, wayd, ɛn ay ɔl na di sem.
17 Ɛn we i mɛzhɔ di wɔl, na lɛk 210 fit* akɔdin to mɔtalman mɛzhɔmɛnt ɛn enjɛl mɛzhɔmɛnt.
18 Na jaspa dɛn tek mek di wɔl, ɛn di siti na bin fayn gold we tan lɛk glas we klia.
19 Dɛn yuz ɔlkayn ston we gɛt valyu fɔ mek di siti in fawndeshɔn dɛn fayn: Dɛn mek di fɔs fawndeshɔn wit jaspa, di sɛkɔn wan na wit safaya, di tɔd wan na wit kalsɛdoni, di wan we mek 4 na wit ɛmirald,
20 di wan we mek fayv na wit sadɔniks, di wan we mek siks na wit sadiɔs, di wan we mek sɛvin na wit krisolayt, di wan we mek et na wit bɛril, di wan we mek nayn na wit topaz, di wan we mek tɛn na wit krisoprez, di wan we mek ilɛvin na wit ayasint, di wan we mek twɛlv na wit amitist.
21 Ɛn di 12 get dɛn na 12 pal dɛn; na pal dɛn yuz fɔ mek ɔl di get dɛn. Ɛn na fayn gold we tan lɛk glas we klia na in dɛn tek mek di men strit na di siti.
22 A nɔ si tɛmpul insay de, bikɔs Jiova* Gɔd we na di Ɔlmayti ɛn di Yɔŋ Ship na dɛn na di tɛmpul.
23 Ɛn di siti nɔ nid di san ɔ di mun fɔ shayn de, bikɔs na Gɔd in glori bin de shayn de, ɛn in lamp na di Yɔŋ Ship.
24 Ɛn di neshɔn dɛn go yuz in layt fɔ waka, ɛn di kiŋ dɛn na di wɔl go kam wit dɛn glori insay de.
25 In get dɛn nɔ go ɛva lɔk dyurin di de, bikɔs nɛt nɔ go de de.
26 Ɛn dɛn go kam wit di neshɔn dɛn glori ɛn ɔnɔ insay de.
27 Bɔt ɛnitin we dɔti ɛn ɛnibɔdi we de du dɛn dɔti dɔti tin ɛn we de lay nɔ go go insay de; na di wan dɛn nɔmɔ we dɛn nem rayt na di Yɔŋ Ship in skrol we de sho se pɔsin go gɛt layf, na dɛn go go insay de.
Futnot Dɛn
^ Ɔ “di A ɛn di Z.” Alfa ɛn Omɛga na di fɔs ɛn las lɛta dɛn na di Grik alfabɛt.
^ Ɔ “ɛn nɔ pe natin.”
^ Ɔ “wata dɛn we bɔs na grɔn.”
^ Rid Baybul Wɔd dɛn Minin.
^ Insay Grik, “12,000 stedia.” Wan stediɔm ikwal to 185 mita.
^ Insay Grik, “144 kyubit.”
^ Rid Baybul Wɔd dɛn Minin.
