Rɛvɛleshɔn 5:1-14
5 Ɛn a si wan skrol we dɛn rayt na di tu say dɛn* ɛn we lɔk tayt wan wit sɛvin sil* dɛn. I bin de na di Wan we sidɔm na di tron, in raytan.
2 Ɛn a si wan strɔng enjɛl de tɔk wit lawd vɔys se: “Udat fit fɔ opin di skrol ɛn in sil* dɛn?”
3 Bɔt nɔbɔdi na ɛvin ɔ na di wɔl ɔ ɔnda di wɔl nɔ bin ebul fɔ opin di skrol ɔ luk insay de.
4 A kray bita bita wan bikɔs nɔbɔdi nɔ bin de we fit fɔ opin di skrol ɔ luk insay de.
5 Bɔt wan pan di ɛlda dɛn tɛl mi se: “Lɛf fɔ kray. Luk! Di Layɔn we de na Juda in trayb, we na Devid in rut, dɔn win so dat i go opin di skrol ɛn in sɛvin sil* dɛn.”
6 Ɛn a si wan yɔŋ ship we i tan lɛk se dɛn dɔn kil tinap midul di tron ɛn di 4 chɛrɔb* dɛn ɛn midul di ɛlda dɛn. I gɛt sɛvin ɔn ɛn sɛvin yay, ɛn di yay dɛn min Gɔd in sɛvin spirit dɛn we i dɔn sɛn na di wan ol wɔl.
7 Wantɛm wantɛm, i kam bifo ɛn tek am na di Wan we sidɔm na di tron, in raytan.
8 We i tek di skrol, di 4 chɛrɔb dɛn ɛn di 24 ɛlda dɛn butu bifo di Yɔŋ Ship, dɛn ɔl bin gɛt ap ɛn gold bol we ful-ɔp wit insɛns. (Di insɛns min di oli wan dɛn prea.)
9 Ɛn dɛn siŋ wan nyu siŋ se: “Yu fit fɔ tek di skrol ɛn opin in sil* dɛn, bikɔs dɛn bin kil yu ɛn yu yuz yu blɔd fɔ bay pipul dɛn fɔ Gɔd frɔm ɔl di trayb dɛn, pipul dɛn, neshɔn dɛn, ɛn dɛn bin de tɔk difrɛn difrɛn langwej,
10 ɛn yu mek dɛn bi kiŋ ɛn prist dɛn to wi Gɔd, ɛn dɛn go rul as kiŋ dɛn oba di wɔl.”
11 Ɛn a si ɛn yɛri bɔku enjɛl dɛn vɔys rawnd di tron, di chɛrɔb dɛn, ɛn di ɛlda dɛn, dɛn nɔmba na bin tɛn tawzin tayms tɛn tawzin ɛn bɔku bɔku tawzin tayms bɔku bɔku tawzin,
12 ɛn dɛn bin de tɔk wit lawd vɔys se: “Di Yɔŋ Ship we dɛn bin kil fit fɔ gɛt di pawa, di jɛntri, di sɛns, di trɛnk, di ɔnɔ, di glori, ɛn di blɛsin.”
13 Ɛn a yɛri ɔlman we de na ɛvin, na di wɔl, ɔnda di wɔl, ɛn na di si, ɛn ɔl di tin dɛn we de insay dɛn, de tɔk se: “Mek di Wan we sidɔm na di tron ɛn di Yɔŋ Ship gɛt di blɛsin, di ɔnɔ, di glori, ɛn di pawa sote go.”
14 Di 4 chɛrɔb dɛn bin de se: “Emɛn!” ɛn di ɛlda dɛn butu ɛn wɔship.
Futnot Dɛn
^ Insay Grik, “insay ɛn na di bak.”
^ Sil na waks we dɛn bin de yuz fɔ fasin skrol.
^ Sil na waks we dɛn bin de yuz fɔ fasin skrol.
^ Sil na waks we dɛn bin de yuz fɔ fasin skrol.
^ Rid Baybul Wɔd dɛn Minin.
^ Sil na waks we dɛn bin de yuz fɔ fasin skrol.
