Rɛvɛleshɔn 6:1-17
-
Di Yɔŋ Ship opin di fɔs siks sil dɛn (1-17)
-
Pɔsin we de win sidɔm pan wayt ɔs (1, 2)
-
Dɛn alaw di wan we sidɔm pan di ɔs we in kɔlɔ tan lɛk faya fɔ pul pis kɔmɔt na di wɔl (3, 4)
-
Dɛn alaw di wan we sidɔm pan di blak ɔs fɔ mek it rili shɔtin (5, 6)
-
Dɛn kɔl di wan we sidɔm pan di pel ɔs Day (7, 8)
-
Di wan dɛn we dɛn kil de ɔnda di ɔlta (9-11)
-
Bad bad atkwek (12-17)
-
6 Ɛn a si we di Yɔŋ Ship opin wan pan di sɛvin sil* dɛn, ɛn a yɛri wan pan di 4 chɛrɔb* dɛn tɔk wit vɔys we tan lɛk tɛnda se: “Kam!”
2 Ɛn a si wan wayt ɔs, ɛn di wan we sidɔm pan am gɛt bo, ɛn dɛn gi am krawn, ɛn i go ɛn win ɛn fɔ kɔntinyu fɔ win te i dɔn.
3 We i opin di sɛkɔn sil,* a yɛri di sɛkɔn chɛrɔb se: “Kam!”
4 Ɛn wan ɔda ɔs we in kɔlɔ tan lɛk faya kɔmɔt na do, dɛn alaw di wan we sidɔm pan am fɔ pul pis kɔmɔt na di wɔl so dat di wan dɛn we de de go kil dɛn kɔmpin dɛn, ɛn dɛn gi am wan pawaful sɔd.
5 We i opin di tɔd sil,* a yɛri di tɔd chɛrɔb se: “Kam!” Ɛn a si wan blak ɔs, ɛn di wan we sidɔm pan am bin ol skel we gɛt tu say dɛn fɔ we sɔntin.
6 A yɛri wan sawnd we tan lɛk vɔys midul di 4 chɛrɔb dɛn se: “Wan kilo* wit* fɔ wan dinariɔs* ɛn tri kilo bali fɔ wan dinariɔs; ɛn nɔ du bad to di ɔliv ɔyl ɛn di wayn.”
7 We i opin di nɔmba 4 sil,* a yɛri di nɔmba 4 chɛrɔb tɔk se: “Kam!”
8 Ɛn a si wan pel ɔs, ɛn di wan we sidɔm pan am in nem na Day. Ɛn di Grev* bin de biɛn am de fala am. Ɛn dɛn gi dɛn rayt oba wan pat na di wɔl we yu sheb di wɔl to 4 pat, fɔ mek dɛn kil wit lɔng sɔd, wit bad bad sik, wit di wayl animal dɛn, ɛn bay we dɛn mek it shɔtin.
9 We i opin di nɔmba fayv sil,* a si wan ɔlta. Ɔnda de, a si di wan dɛn we dɛn dɔn kil, dɛn sol* dɛn. Dɛn kil dɛn bikɔs ɔf Gɔd in wɔd ɛn bikɔs dɛn dɔn prich.
10 Dɛn ala wit lawd vɔys se: “Di Masta we De Oba Ɔlman, we oli ɛn tru, te ustɛm yu go de wet fɔ jɔj di wan dɛn we de na di wɔl ɛn tɔn-am-gi dɛn fɔ wi blɔd?”
11 Ɛn dɛn gi dɛn ɔl wayt klos ɛn tɛl dɛn fɔ rɛst fɔ smɔl tɛm, te dɛn kɔmpin slev dɛn ɛn brɔda dɛn we dɛn de kam kil jɔs lɛk dɛn, ful-ɔp di nɔmba.
12 Ɛn we i opin di nɔmba siks sil,* a si bad bad atkwek apin; di san blak jɔs lɛk klos we dɛn mek wit ia we pipul dɛn kin wɛr we dɛn at pwɛl,* ɛn di mun rɛd lɛk blɔd,
13 ɛn di sta dɛn na ɛvin fɔdɔm na di wɔl, lɛk we fig dɛn we nɔ rɛp de fɔdɔm we big briz shek di tik.
14 Ɛn di ɛvin kɔmɔt lɛk we dɛn fol skrol, ɛn ɔl di mawntin ɛn ayland dɛn kɔmɔt usay dɛn de.
15 Dɔn di kiŋ dɛn na di wɔl, di wan dɛn we gɛt ay pozishɔn, di ami kɔmanda dɛn, di jɛntriman dɛn, di wan dɛn we strɔng, ɔl di wan dɛn we na slev ɛn ɔl di wan dɛn we nɔto slev ayd insay kev dɛn ɛn midul di rɔk dɛn na di mawntin dɛn.
16 Ɛn dɛn bin de tɛl di mawntin dɛn ɛn di rɔk dɛn se: “Una fɔdɔm pan wi ɛn ayd wi mek di Wan we sidɔm na di tron nɔ si wi ɛn mek di Yɔŋ Ship in vɛksteshɔn nɔ kam pan wi,
17 bikɔs di big big de fɔ dɛn vɛksteshɔn dɔn kam, udat ebul fɔ tinap?”
Futnot Dɛn
^ Sil na waks we dɛn bin de yuz fɔ fasin skrol.
^ Rid Baybul Wɔd dɛn Minin.
^ Sil na waks we dɛn bin de yuz fɔ fasin skrol.
^ Sil na waks we dɛn bin de yuz fɔ fasin skrol.
^ Insay Grik, “Wan kwat.”
^ Wit na tin we pipul dɛn de it.
^ Na wan Roman silva kɔyn we dɛn bin de yuz fɔ pe pɔsin we i wok fɔ wan de.
^ Sil na waks we dɛn bin de yuz fɔ fasin skrol.
^ Ɔ “Ediz.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Sil na waks we dɛn bin de yuz fɔ fasin skrol.
^ Dis min dɛn blɔd, we tinap fɔ layf, we dɛn tɔn na di ɔlta. Rid Baybul Wɔd dɛn Minin.
^ Sil na waks we dɛn bin de yuz fɔ fasin skrol.
^ Sɔntɛm na got ia.
