Jems 2:1-26
2 Mi brɔda dɛn, fɔ se una gɛt fet pan wi Masta Jizɔs Krays we gɛt glori, dɔn una de tek wan pɔsin bɛtɛ pas ɔda pɔsin?
2 If wan man we wɛr gold riŋ dɛn na in finga dɛn ɛn wɛr fayn fayn klos kam na una mitin, dɔn wan poman we wɛr dɔti klos insɛf kam,
3 fɔ se una go gladi fɔ di wan we wɛr di fayn fayn klos ɛn tɛl am se, “Yu kam sidɔm na dis fayn ples,” dɔn una tɛl di poman se, “Yu kɔntinyu fɔ tinap” ɔ, “Sidɔm nia di smɔl bɛnch we a de put mi fut pan”?
4 If na so i bi, una nɔ dɔn tek wan grup bɛtɛ pas di ɔda grup, ɛn una nɔ dɔn bi jɔj dɛn we de jɔj wikɛd we?
5 Mi brɔda dɛn we a rili lɛk, una lisin. Gɔd bin pik di wan dɛn we pipul dɛn na di wɔl de si as po pipul dɛn fɔ mek dɛn rili gɛt fet ɛn gɛt di Kiŋdɔm, we i bin dɔn prɔmis di wan dɛn we lɛk am, nɔto so?
6 Bɔt una nɔ de ɔnɔ di po pipul dɛn. Nɔto di jɛntriman dɛn de mɔna una ɛn drɛg una go na lɔ kɔt?
7 Nɔto dɛn de tɔk bad bɔt di fayn nem we una gɛt?
8 If una de fala di Kiŋ in lɔ we de na di skripchɔ we se, “Yu fɔ lɛk yu neba lɛk aw yu lɛk yusɛf,” una rili de du fayn.
9 Bɔt if una kɔntinyu fɔ tek wan pɔsin bɛtɛ pas ɔda pɔsin, una de sin, ɛn di lɔ dɔn pruv se una de brok lɔ.
10 If ɛnibɔdi obe ɔl di Lɔ dɛn, bɔt i nɔ obe wan, i dɔn brok ɔl di Lɔ dɛn.
11 Di wan we se, “Yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin,” na in tɔk bak se, “Yu nɔ fɔ kil pɔsin.” If yu nɔ de lɛf yu man ɔ wɛf ɛn go du mami ɛn dadi biznɛs wit ɔda pɔsin, bɔt yu de kil pɔsin, yu dɔn brok di lɔ.
12 Una kɔntinyu fɔ de tɔk ɛn biev lɛk di wan dɛn we dɛn go jɔj wit di lɔ we de gi pipul dɛn fridɔm.
13 Di pɔsin we nɔ de sho se i gɛt sɔri-at, dɛn nɔ go sho am sɔri-at we dɛn de jɔj am. Sɔri-at pas jɔjmɛnt.
14 Mi brɔda dɛn, us bɛnifit de if pɔsin se i gɛt fet bɔt i nɔ de du natin? Da fet de nɔ go sev am, nɔto so?
15 If brɔda dɛn ɔ sista dɛn nɔ gɛt klos* ɛn bɛtɛ tin fɔ it fɔ di de,
16 bɔt wan pan una tɛl dɛn se, “Una go, mek ɔltin fayn fɔ una; mek una gɛt klos ɛn tin fɔ it,” bɔt una nɔ gi dɛn wetin dɛn nid fɔ dɛn bɔdi, aw dat go bɛnifit dɛn?
17 Semweso, if pɔsin gɛt fet bɔt i nɔ de du natin, in fet dɔn day.
18 Bɔt sɔmbɔdi go se: “Yu gɛt fet, ɛn mi gɛt tin dɛn we a de du. Sho mi yu fet we yu gɛt we i bi se yu nɔ de du natin, ɛn a go sho yu mi fet bay di tin dɛn we a de du.”
19 Yu biliv se na wan Gɔd de, nɔto so? Yu rili de du fayn. Bɔt di dimɔn dɛnsɛf biliv ɛn dɛn de trimbul.
20 E yu we nɔ no sɔntin, yu rili want fɔ no se pɔsin we gɛt fet bɔt we nɔ de du natin, in fet nɔ gɛt ɛni yus?
21 Nɔto bikɔs ɔf di tin dɛn we wi papa Ebraam du mek Gɔd tek am as pɔsin we de du wetin rayt na in yay afta i put in bɔypikin Ayzak na di ɔlta fɔ sakrifays am?
22 Yu si se in fet bin de go an-in-an wit di tin dɛn we i bin de du ɛn di tin dɛn we i bin de du mek in fet pafɛkt,
23 ɛn di tin we dɛn rayt na di skripchɔ apin. Dɛn bin rayt se: “Ebraam put fet pan Jiova,* ɛn bikɔs ɔf dat Gɔd tek am as pɔsin we de du wetin rayt,” ɛn dɛn kɔl am Jiova* in padi.
24 Una si se Gɔd de tɔk se pɔsin de du wetin rayt bikɔs ɔf di tin dɛn we i de du, nɔto jɔs bikɔs i gɛt fet.
25 Semweso, nɔto bikɔs ɔf di tin dɛn we da raregal we na Reab du we i tek kia ɔf di mɛsenja dɛn fayn fayn wan ɛn mek dɛn yuz ɔda rod fɔ go bak, mek Gɔd tɔk se insɛf na pɔsin we de du wetin rayt na in yay?
26 Fɔ tru, jɔs lɛk aw bɔdi we nɔ gɛt spirit insay am dɔn day, na so bak pɔsin we gɛt fet bɔt nɔ de du natin, in fet dɔn day.
