Mak 8:1-38
8 Dɛn tɛm dɛn de, bɔku bɔku pipul dɛn kam gɛda bak, ɛn dɛn nɔ bin gɛt ɛnitin fɔ it. So i kɔl in disaypul dɛn ɛn tɛl dɛn se:
2 “A de sɔri fɔ di pipul dɛn, bikɔs dɛn dɔn de wit mi fɔ tri dez ɛn dɛn nɔ gɛt natin fɔ it.
3 If a tɛl dɛn mek dɛn go na dɛn os we dɛn angri,* dɛn go fent na rod, ɛn sɔm pan dɛn de fa.”
4 Bɔt in disaypul dɛn aks am se: “Usay pɔsin go gɛt bred na dis ples we pipul dɛn nɔ de liv we go bɛlful dɛn pipul ya?”
5 Na de i aks dɛn se: “Ɔmɔs bred una gɛt?” Dɛn tɛl am se: “Na sɛvin bred.”
6 Dɔn i tɛl di pipul dɛn fɔ sidɔm na grɔn. I tek di sɛvin bred, ɛn tɛl Gɔd tɛnki, dɔn i brok brok dɛn ɛn bigin fɔ gi in disaypul dɛn, ɛn dɛn gi di pipul dɛn.
7 Ɛn dɛn bin gɛt smɔl smɔl fish dɛn we nɔ bɔku. I pre pan am ɛn tɛl dɛn fɔ gi di pipul dɛn.
8 So dɛn it ɛn bɛlful, ɛn we dɛn gɛda di balans we lɛf, i ful-ɔp sɛvin big baskɛt dɛn.
9 Na bin lɛk 4,000 man dɛn bin de de. Afta dat, i tɛl dɛn mek dɛn go.
10 Dɔn i go insay di bot wit in disaypul dɛn wantɛm wantɛm ɛn kam na wan eria we dɛn kɔl Dalmanuta.
11 We i rich de, di Faresi dɛn kam bigin agyu wit am. Dɔn fɔ tɛst am, dɛn se lɛ i sho dɛn sayn we de sho se na Gɔd sɛn am.
12 So i blo kam dɔŋ ɛn se: “Wetin mek dis jɛnɛreshɔn de luk fɔ sayn? Fɔ tru, a de tɛl una se dis jɛnɛreshɔn nɔ go si no sayn.”
13 Afta dat, i lɛf dɛn ɛn go insay di bot bak, ɛn go na di ɔdasay na di si.
14 Dɛn nɔ bin gɛt ɛnitin na di bot, pas wan bred nɔmɔ, bikɔs dɛn fɔgɛt fɔ go wit bred.
15 Ɛn i wɔn dɛn siriɔs wan se: “Una opin una yay ɛn tek tɛm wit di Faresi dɛn yist ɛn Ɛrɔd in yist.”
16 So di disaypul dɛn bigin fɔ agyu bikɔs dɛn nɔ kɛr bred go.
17 We i yɛri wetin dɛn de tɔk, i tɛl dɛn se: “Wetin mek una de agyu se una nɔ gɛt bred? Una nɔ de si wetin a de tray fɔ tɔk? Una nɔ stil ɔndastand yet?
18 ‘Pan ɔl we una gɛt yay, fɔ se una nɔ de si; ɛn pan ɔl we una gɛt yes, fɔ se una nɔ de yɛri?’ Una mɛmba
19 we a brok brok da fayv bred fɔ dɛn 5,000 man dɛn? Ɔmɔs baskɛt una ful-ɔp we una gɛda di balans we lɛf?” Dɛn tɛl am se: “Twɛlv.”
20 Na in Jizɔs aks dɛn se: “We a brok brok da sɛvin bred fɔ dɛn 4,000 man dɛn, ɔmɔs big baskɛt una ful-ɔp we una gɛda di balans we lɛf?” Dɛn tɛl am se: “Sɛvin.”
21 Na de i aks dɛn se: “Una stil nɔ ɔndastand yet?”
22 We dɛn rich na Bɛtseda, sɔm pipul dɛn kam wit wan blaynman to am ɛn beg am fɔ mek i tɔch am.
23 I ol di blaynman in an ɛn pul am kɔmɔt na di vilej. I pit na in yay ɛn le in an pan am ɛn aks am se: “Yu de si ɛnitin?”
24 Di man luk ɔp ɛn se: “A de si pipul dɛn, bɔt dɛn tan lɛk tik dɛn we de waka.”
25 I le in an bak na di man in yay, ɛn di man bigin fɔ si klia wan. Di man bin ebul fɔ si ɔltin fayn fayn wan.
26 So i tɛl di man fɔ go na in os, bɔt i tɛl am se: “Nɔ go insay di vilej.”
27 Jizɔs ɛn in disaypul dɛn go na di vilej dɛn na Sizeria Filipay. We dɛn bin de go, i aks in disaypul dɛn se: “Udat pipul dɛn se a bi?”
28 Dɛn tɛl am se: “Sɔm pipul dɛn se yu na Jɔn we Bin De Baptayz Pipul Dɛn, ɔda wan dɛn se yu na Ilayja, ɛn ɔda wan dɛn se yu na wan pan di prɔfɛt dɛn.”
29 Na de i aks dɛn se: “We una, udat una tink se a bi?” Pita ansa am se: “Yu na di Krays.”
30 Dɔn i tɛl dɛn siriɔs wan se mek dɛn nɔ tɛl ɛnibɔdi bɔt am.
31 Dɔn i bigin fɔ tɛl dɛn se mɔtalman Pikin go rili sɔfa, ɛn di lida dɛn, di edman dɛn fɔ di prist dɛn, ɛn di Lɔ ticha dɛn nɔ go biliv am, ɛn dɛn go kil am, bɔt i go gɛt layf bak di tɔd de.*
32 I tɔk dat bifo dɛn ɔl. Bɔt Pita kɛr am go na kɔna ɛn bigin fɔ tɔk pan am.
33 Na de i tɔn luk in disaypul dɛn ɛn tɔk pan Pita se: “Lɛf mi,* Setan! bikɔs yu nɔ de tink lɛk aw Gɔd de tink, yu de tink lɛk mɔtalman.”
34 I kɔl di krawd ɛn in disaypul dɛn ɛn tɛl dɛn se: “If ɛnibɔdi want fɔ fala mi, i nɔ fɔ du wetin in want, i fɔ es in tik we i go sɔfa pan,* ɛn kɔntinyu fɔ fala mi.
35 Ɛnibɔdi we want fɔ sev in layf* go lɔs am, bɔt ɛnibɔdi we lɔs in layf* fɔ mi sek ɛn fɔ di gud nyuz in sek go gɛt am bak.
36 Fɔ tru, us bɛnifit pɔsin go gɛt if i gɛt di wan ol wɔl ɛn lɔs in layf?*
37 Wetin rili mɔtalman go gi fɔ bay in layf?*
38 Ɛnibɔdi we shem fɔ bi mi disaypul ɔ we shem fɔ biliv mi wɔd na dis jɛnɛreshɔn we nɔ fetful ɛn we de sin, mɔtalman Pikin insɛf go shem fɔ kɔl da pɔsin de in disaypul we i kam wit in Papa in glori ɛn wit di oli enjɛl dɛn.”
Futnot Dɛn
^ Ɔ “de fast.”
^ Insay Grik, “afta tri dez.”
^ Insay Grik, “de biɛn mi.”
^ Rid Baybul Wɔd dɛn Minin.
^ Ɔ “sol.”
^ Ɔ “sol.”
^ Ɔ “sol.”
^ Ɔ “sol.”
