Romans 11:1-36
11 Mek a aks, Fɔ se Gɔd bin se i nɔ want in pipul dɛn igen? Nɔ-o! Misɛf sɛf na Izrɛlayt, mi na wan pan Ebraam in gret gret granpikin dɛn, ɛn a kɔmɔt na Bɛnjamin in trayb.
2 Gɔd nɔ se i nɔ want in pipul dɛn we i bin fɔs pe atɛnshɔn to. Fɔ se una nɔ no wetin di skripchɔ tɔk bɔt Ilayja, we i bin de beg Gɔd ɛn le di Izrɛlayt dɛn kɔmplen?
3 Ilayja se: “Jiova,* dɛn dɔn kil yu prɔfɛt dɛn, dɛn dɔn pwɛl yu ɔlta dɛn, na mi nɔmɔ dɔn lɛf, ɛn naw dɛn de tray fɔ tek mi layf.”*
4 Bɔt wetin Gɔd tɛl am? I tɛl am se: “A stil gɛt 7,000 man dɛn we nɔ nil dɔŋ to Beal.”
5 Semweso, insay dis tɛm bak, sɔm pipul dɛn de we lɛf, we Gɔd dɔn pik bikɔs ɔf in spɛshal gudnɛs.*
6 If na bikɔs ɔf Gɔd in spɛshal gudnɛs,* dat min se nɔto bikɔs ɔf wetin pɔsin de du; bikɔs if na dat, Gɔd in spɛshal gudnɛs* nɔ go bi spɛshal gudnɛs* igen.
7 Wetin naw wi go se? Izrɛl nɔ bin ebul fɔ gɛt di tin we i de rili fɛn, bɔt na di wan dɛn we Gɔd pik gɛt am. Di ɔda wan dɛn mek dɛn at strɔng,
8 jɔs lɛk aw dɛn rayt se: “Gɔd dɔn gi dɛn wan spirit we de mek dɛn slip dip wan, i dɔn gi dɛn yay we de mek dɛn nɔ ebul fɔ si ɛn yes we de mek dɛn nɔ ebul fɔ yɛri, te to dis de.”
9 Ɛn Devid insɛf tɔk se: “Lɛ dɛn tebul tɔn trap, mek i tan lɛk ston we dɛn de bɔk dɛn fut pan, ɛn bi pɔnishmɛnt fɔ dɛn.
10 Lɛ dɛn yay dak so dat dɛn nɔ go ebul fɔ si ɛn mek dɛn go de bɛn dɛn bak ɔltɛm.”
11 So a de aks, Fɔ se dɛn bɔk dɛn fut ɛn fɔdɔm ɛn nɔ ebul fɔ grap igen? Nɔ-o! Bɔt di bad we aw dɛn waka kam mek pipul dɛn na ɔda neshɔn dɛn sev, so dat dɛn go jɛlɔs.
12 If di bad we aw dɛn waka min jɛntri fɔ pipul dɛn na di wɔl ɛn we dɛn ridyus min jɛntri fɔ pipul dɛn na ɔda neshɔn dɛn, dat min se mɔ jɛntri go de we dɛn ɔl de!
13 Naw a de tɔk to una we kɔmɔt na ɔda neshɔn dɛn. Bikɔs mi na apɔsul we dɛn sɛn to ɔda neshɔn dɛn, a valyu di wok we a de du fɔ Gɔd
14 so dat a go si if a ebul fɔ mek mi pipul dɛn jɛlɔs ɛn sev sɔm pan dɛn.
15 If we Gɔd pul an pan dɛn, dat opin di we fɔ mek pipul dɛn gɛt pis wit Gɔd, wetin go apin we i tek dɛn bak? I go tan lɛk se dɛn gɛt layf bak.
16 Apat frɔm dat, if di pat pan di flawa we dɛn miks fɔ mek bred ɛn we dɛn tek as di fɔs tin we dɛn avɛst na sɔntin we oli, di wan ol bred oli; ɛn if di rut oli, di branch dɛn bak oli.
17 Bɔt if Gɔd brok sɔm pan di branch dɛn na di tik, ɛn i jɔyn yu pan di tik ɛn yu dɔn bɛnifit frɔm di ɔliv in rut, pan ɔl we yu na ɔliv we de gro na bush,
18 nɔ mek lɛk se yu bɛtɛ pas di branch dɛn. If yu de mek lɛk se yu bɛtɛ pas dɛn, mɛmba se nɔto yu tot di rut, na di rut tot yu.
19 Yu go tɔk se: “Gɔd brok branch dɛn fɔ mek i jɔyn mi.”
20 Na tru! I brok dɛn bikɔs dɛn nɔ bin gɛt fet, bɔt yu tinap bikɔs yu gɛt fet. Nɔ mek prawd, go de fred.
21 If natin nɔ bin stɔp Gɔd fɔ brok di rial branch dɛn, dat min se natin nɔ go stɔp am fɔ brok yu.
22 So tink bɔt Gɔd in gudnɛs ɛn in pɔnishmɛnt. Gɔd pɔnish di wan dɛn we fɔdɔm, bɔt if yu kɔntinyu fɔ du wetin go mek in gudnɛs de pan yu, i go gud to yu; if yu nɔ du dat, i go pul yusɛf kɔmɔt.
23 Ɛn if dɛn sho se dɛn gɛt fet, Gɔd go mek dɛn jɔyn bak, bikɔs i ebul jɔyn dɛn bak.
24 If Gɔd bin pul yu pan di ɔliv tik we de gro na bush ɛn jɔyn yu pan di ɔliv tik we de gro na gadin, pan ɔl we bɔku tɛm nɔto so i kin bi, dat min se i go rili izi fɔ am fɔ jɔyn di rial branch dɛn bak to dɛn yon ɔliv tik!
25 Mi brɔda dɛn, a want mek una no dis oli sikrit, so dat una nɔ go tink se una gɛt sɛns: Sɔm pipul dɛn na Izrɛl dɔn mek dɛn at strɔng. Dɛn go du dis te ɔl di pipul dɛn we Gɔd dɔn chuz na di neshɔn dɛn kam,
26 ɛn na dis we ɔl di Izrɛlayt dɛn go sev. Jɔs lɛk aw dɛn rayt se: “Di seviɔ go kɔmɔt na Zayɔn, ɛn i go mek Jekɔp lɛf di tin dɛn we Gɔd nɔ lɛk.
27 Ɛn na dis agrimɛnt a go mek wit dɛn we a pul dɛn sin dɛn kɔmɔt.”
28 We i kam to di gud nyuz, na tru se dɛn na Gɔd in ɛnimi dɛn fɔ una sek, bɔt we i kam to di chuz we Gɔd de chuz, i rili lɛk dɛn bikɔs ɔf dɛn gret gret granpa dɛn.
29 Gɔd nɔ go rigrɛt we i de gi gift ɛn kɔl sɔm pipul dɛn.
30 Jɔs lɛk aw una nɔ bin de obe Gɔd trade, bɔt naw i dɔn sɔri fɔ una, bikɔs dɛn nɔ de obe am,
31 na so dɛn wan ya naw nɔ de obe Gɔd, we dɔn mek Gɔd sɔri fɔ una, so dat i go sɔri fɔ dɛnsɛf naw.
32 Gɔd dɔn lɔk dɛn ɔl togɛda bikɔs dɛn nɔ de obe am, so dat i go sɔri fɔ dɛn ɔl.
33 Gɔd in jɛntri, in sɛns, ɛn di tin dɛn we i no, bɔku pasmak! I nɔ pɔsibul fɔ rili faynd awt bɔt in jɔjmɛnt dɛn, ɛn wi nɔ ebul fɔ ɔndastand in we dɛn!
34 “Udat dɔn no Jiova* in maynd, ɔ udat dɔn bi in advaysa?”
35 Ɔ “udat fɔs dɔn gi am sɔntin, we fɔ mek I pe am bak?”
36 Na frɔm am, na tru am, ɛn na fɔ am ɔltin de. Mek i gɛt di glori sote go. Emɛn.
Futnot Dɛn
^ Rid Baybul Wɔd dɛn Minin.
^ Ɔ “sol.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
