Ɛsta 2:1-23
2 Afta dɛn tin ya dɔn apin ɛn Kiŋ Aazuirɔs in at dɔn kol, i mɛmba wetin Vashtay bin dɔn du ɛn wetin dɛn bin disayd fɔ du to am.
2 Dɔn di kiŋ in pasɔnal savant dɛn tɛl am se: “Lɛ dɛn luk fɔ vajin dɛn we yɔŋ ɛn fayn fɔ di kiŋ.
3 Ɛn lɛ di kiŋ pik pipul dɛn na ɔl di prɔvins dɛn we i de rul fɔ lɛ dɛn briŋ ɔl di yɔŋ, fayn vajin dɛn na di pales* na Shushan.* Lɛ dɛn briŋ dɛn na di uman dɛn os. Ɛn lɛ Egaay, di man we dɛn kastret* we de wok fɔ di kiŋ ɛn we de in chaj ɔf di uman dɛn, tek kia ɔf dɛn, ɛn lɛ dɛn mek dɛn fayn mɔ.*
4 Ɛn di yɔŋuman we di kiŋ lɛk pas ɔl na in go tek Vashtay in ples as kwin.” Di kiŋ bin lɛk di advays, ɛn na dat i du.
5 Wan Ju bin de we de wok na di pales* na Shushan.* In nem na Mɔdikay. Mɔdikay na Jea in bɔypikin, Jea na Shimiay in bɔypikin, ɛn Shimiay na Kish, we na Bɛnjaminayt in bɔypikin,
6 we dɛn bin kapchɔ na Jerusɛlɛm wit di pipul dɛn we dɛn bin pul bay fos wit Kiŋ Jɛkonaya* na Juda, we Kiŋ Nɛbyukadnɛza na Babilɔn bin pul na di land.
7 Na in bin de tek kia ɔf Adasa,* dat na, Ɛsta we na in papa in brɔda in galpikin, bikɔs Ɛsta nɔ bin gɛt mama ɛn papa. Di yɔŋuman bin fayn ɛn gɛt fayn figɔ, ɛn we in mama ɛn papa day, Mɔdikay tek am as in yon galpikin.
8 We dɛn anawns di kiŋ in lɔ ɛn wetin i se ɛn we dɛn bin de kɛr go yɔŋuman dɛn na di pales* na Shushan* fɔ lɛ Egaay go kia fɔ dɛn, dɛn tek Ɛsta sɛf ɛn kɛr am go na di kiŋ in os fɔ go de ɔnda Egaay we de in chaj ɔf di uman dɛn.
9 Egaay bin gladi fɔ Ɛsta ɛn i bin lɛk in biznɛs, so i arenj wantɛm wantɛm fɔ lɛ dɛn mek i fayn mɔ,* wetin-ɛn-wetin i fɔ de it, ɛn i pik sɛvin yɔŋuman dɛn frɔm di kiŋ in os fɔ wok fɔ am. Dɔn i transfa Ɛsta ɛn in yɔŋ savant dɛn na di bɛst ples na di os usay di uman dɛn de.
10 Ɛsta nɔ se natin bɔt in pipul dɛn ɔ in fambul dɛn, bikɔs Mɔdikay bin dɔn tɛl am se lɛ i nɔ tɛl ɛnibɔdi.
11 Ɛnide Mɔdikay bin de go waka frɔnt di kɔmpawnd usay di uman dɛn os de fɔ no aw Ɛsta de du ɛn fɔ no wetin de apin to am.
12 Ɔl di uman dɛn bin de go to Kiŋ Aazuirɔs bay tɔn afta di 12 mɔnt we dɛn dɔn mek dɛn fayn mɔ, jɔs lɛk aw dɛn se dɛn fɔ du fɔ di uman dɛn. Na dis dɛn bin de du fɔ mek dɛn fayn mɔ*—fɔ siks mɔnt, dɛn bin de yuz ma* ɔyl ɛn di ɔda siks mɔnt, dɛn bin de yuz balsam ɔyl ɛn difrɛn kayn ɔyntmɛnt dɛn fɔ mek dɛn fayn mɔ.*
13 Afta dat, di yɔŋuman dɛn kin rɛdi fɔ go to di kiŋ. Ɛn ɛnitin we ɛniwan pan di uman dɛn aks fɔ, dɛn de gi am we i de kɔmɔt na di uman dɛn os fɔ go na di kiŋ in os.
14 Na ivintɛm i de go to di kiŋ ɛn mɔnintɛm i de tɔn bak na di sɛkɔn os usay di uman dɛn de, ɛn na Sheashgaz we dɛn kastret* we de wok fɔ di kiŋ ɛn we de in chaj ɔf di kiŋ in ɔda wɛf dɛn de kia fɔ dɛn. I nɔ go go to di kiŋ igen pas if di kiŋ bin rili lɛk am ɛn i sɛn kɔl am bay in nem.
15 We Ɛsta, dat na, Abiel we na Mɔdikay in ɔnkul in pikin, we Mɔdikay bin dɔn tek as in yon galpikin, in tɔn rich fɔ go to di kiŋ, i nɔ aks fɔ natin pas wetin Egaay we dɛn kastret* we de wok fɔ di kiŋ ɛn we de in chaj ɔf di uman dɛn se. (Ɔlman we bin de si Ɛsta bin lɛk in biznɛs.)
16 Dɛn bin kɛr go Ɛsta na Kiŋ Aazuirɔs in os insay di mɔnt we mek tɛn, dat na, di mɔnt we nem Tibɛt,* insay di ia we mek sɛvin we i de rul as kiŋ.
17 Ɛn di kiŋ kam fɔ lɛk Ɛsta pas ɔl di ɔda uman dɛn, ɛn i gladi fɔ am ɛn lɛk in biznɛs* pas ɔl di ɔda vajin dɛn. So i put di tin* we kwin dɛn kin wɛr na dɛn ed na Ɛsta in ed, ɛn i mek Ɛsta tek Vashtay in ples as kwin.
18 Ɛn di kiŋ mek big big pati fɔ ɔl in prins dɛn ɛn in savant dɛn. Na bin Ɛsta in pati. Dɔn i anawns se di prɔvins dɛn fri, ɛn di kiŋ kɔntinyu fɔ gi gift akɔdin to wetin i gɛt.
19 We dɛn bin de gɛda vajin* dɛn fɔ di sɛkɔn tɛm, Mɔdikay bin sidɔm na di kiŋ in get.
20 Ɛsta nɔ se natin bɔt in fambul dɛn ɛn in pipul dɛn, jɔs lɛk aw Mɔdikay bin dɔn tɛl am; Ɛsta kɔntinyu fɔ du wetin Mɔdikay se, jɔs lɛk aw i bin de du we i bin de ɔnda am.
21 Dɛn tɛm dɛn de we Mɔdikay bin de sidɔm na di kiŋ in get, Bigtan ɛn Tirɛsh, we na tu ɔfisa dɛn na di kiŋ in pales ɛn we na bin gaydman dɛn we de tinap na di domɔt, vɛks ɛn plan fɔ kil* Kiŋ Aazuirɔs.
22 Bɔt Mɔdikay kam fɔ no wetin dɛn want fɔ du, ɛn wantɛm wantɛm i bin tɛl Kwin Ɛsta. Dɔn Ɛsta tɛl di kiŋ se na Mɔdikay tɛl am.
23 So dɛn faynd awt bɔt dat ɛn kam fɔ no se na tru, ɛn dɛn ɛng ɔl tu di man dɛn pan tik; ɛn dɛn rayt ɔl dis bifo di kiŋ insay di istri buk.
Futnot Dɛn
^ Ɔ “di ples we dɛn de rili protɛkt.”
^ Ɔ “Susa.”
^ Ɔ “di okobo.”
^ Ɔ “ɛn lɛ dɛn masaj dɛn.”
^ Ɔ “di ples we dɛn de rili protɛkt.”
^ Ɔ “Susa.”
^ I min matul plant.
^ Ɔ “di ples we dɛn de rili protɛkt.”
^ Ɔ “Susa.”
^ Ɔ “fɔ lɛ dɛn de masaj am.”
^ Ɔ “fɔ masaj di uman dɛn.”
^ Ma na tin we gɛt fayn sɛnt.
^ Ɔ “fɔ masaj dɛn.”
^ Ɔ “we na okobo.”
^ Ɔ “we na okobo.”
^ Luk Apɛndiks B15.
^ Ɔ “i sho am lɔv we nɔ de chenj.”
^ Ɔ “di tɔban.”
^ Ɔ “yɔŋuman.”
^ Insay Ibru, “fɔ le an pan.”
