Ɛsta 5:1-14
5 Di tɔd de, Ɛsta wɛr in kwin klos ɛn go tinap na di kɔmpawnd we de insay na di say we di kiŋ in os* de, ɔpozit di kiŋ in os; da tɛm de di kiŋ bin sidɔm na in tron na in os. Di tron bin de ɔpozit di say we pɔsin de pas fɔ kam insay.
2 As di kiŋ si Kwin Ɛsta so we i tinap na di kɔmpawnd, i gladi, ɛn i pɔynt di gold staf we bin de na in an to Ɛsta. Na de Ɛsta go nia ɛn tɔch ɔntɔp di staf.
3 Di kiŋ aks am se: “Wetin apin, Kwin Ɛsta? Wetin yu want? Ivin if na af pat pan mi kiŋdɔm yu want, a go gi yu!”
4 Ɛsta ansa se: “If i ɔrayt wit di kiŋ, lɛ di kiŋ ɛn Eman kam tide ɛn it di fud we a dɔn mek fɔ yu.”
5 So di kiŋ tɛl in man dɛn se: “Una tɛl Eman fɔ kam kwik jɔs lɛk aw Ɛsta se.” So di kiŋ ɛn Eman go it di fud we Ɛsta dɔn mek.
6 We dɛn de drink wayn, di kiŋ aks Ɛsta se: “Wetin yu want fɔ aks fɔ? Tɛl mi, a go du am fɔ yu! Wetin yu want? Ivin if yu want af pat pan mi kiŋdɔm, a go gi yu!”
7 Ɛsta ansa se: “Di tin we a want fɔ aks fɔ ɛn di tin we a want na,
8 if di kiŋ gladi fɔ mi ɛn if i ɔrayt wit di kiŋ fɔ gi mi wetin a want fɔ aks fɔ ɛn du wetin a want, lɛ di kiŋ ɛn Eman kam it di fud we a go mek tumara; ɛn tumara a go tɛl di kiŋ wetin a want fɔ tɛl am.”
9 Da de de we Eman de go, i bin gladi ɛn in at bin swit. Bɔt we Eman si Mɔdikay na di kiŋ in get ɛn notis se i nɔ grap ɛn trimbul bifo am, Eman vɛks bad bad wan pan Mɔdikay.
10 Bɔt Eman kɔntrol insɛf ɛn go na in os. Dɔn i sɛn kɔl in padi dɛn ɛn Zirɛsh we na in wɛf.
11 Eman bost bɔt di jɛntri we i jɛntri pasmak, ɛn bɔt di bɔku bɔypikin dɛn we i gɛt, ɛn aw di kiŋ dɔn promot am ɛn gi am ay pozishɔn pas ɔl di kiŋ in prins dɛn ɛn savant dɛn.
12 Eman tɔk bak se: “Apat frɔm dat, na mi wangren Kwin Ɛsta invayt fɔ go wit di kiŋ fɔ go it di fud we i bin dɔn mek. I invayt mi bak tumara fɔ go it wit in ɛn di kiŋ.
13 Bɔt ɔl dis nɔ de satisfay mi as lɔng as a de si Mɔdikay, da Ju, sidɔm na di kiŋ in get.”
14 So Zirɛsh we na in wɛf ɛn ɔl in padi dɛn tɛl am se: “Lɛ dɛn put tik, we in ayt na 50 kyubit.* Ɛn na mɔnin tɛl di kiŋ se dɛn fɔ ɛng Mɔdikay de. Dɔn go wit di kiŋ ɛn go ɛnjɔy di fud.” Eman bin lɛk wetin dɛn tɛl am, so i mek dɛn put di tik.
