Ɛsta 8:1-17
8 Da de de Kiŋ Aazuirɔs gi Kwin Ɛsta ɔl wetin Eman we na di Ju dɛn ɛnimi bin gɛt; ɛn Mɔdikay kam bifo di kiŋ, bikɔs Ɛsta bin dɔn tɛl am se dɛn ɔl tu na fambul.
2 Dɔn di kiŋ pul in riŋ we i de yuz fɔ stamp we i bin dɔn tek na Eman in an ɛn gi am to Mɔdikay. Ɛn Ɛsta put Mɔdikay in chaj ɔf ɔl wetin Eman bin gɛt.
3 Pantap dat, Ɛsta tɔk to di kiŋ bak. I fɔdɔm na in fut ɛn kray ɛn beg am fɔ lɛ i stɔp di bad tin we Eman di Agagayt bin dɔn plan fɔ di Ju dɛn.
4 Di kiŋ pɔynt di gold staf to Ɛsta, na de Ɛsta grap ɛn tinap bifo di kiŋ.
5 Ɛsta tɔk se: “If i ɔrayt wit di kiŋ ɛn if di kiŋ gladi fɔ mi, ɛn if i fayn na di kiŋ in yay ɛn di kiŋ lɛk mi, lɛ dɛn rayt ɔda fɔ kansul di dɔkyumɛnt dɛn we Eman we bin plan bad ɛn we na Amɛdeta di Agagayt in bɔypikin, bin rayt fɔ dɔnawe wit di Ju dɛn na ɔl di kiŋ in prɔvins dɛn.
6 Aw a go ebul fɔ bia we a si di trɔbul we go mit mi pipul dɛn, ɛn aw a go ebul fɔ bia we a si dɛn de kil mi fambul dɛn?”
7 So Kiŋ Aazuirɔs tɛl Kwin Ɛsta ɛn Mɔdikay we na Ju se: “Luk! A dɔn gi ɔltin we Eman gɛt to Ɛsta ɛn a dɔn mek dɛn ɛng am pan tik, bikɔs i bin plan fɔ atak di Ju dɛn.
8 Una rayt ɛnitin we una tink se gud fɔ di Ju dɛn; una rayt de se na di kiŋ rayt am ɛn una sil am wit di kiŋ in riŋ we i de yuz fɔ stamp, bikɔs ɛni lɔ we dɛn rayt de se na di kiŋ rayt am ɛn dɛn sil am wit di kiŋ in riŋ we i de yuz fɔ stamp, dɛn nɔ de chenj am.”
9 So insay di tɔd mɔnt, dat na, di mɔnt we nem Sayvan,* di de we mek 23, dɛn kɔl di kiŋ in sɛktri dɛn ɛn dɛn rayt ɔl wetin Mɔdikay tɛl di Ju dɛn, di setrap* dɛn, di gɔvnɔ dɛn, ɛn di prins dɛn na di prɔvins dɛn we de frɔm India to Itiopia, 127 prɔvins dɛn. Dɛn rayt to ɔl di prɔvins dɛn akɔdin to aw dɛn de rayt na da prɔvins de ɛn dɛn rayt to ɔl di pipul dɛn insay dɛn yon langwej ɛn dɛn rayt to di Ju dɛn akɔdin to aw di Ju dɛn de rayt ɛn insay dɛn yon langwej.
10 Mɔdikay rayt de se na Kiŋ Aazuirɔs rayt am, ɛn i sil am wit di kiŋ in riŋ we i de yuz fɔ stamp. Dɔn i gi di dɔkyumɛnt dɛn to mɛsenja dɛn we de rayd ɔs. Dɛn rayd ɔs dɛn we dɛn mɛn fɔ wok fɔ di kiŋ. Di ɔs dɛn gɛt spid, ɛn dɛn kin yuz dɛn fɔ go lɛf mɛsej.
11 Insay dɛn dɔkyumɛnt dɛn ya, di kiŋ alaw di Ju dɛn na ɔl di difrɛn siti dɛn fɔ gɛda togɛda ɛn fɛt fɔ dɛn layf* ɛn fɔ kil, wep, ɛn dɔnawe wit ɔl di pipul dɛn ɔ prɔvins we go atak dɛn, ilɛksɛf na uman dɛn ɛn pikin dɛn, ɛn dɛn fɔ siz dɛn prɔpati dɛn.
12 Dis fɔ apin di sem de na ɔl di prɔvins dɛn we Kiŋ Aazuirɔs de rul, di de we mek 13 insay di mɔnt we mek 12, dat na, di mɔnt we nem Eda.*
13 Di tin we dɛn rayt na di dɔkyumɛnt fɔ bi lɔ na ɔl di prɔvins dɛn. Dɛn fɔ anawns am to ɔl di pipul dɛn, so dat di Ju dɛn go rɛdi da de de fɔ fɛt dɛn ɛnimi dɛn.
14 Di mɛsenja dɛn we de rayd di kiŋ in ɔs dɛn we dɛn kin yuz fɔ sɛn mɛsej go kwik kwik wan wit spid jɔs lɛk aw di kiŋ se. Dɛn anawns di lɔ bak na di pales* we de na Shushan.*
15 We Mɔdikay de kɔmɔt bifo di kiŋ, i bin wɛr blu ɛn wayt linin klos, di kayn we pɔsin we de wok nia di kiŋ kin wɛr. I bin wɛr wan wɔndaful gold krawn ɛn wan gawn we dɛn mek wit fayn matirial ɛn pɔpul wul. Ɛn di pipul dɛn na di siti na Shushan* ala wit gladi-at.
16 Di Ju dɛn at bin kam dɔŋ* ɛn dɛn bin gladi pasmak ɛn pipul dɛn bin de rɛspɛkt dɛn.
17 Ɛn na ɔl di prɔvins dɛn ɛn na ɔl di siti dɛn, ɛnisay we di kiŋ in lɔ ɛn in ɔda rich, di Ju dɛn bin de gladi pasmak, dɛn bin de mek pati ɛn sɛlibret. Bɔku pan di pipul dɛn na di land bin de se dɛn na Ju, bikɔs dɛn bin de fred di Ju dɛn.
Futnot Dɛn
^ Luk Apɛndiks B15.
^ Rid Baybul Wɔd dɛn Minin.
^ Ɔ “sol.”
^ Luk Apɛndiks B15.
^ Ɔ “di ples we dɛn de rili protɛkt.”
^ Ɔ “Susa.”
^ Ɔ “Susa.”
^ Insay Ibru, “Di Ju dɛn bin gɛt layt.”
