Ɛzra 5:1-17
5 Dɔn prɔfɛt Egay ɛn Zakaraya, we na Ido in granpikin, prɔfɛsay as mɛsenja dɛn to di Ju dɛn we de na Juda ɛn Jerusɛlɛm bɔt di Gɔd na Izrɛl we de oba dɛn.
2 Na da tɛm de Zɛrubabɛl we na Shialtiɛl in bɔypikin ɛn Jɛshwa we na Jɛɔzadak in bɔypikin bigin fɔ bil Gɔd in os bak, we bin de na Jerusɛlɛm; ɛn Gɔd in prɔfɛt dɛn bin de wit dɛn ɛn de sɔpɔt dɛn.
3 Da tɛm de Tatenay di gɔvnɔ na di eria Biɛn di Riva ɛn Shita-bɔzinay ɛn dɛn kɔmpin dɛn kam ɛn aks dɛn se: “Udat tɛl una fɔ bil dis os ɛn fɔ dɔn fɔ mek dɛn bim ya?”
4 Dɔn dɛn aks dɛn se: “Udat na di man dɛn we de du dis bildin wok?”
5 Bɔt Gɔd bin de wit* di bigman dɛn fɔ di Ju pipul dɛn, ɛn dɛn nɔ stɔp dɛn, bɔt dɛn sɛn lɛta to Darayɔs ɛn wet te di kiŋ sɛn lɛta bak to dɛn bɔt dis.
6 Na dis bin de na di lɛta we Tatenay we na di gɔvnɔ na di eria we de Biɛn di Riva ɛn Shita-bɔzinay ɛn in kɔmpin dɛn, di dɛpiti gɔvnɔ dɛn na di eria Biɛn di Riva sɛn to Kiŋ Darayɔs;
7 dɛn sɛn di ripɔt to am, ɛn na dis dɛn rayt:
“To Kiŋ Darayɔs:
“Mek yu gɛt kolat!
8 Wi want lɛ di kiŋ no se wi go na di prɔvins na Juda na di gret Gɔd in os, ɛn dɛn de bil am wit big ston dɛn we dɛn de rol fɔ put na dɛn ples, ɛn wit bod dɛn we dɛn put na di wɔl dɛn. Di pipul dɛn gɛt zil fɔ du di wok ɛn di wok de go bifo bikɔs ɔf wetin dɛn de du.
9 Dɔn wi aks di bigman dɛn se: ‘Udat tɛl una fɔ bil dis os ɛn fɔ dɔn fɔ mek dɛn bim ya?’
10 Wi aks dɛn bak fɔ dɛn nem dɛn so dat wi go rayt am ɛn mek yu no di nem ɔf di wan dɛn we de bifo pan di wok.
11 “Na dis ansa dɛn bin gi to wi: ‘Wi na di Gɔd we de rul na ɛvin ɛn di wɔl in savant dɛn, ɛn dis os we wi de bil bak na wan we dɛn bin dɔn bil lɔng lɔng tɛm; na wan gret kiŋ na Izrɛl bin stat ɛn dɔn fɔ bil am.
12 Bɔt bikɔs wi gret gret granpa dɛn bin mek di Gɔd we de rul na ɛvin vɛks, i lɛf dɛn na Nɛbyukadnɛza in an we na bin di kiŋ na Babilɔn, ɛn we na Kaldian. Na Nɛbyukadnɛza pwɛl dis os ɛn kɛr di pipul dɛn go na Babilɔn.
13 Bɔt insay di fɔs ia we Kiŋ Sayrɔs na Babilɔn de rul, i bin se mek dɛn bil Gɔd in os bak.
14 Apat frɔm dat, Kiŋ Sayrɔs bin pul kɔmɔt na di tɛmpul na Babilɔn di gold ɛn silva kɔntena dɛn we bin de na Gɔd in os, dat na, di wan dɛn we Nɛbyukadnɛza bin tek na di tɛmpul na Jerusɛlɛm ɛn ker dɛn go na di tɛmpul na Babilɔn. Dɛn bin gi dɛn to wan man we nem Shɛshbaza,* we Sayrɔs bin mek gɔvnɔ.
15 Sayrɔs tɛl am se: “Tek dɛn kɔntena dɛn ya ɛn kɛr dɛn go na Jerusɛlɛm, so dat dɛn go put dɛn bak na di tɛmpul we na Gɔd in os we dɛn go bil bak na di ples we i bin de.”
16 Dɔn dis Shɛshbaza kam, ɛn i le di fawndeshɔn dɛn fɔ Gɔd in os, we de na Jerusɛlɛm; ɛn wi dɔn de bil am frɔm da tɛm de te naw, bɔt wi nɔ dɔn am yet.’
17 “So if i ɔrayt wit di kiŋ, lɛ i mek dɛn chɛk na di say we dɛn de kip di kiŋ in valyu tin dɛn ɛn dɔkyumɛnt dɛn na Babilɔn, fɔ no if Kiŋ Sayrɔs bin tɛl dɛn fɔ bil Gɔd in os bak na Jerusɛlɛm; ɛn lɛ di kiŋ mek wi no wetin i disayd bɔt dis.”
