1 Jɔn 3:1-24
3 Luk di kayn we we di Papa dɔn sho se i lɛk wi, we i dɔn mek dɛn de kɔl wi Gɔd in pikin dɛn! Ɛn na dat wi bi. Na dat mek di wɔl nɔ no wi, bikɔs i nɔ no Gɔd.
2 Di wan dɛn we a rili lɛk, wi na Gɔd in pikin dɛn naw, bɔt dɛn nɔ sho wi yet wetin wi gɛt fɔ bi. Bɔt wi no se we i go apia wi go tan lɛk am, bikɔs wi go si am jɔs lɛk aw i de.
3 Ɛn ɛnibɔdi we abop pan am de klin insɛf, jɔs lɛk aw da pɔsin de klin.
4 Ɛnibɔdi we dɔn mek am abit fɔ sin na pɔsin we de brok lɔ, ɛn sin na we pɔsin brok lɔ.
5 Una no bak se i bin apia fɔ pul wi sin dɛn kɔmɔt; ɛn i nɔ gɛt wan sin.
6 Ɛnibɔdi we kɔntinyu fɔ gɛt wanwɔd wit am nɔ de mek am abit fɔ sin; ɛnibɔdi we de mek am abit fɔ sin nɔ si am yet ɛn nɔ no am.
7 Smɔl pikin dɛn, una nɔ alaw ɛnibɔdi fɔ ful una; di wan we de kɔntinyu fɔ du wetin rayt na pɔsin we nɔ gɛt wan blem, jɔs lɛk aw da pɔsin de de du wetin rayt.
8 Di wan we dɔn mek am abit fɔ sin kɔmɔt frɔm di Dɛbul, bikɔs di Dɛbul dɔn de sin frɔm di biginin.* Na dis mek Gɔd in Pikin bin apia, fɔ pwɛl pwɛl di tin dɛn we di Dɛbul de du.
9 Ɛnibɔdi we na Gɔd in pikin nɔ de mek am abit fɔ sin, bikɔs In sid* stil de insay da pɔsin de; ɛn i nɔ go mek am abit fɔ sin, bikɔs in na Gɔd in pikin.
10 Na dis we pɔsin go no Gɔd in pikin dɛn ɛn di Dɛbul in pikin dɛn: Ɛnibɔdi we nɔ de kɔntinyu fɔ du wetin rayt nɔ kɔmɔt frɔm Gɔd, ɛn di wan we nɔ lɛk in brɔda insɛf nɔ kɔmɔt frɔm Gɔd.
11 Dis na di mɛsej we una bin dɔn yɛri frɔm di biginin, fɔ se wi fɔ lɛk wi kɔmpin dɛn;
12 wi nɔ fɔ tan lɛk Ken we kɔmɔt frɔm di wikɛd wan ɛn kil in brɔda. Wetin mek i kil am? Bikɔs na wikɛd tin dɛn i bin de du, bɔt in brɔda bin de du wetin rayt.
13 Mi brɔda dɛn, una nɔ sɔ- prayz we di wɔl et una.
14 Wi no se wi bin dɔn day bɔt naw wi dɔn gɛt layf bak, bikɔs wi lɛk di brɔda dɛn. Di wan we nɔ gɛt lɔv go kɔntinyu fɔ bi dayman.
15 Ɛnibɔdi we et in brɔda na pɔsin we de kil, ɛn una no se ɛnibɔdi we de kil pɔsin nɔ go gɛt layf we go de sote go.
16 Wi ebul fɔ no wetin na lɔv bikɔs da pɔsin de gi in layf* fɔ wi, ɛn wisɛf fɔ rɛdi fɔ gi wi layf* fɔ wi brɔda dɛn.
17 Bɔt if ɛnibɔdi gɛt prɔpati dɛn na dis wɔl ɛn si se in brɔda nid sɔntin, bɔt i nɔ gri fɔ sho se i gɛt sɔri-at fɔ am, aw i go se i lɛk Gɔd?
18 Smɔl pikin dɛn, wi nɔ fɔ jɔs tɔk se wi gɛt lɔv, bɔt wi fɔ sho dat bay di tin dɛn we wi de du ɛn wi fɔ du am wit klinat.
19 Na dis go mek wi no se wi de sɔpɔt di trut, ɛn wi go gi wisɛf* kɔnfidɛns bifo am
20 ilɛk wetin wi at go kɔndɛm wi pan, bikɔs Gɔd pas wi at ɛn i no ɔltin.
21 Di wan dɛn we a rili lɛk, if wi at nɔ kɔndɛm wi, dat min se wi de fil fri fɔ tɔk to Gɔd;
22 ɛn ɛnitin we wi aks fɔ i de gi wi, bikɔs wi de obe in lɔ dɛn, ɛn wi de du wetin fayn na in yay.
23 Fɔ tru, na in lɔ dis: fɔ mek wi gɛt fet pan in Pikin Jizɔs Krays in nem ɛn fɔ mek wi lɛk wi kɔmpin dɛn, jɔs lɛk aw i dɔn gi wi lɔ.
24 Pantap dat, di wan we de obe in lɔ dɛn stil gɛt wanwɔd wit am, ɛn insɛf gɛt wanwɔd wit da pɔsin de. Ɛn di spirit we i dɔn gi wi mek wi no se i stil gɛt wanwɔd wit wi.
Futnot Dɛn
^ Ɔ “frɔm we i bigin.”
^ Dat na, sid we de bia frut.
^ Ɔ “sol.”
^ Ɔ “sol.”
^ Insay Grik, “wi at.”
