1 Jɔn 5:1-21
5 Ɛnibɔdi we biliv se Jizɔs na di Krays, na Gɔd in pikin, ɛn ɛnibɔdi we lɛk di wan we de gi layf lɛk In pikin dɛn bak.
2 Wi go no se wi lɛk Gɔd in pikin dɛn we wi lɛk Gɔd ɛn obe in lɔ dɛn.
3 Fɔ lɛk Gɔd min se wi fɔ obe in lɔ dɛn; ɛn in lɔ dɛn nɔto ɛvi lod,
4 bikɔs ɛnibɔdi we na Gɔd in pikin* de win di wɔl. Ɛn di tin we dɔn mek wi win di wɔl na wi fet.
5 Udat ebul fɔ win di wɔl? Nɔto di wan we gɛt fet se Jizɔs na Gɔd in Pikin?
6 Jizɔs Krays na di wan we kam wit wata ɛn blɔd. I nɔ kam wit di wata nɔmɔ, bɔt i kam wit di wata ɛn wit di blɔd. Ɛn di spirit de tɔk bɔt dat bikɔs di spirit na di trut.
7 Na tri witnɛs dɛn de:
8 di spirit, di wata, ɛn di blɔd; ɛn dɛn tri gɛt wanwɔd.
9 If wi tek wetin mɔtalman de tɔk, wetin Gɔd de tɔk pas am. Bikɔs Gɔd insɛf sɛf de tɔk bɔt in Pikin.
10 Di pɔsin we gɛt fet pan Gɔd in Pikin dɔn kip wetin Gɔd tɔk na in at. Di pɔsin we nɔ gɛt fet pan Gɔd dɔn mek i bi layman, bikɔs i nɔ gɛt fet pan di tin we Gɔd tɔk bɔt in Pikin.
11 Ɛn di tin we Gɔd tɔk, na dat i gi wi layf we go de sote go, ɛn dis layf de insay in Pikin.
12 Di wan we gɛt wanwɔd wit di Pikin gɛt dis layf; di wan we nɔ gɛt wanwɔd wit Gɔd in Pikin nɔ gɛt dis layf.
13 A de rayt to una dɛn tin ya so dat una go no se una gɛt layf we go de sote go, una we gɛt fet pan Gɔd in Pikin in nem.
14 Dis na di kɔnfidɛns we wi gɛt pan am se ilɛk wetin wi aks am fɔ, wans na dat i want, i de yɛri wi.
15 Ɛn if wi no se i de yɛri wi ilɛk wetin wi aks am fɔ, wi no se wi go gɛt di tin dɛn we wi aks am fɔ, bikɔs wi dɔn aks am fɔ dɛn tin dɛn de.
16 If ɛnibɔdi si in brɔda de sin, bɔt da sin de nɔ de mek pɔsin day, i kin beg Gɔd, ɛn Gɔd go gi am layf, dat na fɔ di wan dɛn we nɔ put an pan sin we de mek pɔsin day. Sin de we de mek pɔsin day. Na da sin de a nɔ tɛl am fɔ beg fɔ.
17 Ɔltin we nɔ rayt na sin, bɔt sin de we nɔ de mek pɔsin day.
18 Wi no se ɛnibɔdi we na Gɔd in pikin nɔ de mek am abit fɔ sin, bɔt di wan we na Gɔd in Pikin* de wach am, ɛn di wikɛd wan nɔ ebul fɔ du am natin.
19 Wi no se na frɔm Gɔd wi kɔmɔt, bɔt di wan ol wɔl de na di wikɛd wan in an.
20 Bɔt wi no se Gɔd in Pikin dɔn kam, ɛn i dɔn mek wi ɔndastand so dat wi go no bɔt di tru Gɔd. Ɛn wi gɛt wanwɔd wit di tru Gɔd, tru in Pikin Jizɔs Krays. Dis na di tru Gɔd ɛn di wan we de gi layf we go de sote go.
21 Smɔl pikin dɛn, una nɔ gɛt ɛnitin fɔ du wit aydɔl dɛn.
