1 Kɔrintians 11:1-34
11 Una falamakata mi, jɔs lɛk aw a de falamakata Krays.
2 A de tɛl una tɛnki bikɔs una de mɛmba mi pan ɔltin ɛn una de du di tin dɛn we a bin tich una jɔs lɛk aw a bin lan una.
3 Bɔt a want mek una no se di pɔsin we de oba man dɛn na di Krays, di pɔsin we de oba uman na di man, ɛn di pɔsin we de oba di Krays na Gɔd.
4 Ɛni man we gɛt sɔntin na in ed we i de pre ɔ we i de tɔk lɛk prɔfɛt dɔn mek di wan we de oba am* shem;
5 bɔt ɛni uman we nɔ kɔba in ed we i de pre ɔ we i de tɔk lɛk prɔfɛt dɔn mek di wan we de oba am* shem, bikɔs i go jɔs tan lɛk uman we krep in ed.
6 If uman nɔ kɔba in ed, i fɔ kɔt in ia; bɔt if na shemful tin fɔ lɛ uman kɔt in ia ɔ krep in ed, i fɔ kɔba in ed.
7 Man nɔ fɔ kɔba in ed, bikɔs Gɔd mek am lɛk aw i tan ɛn i de briŋ ɔnɔ to Gɔd, bɔt di uman de mek man gɛt ɔnɔ.
8 Man nɔ kɔmɔt frɔm uman, bɔt uman kɔmɔt frɔm man.
9 Apat frɔm dat, Gɔd nɔ mek man fɔ uman in sek, bɔt i mek uman fɔ man in sek.
10 Na dat mek uman fɔ gɛt sɔntin na in ed fɔ sho se sɔmbɔdi de oba am, bikɔs ɔf di enjɛl dɛn.
11 Apat frɔm dat, we i kam pan di Masta in biznɛs, uman nɔ go de if man nɔ de ɛn man nɔ go de if uman nɔ de.
12 Jɔs lɛk aw di uman kɔmɔt frɔm di man, na so sɛf di man kam tru di uman; bɔt ɔltin kɔmɔt frɔm Gɔd.
13 Una jɔj fɔ unasɛf: Una tink se i fayn fɔ mek uman pre to Gɔd we i nɔ kɔba in ed?
14 Fɔ se di we aw Gɔd mek mɔtalman nɔ sho una se na disgres fɔ mek man gɛt lɔng ia,
15 bɔt if uman gɛt lɔng ia na prez fɔ am? Na ia Gɔd gi am fɔ kɔba in ed.
16 Bɔt if ɛnibɔdi want fɔ agyu fɔ sɔpɔt ɔda kɔstɔm, wi nɔ gɛt ɔda wan, ɛn Gɔd in kɔngrigeshɔn dɛnsɛf nɔ gɛt ɔda wan.
17 We a de tɛl una dɛn tin ya, a nɔ de tɛl una tɛnki, bikɔs we una kam togɛda nɔto fɔ ɛp unasɛf, na fɔ ambɔg unasɛf mɔ ɛn mɔ.
18 Fɔs a yɛri se we una kam togɛda as kɔngrigeshɔn, una nɔ kin gɛt wanwɔd, ɛn a biliv se sɔm tru de insay wetin a yɛri.
19 Una go mɔs dɔn mek smɔl smɔl grup dɛn, so dat dɛn go no di wan dɛn pan una we de du wetin Gɔd want.
20 We una gɛda na wan ples nɔto fɔ rili it di Masta in Ivintɛm It.
21 We una kam fɔ it am, una kin dɔn it una yon ivintɛm it fɔs, ɛn dat kin mek sɔm dɛn angri ɛn ɔda wan dɛn chak.
22 Una nɔ gɛt os dɛn fɔ it ɛn drink? Ɔ fɔ se una nɔ tek Gɔd in kɔngrigeshɔn mek natin, ɛn una de mek di wan dɛn we nɔ gɛt natin shem? Wetin a go tɛl una? A fɔ tɛl una tɛnki? A nɔ de tɛl una tɛnki fɔ dis.
23 Wetin di Masta tɛl mi na in a dɔn tɛl una. Di nɛt we sɔmbɔdi bin ɛp pipul dɛn fɔ arɛst di Masta Jizɔs, Jizɔs tek wan bred,
24 ɛn we i dɔn fɔ tɛl Gɔd tɛnki, i brok am ɛn se: “Dis min mi bɔdi, we a go gi fɔ una sek. Una go de du dis fɔ mɛmba mi.”
25 I du di sem tin wit di kɔp afta dɛn it di ivintɛm it ɛn tɔk se: “Dis kɔp min di nyu agrimɛnt we mi blɔd go mek ol wata. Una go de du dis, ɛnitɛm we una drink am, fɔ mɛmba mi.”
26 Ɛnitɛm we una it dis bred ɛn drink pan dis kɔp, una go de tɔk bɔt di Masta in day wan te i kam.
27 So ɛnibɔdi we it di bred ɔ drink pan di Masta in kɔp we i nɔ fit fɔ du dat, dɔn sin bikɔs i nɔ sho rɛspɛkt fɔ di Masta in bɔdi ɛn in blɔd.
28 Fɔs pɔsin fɔ chɛk insɛf gud gud wan fɔ mek shɔ se i fit fɔ du dat, na da tɛm de nɔmɔ i fɔ it di bred ɛn drink pan di kɔp.
29 Ɛnibɔdi we it ɛn drink we i nɔ no wetin di bɔdi min de briŋ jɔjmɛnt pan insɛf.
30 Na dat mek bɔku pan una wik ɛn sik ɛn plɛnti pan una dɔn day.*
31 Bɔt if wi no di kayn pɔsin we wi bi, wi nɔ go briŋ jɔjmɛnt pan wisɛf.
32 Bɔt we Jiova* jɔj wi, i de kɔrɛkt wi so dat i nɔ go kɔndɛm wi wit di wɔl.
33 So, mi brɔda dɛn, we una gɛda fɔ it am, una wet fɔ una kɔmpin dɛn.
34 If ɛnibɔdi angri, lɛ i it na os, so dat we una kam togɛda, una nɔ go briŋ jɔjmɛnt pan unasɛf. Bɔt fɔ di ɔda tin dɛn we lɛf, a go sɛtul dɛn we a kam de.
Futnot Dɛn
^ Insay Grik, “in ed.”
^ Insay Grik, “in ed.”
^ We min se dɛn dɔn day na Gɔd in yay.
^ Rid Baybul Wɔd dɛn Minin.
