1 Kɔrintians 3:1-23
3 So, mi brɔda dɛn, a nɔ bin ebul fɔ tɔk to una lɛk pipul dɛn we de du wetin di spirit want, bɔt a tɔk to una lɛk pipul dɛn we de du wetin dɛn bɔdi want, lɛk yɔŋbebi dɛn we i kam pan Krays in biznɛs.
2 Na milk a bin de fid una wit, nɔto ɛvi fud, bikɔs una nɔ bin dɔn strɔng bɛtɛ yet. Infakt, una stil nɔ strɔng bɛtɛ yet,
3 bikɔs una stil de du wetin di bɔdi want. We una de jɛlɔs unasɛf ɛn mek plaba, dat min se una de du wetin una bɔdi want ɛn una de waka lɛk mɔtalman, nɔto so?
4 We wan pɔsin se, “A de fɔ Pɔl,” bɔt ɔda wan de se, “Mi de fɔ Apɔlɔs,” nɔto lɛk ɔdinari mɔtalman una de biev?
5 So udat na Apɔlɔs? Udat na Pɔl? Na savant dɛn we ɛp una fɔ biliv di Masta, jɔs lɛk aw di Masta dɔn gi ɔlman in wok.
6 A plant, Apɔlɔs wata, bɔt na Gɔd de mek i gro,
7 so di wan we plant ɛn di wan we wata nɔ min natin, bɔt na Gɔd we de mek i gro fɔ gɛt di prez.
8 Di wan we plant ɛn di wan we wata na wan,* bɔt ɔlman go gɛt in yon pe akɔdin to aw i wok.
9 Wi na Gɔd in kɔmpin wokman dɛn. Una na Gɔd in fam we i de wok pan, Gɔd in bildin.
10 Bikɔs Gɔd in spɛshal gud- nɛs* de pan mi, a le wan fawndeshɔn lɛk pɔsin we rili sabi bil, bɔt ɔda pɔsin de bil pan am. Bɔt lɛ ɔlman go de wach aw i de bil pan am.
11 Nɔbɔdi nɔ ebul le ɛni ɔda fawndeshɔn apat frɔm di wan we dɔn ɔlrɛdi de, we na Jizɔs Krays.
12 If ɛnibɔdi yuz gold, silva, ston dɛn we gɛt valyu, wud, ɔ difrɛn gras dɛn fɔ bil pan di fawndeshɔn,
13 dɛn go no di kayn wok we i du, bikɔs di de de kam we faya go tɛst ɔlman in wok, ɛn di faya go sho di kayn wok we ɔlman dɔn du.
14 If di tin we pɔsin bil pan am lɛf de, i go gɛt pe;
15 bɔt if di faya bɔn wetin di pɔsin bil, di pɔsin go lɔsis, bɔt insɛf go sev; bɔt if i sev, i go tan lɛk se na insay faya i kɔmɔt.
16 Una nɔ no se una na Gɔd in tɛmpul ɛn Gɔd in spirit de insay una?
17 If ɛnibɔdi pwɛl Gɔd in tɛmpul, Gɔd go dɔnawe wit am; bikɔs Gɔd in tɛmpul oli, ɛn na una na da tɛmpul de.
18 Lɛ nɔbɔdi nɔ ful insɛf: If ɛniwan pan una tink se i gɛt sɛns insay dis tɛm,* lɛ i tan lɛk pɔsin we ful, so dat i go gɛt sɛns.
19 Di sɛns na dis wɔl na ful to Gɔd, bikɔs dɛn rayt se: “I de kech di sɛnsman pan in yon kɔni.”
20 Ɛn dɛn rayt bak se: “Jiova* no se di we aw di sɛnsman dɛn de tink nɔ mek sɛns.”
21 So lɛ nɔbɔdi nɔ bost bɔt mɔtalman; na una gɛt ɔltin,
22 ilɛk na Pɔl ɔ Apɔlɔs ɔ Sifas* ɔ di wɔl ɔ layf ɔ day ɔ tin dɛn we de ya naw ɔ tin dɛn we gɛt fɔ kam, na una gɛt ɔltin;
23 ɛn na Krays gɛt una ɛn na Gɔd gɛt Krays.
Futnot Dɛn
^ Ɔ “de du am fɔ di sem rizin.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ In ɔda nem na Pita.
