1 Kɔrintians 4:1-21
4 Pɔsin fɔ si wi as Krays in savant dɛn ɛn as man dɛn we de in chaj ɔf Gɔd in oli sikrit dɛn.
2 Pantap dat, dɛn want mek pɔsin we dɛn put in chaj bi pɔsin we fetful.
3 To mi, i nɔ rili impɔtant fɔ mek una jɔj mi ɔ mek mɔtalman kɔt jɔj mi. Infakt, a nɔ de ivin jɔj misɛf.
4 A nɔ tink bɔt ɛnitin we a dɔn du we na bad. Bɔt dis nɔ min se a inosɛnt; na Jiova* de jɔj mi.
5 So una nɔ jɔj ɛnitin bifo di rayt tɛm kam, dat na te di Masta kam. I go briŋ di sikrit tin dɛn we de na dak, kam na layt ɛn sho wetin de na pipul dɛn at. Dɔn Gɔd go prez ɔlman fɔ wetin i du.
6 Mi brɔda dɛn, we a de tɔk dɛn tin ya, a yuz mi ɛn Apɔlɔs as ɛgzampul fɔ una yon bɛnifit, so dat tru wi una go lan dis pɔynt: “Na di tin dɛn we dɛn dɔn rayt na in una fɔ fala,” so dat una nɔ go prawd ɛn tek wan pɔsin bɛtɛ pas di ɔda pɔsin.
7 Udat mek yu difrɛn frɔm yu kɔmpin? Wetin rili yu gɛt we nɔto gi dɛn gi yu? So if na gi dɛn gi yu, wetin mek yu de bost lɛk se nɔto gi dɛn gi yu?
8 Fɔ se una dɔn ɔlrɛdi satisfay? Fɔ se una dɔn ɔlrɛdi jɛntri? Fɔ se una dɔn bigin fɔ rul as kiŋ we wi nɔ bigin yet? A rili wish se una dɔn bigin rul as kiŋ, so dat wisɛf go rul wit una as kiŋ.
9 To mi, i tan lɛk se Gɔd dɔn put wi di apɔsul dɛn las na stej lɛk man dɛn we dɛn dɔn kɔndɛm fɔ day, bikɔs to di wɔl, to enjɛl dɛn, ɛn to mɔtalman, wi dɔn tan lɛk sho we dɛn kin gɛt na tiyata.*
10 Wi na fulman dɛn bikɔs ɔf Krays, bɔt una gɛt sɛns bikɔs ɔf Krays; wi wik, bɔt una strɔng; dɛn ɔnɔ una, bɔt dɛn nɔ ɔnɔ wi.
11 Te naw, wi angri, wi tɔsti, wi nɔ gɛt bɛtɛ klos fɔ wɛr,* dɛn de bit wi, wi nɔ gɛt os fɔ de,
12 wi de wok tranga wan wit wi yon an dɛn. We dɛn tɛl wi bad wɔd, wi de blɛs dɛn; we dɛn mek wi sɔfa, wi de peshɛnt bia;
13 we dɛn pwɛl wi nem, wi de tɔk saful wan; to di wɔl, wi dɔn tan lɛk tin fɔ trowe,* tin we pipul dɛn nɔ want igen, te naw.
14 A nɔ de rayt dɛn tin ya fɔ mek una shem, bɔt na fɔ advays una lɛk mi pikin dɛn we a rili lɛk.
15 Pan ɔl we sɔntɛm una go gɛt 10,000 pipul dɛn we de ɛp una fɔ fala Krays, una nɔ gɛt bɔku papa dɛn; a dɔn bi una papa we a tɛl una di gud nyuz bɔt Krays Jizɔs.
16 So a de beg una fɔ falamakata mi.
17 Na dat mek a de sɛn Timoti to una, bikɔs na mi pikin we a rili lɛk ɛn we fetful pan di Masta in wok. I go mɛmba una di we dɛn aw a de du tin insay Krays Jizɔs in wok, jɔs lɛk aw a de tich ɔlsay na ɔl di kɔngrigeshɔn dɛn.
18 Sɔm pan una de mek prawd lɛk se a nɔ gɛt fɔ kam to una.
19 Bɔt a de kam to una jisnɔ, if na dat Jiova* want, ɛn a nɔ de kam fɔ no wetin di wan dɛn we de mek prawd de tɔk, bɔt a de kam fɔ no dɛn pawa.
20 Gɔd in Kiŋdɔm nɔ gɛt ɛnitin fɔ du wit tɔk bɔt na pawa.
21 Uswan una want? Fɔ mek a kam to una wit ken ɔ wit lɔv ɛn du tin saful wan?
Futnot Dɛn
^ Rid Baybul Wɔd dɛn Minin.
^ Na ples we dɛn de mek kɔnsat, ol mitin, ɛn du ɔda tin dɛn.
^ Insay Grik, “nekɛd.”
^ Ɔ “dɔti.”
^ Rid Baybul Wɔd dɛn Minin.
