1 Kɔrintians 6:1-20
6 Wetin mek we una gɛt prɔblɛm wit una kɔmpin una de gɛt di maynd fɔ kɛr di kes go na kɔt bifo man dɛn we nɔ de du wetin rayt, una nɔ de kɛr am go bifo di oli wan dɛn?
2 Ɔ una nɔ no se na di oli wan dɛn go jɔj di wɔl? Ɛn if na una gɛt fɔ jɔj di wɔl, fɔ se una nɔ ebul fɔ jɔj dɛn smɔl smɔl kes dɛn?
3 Una nɔ no se wi go jɔj enjɛl dɛn? So wetin mek wi nɔ go jɔj di kes dɛn we de apin naw?
4 So if una gɛt kes dɛn naw we una nid fɔ jɔj, una tink se na di man dɛn we di kɔngrigeshɔn nɔ tek mek natin na dɛn una fɔ pik fɔ jɔj di kes?
5 A de tɔk fɔ mek una shem. Fɔ se wan pɔsin sɛf nɔ de pan una we gɛt sɛns we go ebul bi jɔj bitwin in brɔda dɛn?
6 Bifo dat, brɔda de kɛr in kɔmpin brɔda na kɔt, ɛn na bifo pipul dɛn we nɔ ivin biliv di Masta!
7 Fɔ tru, if una kɛr una brɔda go na kɔt, una dɔn ɔlrɛdi briŋ shem pan unasɛf. Wetin mek una nɔ go bia we dɛn du una bad? Wetin mek una nɔ go bia we dɛn kruk una?
8 Bifo dat, una de ivin du bad to una brɔda dɛn ɛn kruk dɛn!
9 Ɔ una nɔ no se pipul dɛn we nɔ de du wetin rayt nɔ go gɛt Gɔd in Kiŋdɔm? Una nɔ ful unasɛf. Di wan dɛn we de du mami ɛn dadi biznɛs di we aw Gɔd nɔ want,* we de wɔship aydɔl, we de lɛf dɛn wɛf ɔ man ɛn go du mami ɛn dadi biznɛs wit ɔda pɔsin, pipul dɛn we de alaw dɛn kɔmpin man ɔ uman fɔ du mami ɛn dadi biznɛs wit dɛn, pipul dɛn we dɔn mek am abit fɔ de du mami ɛn dadi biznɛs wit dɛn kɔmpin man ɔ uman,*
10 tifman dɛn, pipul dɛn we want ɔltin fɔ dɛnsɛf, pipul dɛn we de drink te dɛn chak, pipul dɛn we de yuz bad wɔd,* ɛn pipul dɛn we kruk nɔ go gɛt Gɔd in Kiŋdɔm.
11 Na so sɔm pan una bin de. Bɔt Gɔd dɔn was una fayn, i dɔn mek una oli,* ɛn i dɔn tɔk se una de du wetin rayt insay Masta Jizɔs Krays in nem ɛn wit In spirit.
12 A gɛt rayt fɔ du ɔltin, bɔt nɔto ɔltin gɛt bɛnifit. A gɛt rayt fɔ du ɔltin, bɔt a nɔ go alaw ɛnitin fɔ kɔntrol mi.
13 Fud na fɔ di bɛlɛ ɛn di bɛlɛ na fɔ fud, bɔt Gɔd go mek dɛn ɔl tu nɔ de igen. Di bɔdi nɔto fɔ du mami ɛn dadi biznɛs di we aw Gɔd nɔ want* bɔt na fɔ di Masta, ɛn di Masta na fɔ di bɔdi.
14 Bɔt Gɔd bin yuz in pawa fɔ gi di Masta layf bak, ɛn i go yuz in pawa bak fɔ gi wisɛf layf bak we wi day.
15 Una nɔ no se una bɔdi dɛn na pat dɛn we de pan Krays in bɔdi? So fɔ se a fɔ tek di pat dɛn we de pan Krays in bɔdi ɛn go jɔyn dɛn to raregal? Nɔ-o!
16 Una nɔ no se ɛnibɔdi we jɔyn to raregal, dɛn tu dɔn bi wan bɔdi? Gɔd se: “Dɛn tu go bi wan bɔdi.”
17 Ɛnibɔdi we jɔyn to di Masta, dɛn ɔl tu dɔn gɛt wan spirit.
18 Na fɔ rɔnawe pan mami ɛn dadi biznɛs di we aw Gɔd nɔ want!* Ɛni ɔda sin we pɔsin de sin nɔto insay in bɔdi, bɔt pɔsin we de du mami ɛn dadi biznɛs di we aw Gɔd nɔ want de sin agens in yon bɔdi.
19 Una nɔ no se una bɔdi na di tɛmpul fɔ di oli spirit we de insay una, we Gɔd dɔn gi una? Ɛn nɔto una gɛt unasɛf,
20 bikɔs Gɔd gi sɔntin we gɛt valyu* fɔ bay una. So una yuz una bɔdi fɔ gi Gɔd glori.
Futnot
^ Rid Baybul Wɔd dɛn Minin.
^ Ɔ “man dɛn we de du mami ɛn dadi biznɛs wit dɛn kɔmpin man.” Insay Grik, “man dɛn we de ledɔm wit dɛn kɔmpin man.”
^ Ɔ “pipul dɛn we de kɔs.”
^ Ɔ “put una wansay.”
^ Di Grik wɔd na pɔnia. Rid Baybul Wɔd dɛn Minin.
^ Di Grik wɔd na pɔnia. Rid Baybul Wɔd dɛn Minin.
^ Insay Grik, “dɔn pe di prayz.”
