1 Kɔrintians 9:1-27
9 Fɔ se a nɔ fri? Fɔ se mi nɔto apɔsul? Fɔ se a nɔ dɔn si Jizɔs wi Masta? Nɔto una na di wok we a dɔn du fɔ di Masta?
2 Ilɛksɛf mi nɔto apɔsul to ɔda pipul dɛn, mi na apɔsul to una! Una tan lɛk stamp we de pruv se mi na apɔsul fɔ di Masta.
3 Na dis a gɛt fɔ se to di wan dɛn we de jɔj mi:
4 Wi gɛt rayt fɔ it ɛn drink, nɔto so?
5 Wi gɛt rayt fɔ travul wit wɛf we biliv di Masta,* jɔs lɛk di ɔda apɔsul dɛn, di Masta in brɔda dɛn, ɛn Sifas,* nɔto so?
6 Ɔ na mi ɛn Banabas nɔmɔ nɔ gɛt di rayt fɔ lɛf fɔ wok fɔ sɔpɔt wisɛf?
7 Us soja de we de tek kia ɔf insɛf we dɛn nɔ de pe? Udat de plant vayn gadin we nɔ de it in frut? Ɔ udat de mɛn ship we nɔ de drink in milk?
8 Fɔ se na lɛk mɔtalman a de tink we a de se dɛn tin ya? Ɔ fɔ se di Lɔ insɛf nɔ tɔk bɔt dɛn tin ya?
9 I rayt na di Lɔ we Gɔd gi Mozis se: “We kaw de mas mas wit* fɔ pul di chafchaf, yu nɔ fɔ kɔba in mɔt.” Fɔ se na kaw dɛn Gɔd bisin bɔt?
10 Ɔ na fɔ wi sek mek i tɔk dat? Fɔ tru, na fɔ wi sek mek i rayt am, bikɔs di man we de dig ɛn di man we de pul chafchaf de op fɔ gɛt sɔntin frɔm di wok we dɛn de du.
11 If wi dɔn tich una Gɔd biznɛs,* fɔ se na big tin fɔ mek una gi wi tin dɛn fɔ sɔpɔt wisɛf?
12 If ɔda pipul dɛn gɛt di rayt fɔ mek una sɔpɔt dɛn, we wi naw, wi nɔ gɛt rayt pas dɛn? Bɔt pan ɔl dat, wi nɔ yuz di rayt we wi gɛt, wi de bia ɔltin so dat wi nɔ go ambɔg di gud nyuz bɔt di Krays ɛnikayn we.
13 Una nɔ no se di man dɛn we de du oli wok de it di tin dɛn na di tɛmpul, ɛn di wan dɛn we de wok na di ɔlta ɔltɛm de gɛt pan di tin dɛn we de na di ɔlta?
14 Semweso, di Masta se di wan dɛn we de prich di gud nyuz fɔ liv bay di gud nyuz.
15 Bɔt a nɔ aks una fɔ ɛnitin. A nɔ rayt dɛn tin ya fɔ lɛ una du am fɔ mi, bikɔs i go bɛtɛ mek a day pas—a gɛt rayt fɔ bost ɛn nɔbɔdi nɔ go tek da rayt de na mi an!
16 If a de prich di gud nyuz, no rizin nɔ de fɔ mek a bost, bikɔs na sɔntin we a nid fɔ du. Fɔ tru, na trɔbul fɔ mi if a nɔ prich di gud nyuz!
17 If na misɛf disayd fɔ du am, a go gɛt pe; bɔt ilɛksɛf a du am we a nɔ want fɔ du am, a stil gɛt wok we dɛn gi mi.
18 Wetin naw na mi pe? Mi pe na fɔ prich di gud nyuz ɛn nɔ aks fɔ ɛnitin, so dat a nɔ go yuz di rayt we di gud nyuz gi mi di rɔng we.
19 Pan ɔl we mi nɔto slev to ɛnibɔdi, a dɔn mek misɛf slev to ɔlman so dat a go ɛp bɔku pipul dɛn we a ebul fɔ ɛp.
20 To di Ju dɛn, a mek lɛk se mi na Ju so dat a go ɛp di Ju dɛn; to di wan dɛn we de fala lɔ, a mek lɛk se misɛf de fala lɔ, pan ɔl we a nɔ de fala lɔ, so dat a go ɛp di wan dɛn we de fala lɔ.
21 To di wan dɛn we nɔ de fala lɔ, a mek lɛk se misɛf nɔ de fala lɔ, pan ɔl we a de fala Gɔd in lɔ ɛn Krays in lɔ, so dat a go ɛp di wan dɛn we nɔ de fala lɔ.
22 To di wan dɛn we wik, a mek lɛk se a wik, so dat a go ɛp di wan dɛn we wik. A dɔn bi ɔltin to ɔlkayn pipul dɛn, so dat a go du ɔl wetin a ebul fɔ sev sɔm.
23 Bɔt a de du ɔltin bikɔs ɔf di gud nyuz, so dat a go tɛl ɔda pipul dɛn bɔt am.
24 Una nɔ no se pan rɔnres, ɔl di wan dɛn we de pan di res de rɔn, bɔt na wangren pɔsin de gɛt di prayz? So una rɔn di we we go mek una win am.
25 Ɔlman we de tek pat pan kɔmpitishɔn de kɔntrol insɛf pan ɔltin. Dɛn de du am fɔ gɛt krawn we de pwɛl, bɔt wi de du am fɔ gɛt krawn we nɔ de pwɛl.
26 So na dat mek a nɔ de rɔn lɛk se a nɔ no usay a de go; ɛn we a de sɛn mi blo, nɔto fɔ bɔks di briz;
27 bɔt a de sɔfa* mi bɔdi ɛn trit am lɛk slev, so dat afta a dɔn prich to ɔda pipul dɛn, a nɔ go bi pɔsin we nɔ kwalifay.
Futnot Dɛn
^ Ɔ “wan sista as wɛf.”
^ In ɔda nem na Pita.
^ Wit na tin we pipul dɛn de it.
^ Insay Grik, “wi dɔn plant Gɔd biznɛs insay una.”
^ Ɔ “pɔnish; strikt pan.”
