1 Tɛsalonians 2:1-20
2 Mi brɔda dɛn, unasɛf sɛf no fɔ tru se di fɛn we wi kam fɛn una nɔto fɔ natin, i dɔn briŋ bɛnifit.
2 As una no, pan ɔl we wi bin dɔn sɔfa fɔs ɛn dɛn bin dɔn trit wi bad na Filipay, Gɔd ɛp wi fɔ mek maynd fɔ tɛl una di gud nyuz bɔt am pan ɔl we bɔku pipul dɛn bin de agens wi.*
3 Di ɛnkɔrej we wi ɛnkɔrej una nɔto mistek, nɔto bikɔs wi want fɔ du dɔti tin ɔ bikɔs wi want fɔ ful una,
4 bɔt jɔs lɛk aw Gɔd dɔn disayd se wi fit fɔ prich di gud nyuz, wi nɔ de tɔk fɔ pliz mɔtalman, wi de tɔk fɔ pliz Gɔd we de chɛk wi at.
5 Infakt, una no se wi nɔ ɛva tɔk sɔntin fɔ mek pɔsin in ed big ɔ mek ipokrit bikɔs wi want ɔltin fɔ wisɛf; Gɔd na wi witnɛs!
6 Ɛn wi nɔ bin de du tin fɔ mek una ɛn ɔda pipul dɛn prez wi, pan ɔl we wi fɔ dɔn bi lod we ɛvi pasmak na una ed bikɔs wi na Krays in apɔsul dɛn.
7 Bɔt we wi bin de wit una, wi bin lɛk una ɛn gud to una jɔs lɛk aw kombra we de gi bɔbi kin rili kia fɔ in yon pikin dɛn.*
8 So bikɔs wi rili lɛk una, wi nɔ jɔs mekɔp wi maynd* fɔ tɛl una di gud nyuz, bɔt wi gi wisɛf* to una bak, bikɔs wi rili lɛk una.
9 Mi brɔda dɛn, fɔ tru, una mɛmba aw wi wok tranga wan ɛn aw wi stren. Wi bin de wok de ɛn nɛt, so dat wi nɔ go put lod we ɛvi pasmak pan ɛniwan pan una, we wi bin de prich di gud nyuz bɔt Gɔd to una.
10 Una ɛn Gɔd na witnɛs se wi bin de biɛn una, wi du wetin rayt ɛn wi nɔ gɛt wan blem we i kam pan di we aw wi biev we wi de wit una we biliv di Masta.
11 Unasɛf no gud wan se wi bin de ɛnkɔrej una, tɔk fayn to una, ɛn advays una jɔs lɛk aw papa kin du to in pikin dɛn,
12 so dat una go kɔntinyu fɔ waka di we aw Gɔd want, di Gɔd we de kɔl una na in Kiŋdɔm fɔ gɛt pan in glori.
13 Fɔ tru, na dat mek wi nɔ de taya fɔ tɛl Gɔd tɛnki, bikɔs we una bin yɛri Gɔd in wɔd, we wi tɛl una, una nɔ tek am lɛk mɔtalman in wɔd, bɔt una tek am lɛk Gɔd in wɔd, jɔs lɛk aw i rili bi, ɛn na in bak de wok insay una we biliv di Masta.
14 Wi brɔda dɛn, una dɔn falamakata Gɔd in kɔngrigeshɔn dɛn na Judia we gɛt wanwɔd wit Krays Jizɔs, bikɔs una dɔn sɔfa na una yon pipul dɛn an di sem we aw dɛn de sɔfa na di Ju dɛn an.
15 Na dɛn bin ivin kil di Masta Jizɔs ɛn di prɔfɛt dɛn ɛn mek wi sɔfa. Pantap dat, dɛn nɔ de du wetin Gɔd lɛk, bɔt dɛn de du tin dɛn we nɔ de bɛnifit ɛnibɔdi,
16 bay we dɛn de tray fɔ stɔp wi fɔ tɔk to pipul dɛn na ɔda neshɔn dɛn so dat dɛn pipul ya go sev. We dɛn de du dis, dɛn go de sin mɔ ɛn mɔ ɔltɛm. Bɔt Gɔd go pul in vɛksteshɔn pan dɛn jisnɔ.
17 Wi brɔda dɛn, insay di shɔt tɛm we dɛn pul wi kɔmɔt to una (na wi bɔdi nɔmɔ nɔ bin de wit una, bɔt wi bin de mɛmba una), wi tray ɔlkayn we fɔ si una,* bikɔs na dat wi bin rili want fɔ du.
18 Na dis rizin mek wi bin want fɔ kam to una. Fɔ tru, mi, Pɔl, nɔ jɔs tray wan tɛm, bɔt tu tɛm; bɔt Setan blɔk wi we.
19 Udat na wi op, wi gladi-at, wi krawn we go mek wi gladi bifo wi Masta Jizɔs di tɛm we i go de wit wi? Na una, nɔto so?
20 Fɔ tru, una na wi glori ɛn gladi-at.
Futnot Dɛn
^ Ɔ i kin bi, “pan ɔl we i nɔ bin rili izi.”
^ Ɔ “kin ol in pikin dɛn fayn.”
^ Insay Grik, “gladi.”
^ Ɔ “wi sol dɛn.”
^ Insay Grik, “una fes.”
