1 Pita 1:1-25
1 Mi, Pita, na Jizɔs Krays in apɔsul. A de rayt to di wan dɛn we Gɔd pik we de fɔ shɔt tɛm na di wɔl ɛn we skata na Pɔntɔs, Galeshya, Kapadoshia, Eshia, ɛn Bitinia.
2 Gɔd di Papa pik una akɔdin to wetin i bin dɔn no bifo tɛm, ɛn i yuz di spirit fɔ mek una oli, so dat una go de obe ɛn dɛn go sɛn sɛn Jizɔs Krays in blɔd pan una.
Lɛ una gɛt Gɔd in spɛshal gudnɛs* ɛn pis mɔ ɛn mɔ.
3 Lɛ wi Masta Jizɔs Krays in Gɔd ɛn Papa gɛt di prez, bikɔs i sho se i rili gɛt sɔri-at we i gi wi nyu layf fɔ mek wi gɛt wan op we go kɔntinyu fɔ de sote go. Ɛn na di layf we i gi Jizɔs Krays bak na in mek wi gɛt dis op.
4 I gi wi nyu layf fɔ mek wi gɛt wetin i bin dɔn prɔmis wi. Di tin we i bin dɔn prɔmis wi nɔ de rɔtin, i nɔ dɔti, ɛn i nɔ de fed. Dɛn dɔn kip am na ɛvin fɔ una,
5 we Gɔd in pawa de protɛkt bikɔs ɔf fet so dat una go sev. Dis go apin we di tɛm de dɔn.
6 Na dis mek una de gladi pasmak, pan ɔl we difrɛn tin dɛn we de tɛst una dɔn mek una sɔfa fɔ shɔt tɛm, bɔt dat na tin we kin apin,
7 so dat una fet we dɛn dɔn tɛst, we gɛt valyu fa fawe pas gold we de pwɛl pan ɔl we dɛn dɔn put* am na faya, go mek una gɛt prez, glori, ɛn ɔnɔ di tɛm we Jizɔs Krays go sho insɛf.
8 Pan ɔl we una nɔ ɛva si am, una lɛk am. Pan ɔl we una nɔ de si am naw, una de sho se una gɛt fet pan am, ɛn una de gladi pasmak, ɛn una so gladi dat una nɔ no aw fɔ ɛksplen aw una de fil,
9 as una fet de mek una sev.*
10 Di prɔfɛt dɛn we bin tɔk bɔt Gɔd in spɛshal gudnɛs* we una fɔ gɛt, bin de tek tɛm aks ɛn tray tranga wan fɔ no bɔt dis sev we una go sev.
11 Dɛn kɔntinyu fɔ tray fɔ no mɔ bɔt di patikyula tɛm ɛn di sizin we di oli spirit we bin de insay dɛn bin de sho bɔt Krays as i bin de mek dɛn no bifo tɛm bɔt aw Krays go sɔfa ɛn aw i go gɛt glori afta dat.
12 Gɔd mek dɛn no se di wok we dɛn bin de du nɔto fɔ dɛnsɛf dɛn de du am, bɔt na fɔ una. Ɛn naw di wan dɛn we tɛl una di gud nyuz dɔn mek una no dɛn tin ya. Ɛn na di oli spirit we kɔmɔt na ɛvin na in ɛp dɛn fɔ du dat. Di enjɛl dɛn rili want fɔ no bɔt dɛn tin ya.
13 So una mekɔp una maynd fɔ wok; una kɔntinyu fɔ tink di rayt we; una abop pan Gɔd in spɛshal gudnɛs* we una go gɛt di tɛm we Jizɔs Krays go sho insɛf.
14 As pikin dɛn we de obe, una lɛf fɔ alaw di tin dɛn we una bin want fɔ du di tɛm we una nɔ bin no Gɔd, fɔ shep una,
15 bɔt una fɔ oli pan ɔltin we una de du, jɔs lɛk di Oli Wan we kɔl una,
16 bikɔs dɛn bin dɔn rayt se: “Una fɔ oli, bikɔs a oli.”
17 If una de kɔl di Papa we de jɔj ɔlman akɔdin to wetin dɛn du ɛn we nɔ de tek wan pɔsin bɛtɛ pas ɔda pɔsin, una fɔ de fred we una de du tin insay di shɔt tɛm we una de na di wɔl.
18 Una no se nɔto wit tin dɛn we de pwɛl, wit silva ɔ gold, Gɔd tek fɔ pul* una pan di layf we una bin de liv we nɔ gɛt wan minin ɛn we una gret gret granpa dɛn lɛf gi una.
19 Bɔt na wit Krays in blɔd we gɛt valyu, we tan lɛk di blɔd we yɔŋ ship we nɔ gɛt wan bɔt ɔ sten, gɛt.
20 Na tru se Gɔd bin dɔn pik am bifo di wɔl bigin, bɔt i mek lɛ dɛn no am fɔ una sek we di tɛm de dɔn.
21 Na tru am una biliv Gɔd, we bin gi am layf bak ɛn gi am glori, so dat una go gɛt fet ɛn abop pan Gɔd.
22 Naw we una dɔn klin unasɛf* bay we una de obe di tru tin dɛn we dɔn mek una lɛk unasɛf lɛk aw brɔda dɛn kin lɛk dɛnsɛf, ɛn una nɔ gɛt wan ipokrit, una fɔ rili lɛk una kɔmpin dɛn wit ɔl una at.
23 Gɔd we de alayv ɛn we go de sote go dɔn gi una nyu layf wit sid we nɔ de rɔtin,* nɔto wit sid we de rɔtin, ɛn i du dat tru in wɔd.
24 “Mɔtalman tan lɛk gras, ɛn ɔl dɛn glori tan lɛk flawa we de gro pan gras; di gras de wida, ɛn di flawa de fɔdɔm,
25 bɔt Jiova* in wɔd go de sote go.” Ɛn dis “wɔd” ya na di gud nyuz we dɛn dɔn tɛl una.
Futnot Dɛn
^ Rid Baybul Wɔd dɛn Minin.
^ Ɔ “klin.”
^ Ɔ “una sol dɛn sev.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Insay Grik, “fri.”
^ Ɔ “una sol.”
^ Dat na, sid we de bia frut.
^ Rid Baybul Wɔd dɛn Minin.
