1 Timoti 1:1-20
1 Mi, Pɔl, na Krays Jizɔs in apɔsul bikɔs na dat Gɔd, we na wi Seviɔ, ɛn Krays Jizɔs, we na wi op, dɔn tɔk.
2 A de rayt to Timoti* we na mi tru tru pikin we de wok fɔ di Masta:
Lɛ Gɔd, we na di Papa, ɛn wi Masta, Krays Jizɔs gi yu pis, mek dɛn sɔri fɔ yu, ɛn mek dɛn spɛshal gudnɛs* de pan yu.
3 Jɔs lɛk aw a bin ɛnkɔrej yu fɔ lɛf na Ɛfisɔs we a bin want fɔ go na Masidonia, na di sem tin a de ɛnkɔrej yu fɔ du naw, so dat yu go tɛl sɔm pipul dɛn mek dɛn nɔ tich difrɛn tin,
4 ɔ pe atɛnshɔn to dɛn lay lay stori dɛn ɔ to dɛn gret gret granpa dɛn nem dɛn. Dɛn kayn tin ya nɔ kin ɛnd-ɔp pan ɛni bɛtɛ tin, dɛn kin jɔs kam wit tɔk dɛn we dɛn nɔ shɔ bɔt; ɛn dɛn nɔ gɛt ɛnitin fɔ du wit wetin Gɔd de du fɔ mek wi gɛt fet.
5 Fɔ tru, di rizin we mek a de se dis na fɔ mek wi gɛt lɔv we kɔmɔt frɔm klinat, gud kɔnshɛns ɛn fet, ɛn fɔ lɛ wi nɔ mek ipokrit.
6 Bikɔs sɔm pipul dɛn dɔn lɛf dɛn tin ya, dɛn dɔn jɔyn pan dɛn tɔk we nɔ gɛt wan minin.
7 Dɛn want fɔ tich pipul dɛn lɔ, bɔt dɛn nɔ ɔndastand di tin dɛn we dɛn de se ɔ di tin dɛn we dɛn de pin pan.
8 Wi no se di Lɔ fayn if pɔsin yuz am di rayt we,
9 ɛn di pɔsin no se dɛn nɔ mek lɔ fɔ pɔsin we de du wetin rayt, bɔt na fɔ di wan dɛn we nɔ de obe lɔ ɛn di wan dɛn we de go agens lɔ, di wan dɛn we nɔ lɛk Gɔd ɛn di wan dɛn we de sin, di wan dɛn we de kɔmɔt biɛn pɔsin ɛn di wan dɛn we de mek tin dɔti, di wan dɛn we de kil dɛn papa dɛn ɛn di wan dɛn we de kil dɛn mama dɛn, di wan dɛn we de kil pipul dɛn,
10 di wan dɛn we de du mami ɛn dadi biznɛs di we aw Gɔd nɔ want,* di wan dɛn we dɔn mek am abit fɔ de du mami ɛn dadi biznɛs wit dɛn kɔmpin man ɔ uman,* kecha kecha dɛn, di wan dɛn we de lay, di wan dɛn we de swɛ se dɛn go du sɔntin bɔt dɛn nɔ de du am, ɛn ɔl ɔda tin we de agens di tichin we gud,*
11 we gɛt sɔntin fɔ du wit di wɔndaful gud nyuz we di Gɔd we gladi gi mi.
12 A tɛl wi Masta Krays Jizɔs tɛnki, we gi mi pawa, bikɔs i tek mi as pɔsin we fetful bay we i gi mi wok,
13 pan ɔl we trade a bin de tɔk bad bɔt Gɔd, a bin de mek pipul dɛn sɔfa, ɛn a bin de mek lɛk se a bɛtɛ pas ɔda pipul dɛn. Bɔt Gɔd sɔri fɔ mi bikɔs we a bin de du dɛn tin dɛn de a nɔ bin no ɛn a nɔ bin gɛt fet.
14 Bɔt wi Masta in spɛshal gudnɛs* de pan mi bɔku bɔku wan, ɛn a gɛt fet ɛn lɔv we gɛt fɔ du wit Krays Jizɔs.
15 Dɛn wɔd ya na tru ɛn na sɔntin we pɔsin fit fɔ rili biliv: Krays Jizɔs kam na di wɔl fɔ sev sina dɛn. Mi yon sina, a wɔs pas dɛn ɔl.
16 Bɔt Gɔd sɔri fɔ mi so dat tru mi, we wɔs pas dɛn ɔl, Krays Jizɔs go sho se i rili gɛt peshɛnt ɛn mek mi as ɛgzampul to di wan dɛn we go put dɛn fet pan am fɔ gɛt layf we go de sote go.
17 Mek di Kiŋ we bin dɔn de ɛn we go de sote go, we nɔ de day,* we wi nɔ de si, di wangren Gɔd, gɛt ɔnɔ ɛn glori sote go. Emɛn.
18 Dis tin we a de tɛl yu, mi pikin Timoti, gɛt sɔntin fɔ du wit di prɔfɛsi dɛn we dɛn bin dɔn tɔk bɔt yu, so dat dɛn wɔd dɛn de go mek yu kɔntinyu fɔ fɛt di fayn fɛt,
19 gɛt fet ɛn gud kɔnshɛns, we sɔm pipul dɛn dɔn push na kɔna, we dɔn mek dɛn fet tan lɛk ship we pwɛl na si.
20 Aymeniɔs ɛn Alɛgzanda de pan dɛn, ɛn a dɔn an ova dɛn to Setan so dat di pɔnishmɛnt go tich dɛn nɔ fɔ tɔk bad bɔt Gɔd igen.
Futnot Dɛn
^ I min “Di Wan we De Ɔnɔ Gɔd.”
^ Rid Baybul Wɔd dɛn Minin.
^ Rid Baybul Wɔd dɛn Minin, “Mami ɛn dadi biznɛs di we aw Gɔd nɔ want.”
^ Ɔ “man dɛn we de du mami ɛn dadi biznɛs wit dɛn kɔmpin man.” Insay Grik, “man dɛn we de ledɔm wit dɛn kɔmpin man.”
^ Ɔ “we de bɛnifit wi.”
^ Rid Baybul Wɔd dɛn Minin.
^ Insay Grik, “we gɛt bɔdi we nɔ de rɔtin.”
