1 Timoti 4:1-16
4 Bɔt Gɔd in spirit tɔk klia wan se tɛm go kam we sɔm pipul dɛn nɔ go gɛt fet igen, dɛn go de pe atɛnshɔn to lay lay tin dɛn we tan lɛk tin dɛn we Gɔd tɔk,* ɛn dɛn go de lisin to wetin dimɔn dɛn de tich,
2 bikɔs ɔf di lay lay tin dɛn we sɔm ipokrit man dɛn de tɔk, dɛn kɔnshɛns dɛn nɔ de wok lɛk se dɛn ros am wit wam wam ayɛn.
3 Dɛn se pɔsin nɔ fɔ mared, ɛn dɛn de tɛl pipul dɛn fɔ avɔyd fud dɛn we Gɔd mek fɔ lɛ di wan dɛn we gɛt fet ɛn we no di kɔrɛkt tin bɔt di trut, it ɛn tɛl am tɛnki.
4 Ɔltin we Gɔd mek fayn, ɛn pɔsin nɔ fɔ se i nɔ want am if i tek am ɛn tɛl Gɔd tɛnki,
5 bikɔs Gɔd in wɔd ɛn di pre we dɛn pre pan am de mek i oli.
6 We yu de gi dis advays to brɔda dɛn, yu go bi fayn savant fɔ Krays Jizɔs, ɛn yu go sho se di wɔd dɛn we de mek wi gɛt fet ɛn di fayn tichin we yu dɔn fala gud gud wan dɔn mek yu gro ɛn strɔng.
7 Nɔ lisin to lay lay stori dɛn we nɔ de sho rɛspɛkt fɔ Gɔd, lɛk di wan dɛn we ol mami dɛn kin pul. Bɔt tren yusɛf ɛn plan fɔ bi fetful to Gɔd.
8 We pɔsin ɛksasayz, i de bɛnifit smɔl; bɔt we pɔsin fetful to Gɔd, i de bɛnifit pan ɔltin, bikɔs i go mek pɔsin gɛt Gɔd in blɛsin we i dɔn prɔmis naw ɛn tumara bambay.
9 Dɛn wɔd ya na tru ɛn pɔsin fɔ rili biliv am.
10 Na dis mek wi de wok tranga wan ɛn rili rili tray, bikɔs wi dɔn put wi op pan Gɔd we de alayv, we de sev ɔlkayn pipul dɛn, mɔ di wan dɛn we fetful.
11 Kɔntinyu fɔ tɛl dɛn bɔt dɛn tin ya ɛn go de tich dɛn.
12 Nɔ alaw ɛnibɔdi fɔ tɛkɛ yu bikɔs yu yɔŋ. Bɔt bi ɛgzampul to di fetful wan dɛn bay di we aw yu de tɔk, di we aw yu de biev, di we aw yu de sho lɔv, di fet we yu gɛt, ɛn bay we yu de liv klin layf.
13 Te a kam, kɔntinyu fɔ du yu bɛst we yu de rid na pɔblik, we yu de ɛnkɔrej ɔda pipul dɛn, ɛn we yu de tich.
14 Nɔ tɔn yu bak pan di gift we Gɔd gi yu we prɔfɛt dɛn tɔk bɔt we di ɛlda dɛn le dɛn an dɛn pan yu.
15 Tink gud wan bɔt dɛn tin ya; put ɔl yu at de, so dat ɔlman go si klia wan se yu de go bifo pan Gɔd biznɛs.
16 Kɔntinyu fɔ pe atɛnshɔn to yusɛf ɛn di we aw yu de tich. Tray fɔ de du dɛn tin ya ɔltɛm, bikɔs we yu de du dɛn, yu go sev yusɛf ɛn di wan dɛn we de lisin to yu.
Futnot Dɛn
^ Insay Grik, “to spirit dɛn we de lay.”
