2 Tɛsalonians 3:1-18
3 So, wi brɔda dɛn, una go de pre fɔ wi, fɔ lɛ Jiova* in wɔd kɔntinyu fɔ go bifo kwik kwik wan ɛn fɔ lɛ i gɛt glori, jɔs lɛk aw i de bi to una,
2 ɛn fɔ lɛ Gɔd sev wi frɔm dɛn bad ɛn wikɛd pipul dɛn, bikɔs nɔto ɔlman gɛt fet.
3 Bɔt di Masta fetful, i go ɛp una fɔ tinap tranga wan, ɛn i go protɛkt una frɔm di wikɛd wan.
4 Pantap dat, as pipul dɛn we de fala di Masta, wi gɛt kɔnfidɛns pan una se una de du, ɛn una go kɔntinyu fɔ du wetin wi tɛl una.
5 Lɛ di Masta kɔntinyu fɔ dayrɛkt una at fayn fayn wan so dat una go lɛk Gɔd, ɛn una go de bia fɔ Krays in sek.
6 Wi brɔda dɛn, wi de yuz di pawa we wi Masta Jizɔs Krays dɔn gi wi fɔ tɛl una fɔ kɔmɔt biɛn ɛni brɔda we nɔ de waka di kɔrɛkt we ɛn we nɔ de fala di tin dɛn we wi bin dɔn tɛl una.*
7 Unasɛf no aw una fɔ falamakata wi, bikɔs wi nɔ biev bad we wi bin de wit una,
8 ɛn wi nɔ it ɛnibɔdi in fud fɔ fri.* Bifo dat, wi bin de wok tranga wan ɛn stren de ɛn nɛt fɔ lɛ wi nɔ put lod we ɛvi pasmak pan ɛniwan pan una.
9 Nɔto fɔ se wi nɔ gɛt rayt, bɔt wi bin want fɔ bi ɛgzampul we una go falamakata.
10 Infakt, we wi bin de wit una, wi bin de tɛl una se: “If ɛnibɔdi nɔ want fɔ wok, lɛ i nɔ it.”
11 Wi dɔn yɛri se sɔm pipul dɛn we de wit una nɔ de waka di kɔrɛkt we, dɛn nɔ de wok atɔl, dɛn jɔs de put mɔt pan ɔda man biznɛs.
12 Wi de advays dɛn kayn pipul ya ɛn tɛl dɛn insay Masta Jizɔs Krays in nem se dɛn fɔ wok kwayɛt wan ɛn it fud we dɛnsɛf sɛf wok fɔ.
13 As fɔ una, wi brɔda dɛn, una nɔ taya fɔ de du gud.
14 Bɔt if ɛnibɔdi nɔ du wetin wi se na dis lɛta, una mak am ɛn lɛf fɔ spɛn tɛm wit am, so dat i go shem.
15 Bɔt una nɔ tek am lɛk se na una ɛnimi, bɔt una kɔntinyu fɔ de advays am as una brɔda.
16 Mek di Masta we de gi pis insɛf sɛf gi una pis ɔltɛm ɛn pan ɔltin. Mek di Masta de wit una ɔl.
17 Mi, Pɔl, de rayt mi gritin wit mi yon an, na sayn na ɛni lɛta; na so a kin rayt.
18 Mek wi Masta Jizɔs Krays in spɛshal gudnɛs* de pan una ɔl.
Futnot Dɛn
^ Rid Baybul Wɔd dɛn Minin.
^ Ɔ i kin bi, “dɛn.”
^ Ɔ “we wi nɔ pe fɔ.”
^ Rid Baybul Wɔd dɛn Minin.
