Abakɔk 1:1-17
1 Wan impɔtant mɛsej we dɛn bin tɛl di prɔfɛt Abakɔk* insay wan vishɔn:
2 E Jiova, aw lɔng a go kray to yu fɔ ɛp, bɔt yu nɔ de yɛri?
Aw lɔng a fɔ beg yu fɔ sev mi frɔm wikɛdnɛs, bɔt yu nɔ de du natin?
3 Wetin mek yu de alaw mi fɔ si bad tin dɛn?
Wetin mek yu de alaw pipul dɛn fɔ sɔprɛs dɛn kɔmpin dɛn?
Wetin mek trɔbul ɛn wikɛdnɛs de apin bifo mi?
Wetin mek plaba ɛn fɛt-fɛt de apin ɔlsay?
4 So lɔ nɔ de wok,Ɛn pipul dɛn nɔ de ɛva du tin tret.
Bikɔs di wikɛd wan dɛn de sɔprɛs di wan dɛn we de du wetin rayt;Na dat mek jɔstis nɔ de.
5 “Una luk di neshɔn dɛn ɛn pe atɛnshɔn!
Kɔle ɛn sɔprayz as una de wach;Bikɔs sɔntin go apin insay una tɛmWe una nɔ go biliv ilɛksɛf dɛn tɛl una.
6 A de kam wit di Kaldian dɛn,We na neshɔn we nɔ gɛt sɔri-at ɛn we gɛt wamat.
Dɛn go kɔnka bɔku ples dɛn na di wɔl,Ɛn dɛn go tek say dɛn we nɔto dɛn yon.
7 Na neshɔn we fiaful ɛn pipul dɛn de fred dɛn.
Na dɛn de disayd wetin rayt ɛn rɔng, ɛn dɛn gɛt pawa.
8 Dɛn ɔs dɛn de rɔn pas liopad,Ɛn dɛn wayl pas wulf dɛn na nɛt.
Dɛn ɔs dɛn we dɛn de yuz fɔ fɛt wɔ de rɔn go bifo.Dɛn ɔs dɛn kɔmɔt fa say.
Dɛn de rɔsh lɛk igul we de kam dɔŋ fɔ it.
9 Dɛn ɔl we de kam rɛdi fɔ du wikɛd tin dɛn.
We dɛn ɔl de togɛda, dɛn tan lɛk di briz we de kɔmɔt na di ist,Dɛn de kech bɔku bɔku pipul dɛn lɛk aw dɛn de gɛda sansan.
10 Dɛn de provok kiŋ dɛnƐn laf bigman dɛn.
Dɛn de laf we dɛn si ɛni ples we gɛt strɔng wɔl,Dɛn de payl dɔti ay ay wan ɛn kapchɔ de.
11 Dɔn dɛn go bifo lɛk briz ɛn pas insay de,Bɔt dɛn go gilti,Bikɔs dɛn de prez dɛn gɔd fɔ dɛn pawa.”*
12 E Jiova, yu nɔ dɔn de frɔm trade trade?
E mi Gɔd, mi Oli Wan, yu nɔ de day.*
E Jiova, yu dɔn pik dɛn fɔ jɔj;Mi Rɔk, yu dɔn pik dɛn fɔ pɔnishmɛnt.*
13 Yu yay tu klin fɔ luk sɔntin we bad,Ɛn yu nɔ de ɛnkɔrej wikɛdnɛs.
So wetin mek yu de alaw pipul dɛn we de du badƐn yu de sɛt mɔt we wikɛd pɔsin
De sɔprɛs di wan we de du wetin rayt pas am?
14 Wetin mek yu mek mɔtalman lɛk fish na di si,Lɛk tin dɛn we de krip we nɔ gɛt rula?
15 I* de drɔ dɛn ɔl wit uk.
I de kech dɛn na in fishin nɛt,Ɛn gɛda dɛn na in nɛt.
Na dat mek i de gladi pasmak.
16 Na dat mek i de sakrifays to in fishin nɛtƐn mek sakrifays to in nɛt;Bikɔs na dɛn mek i gɛt di bɛst pat,Ɛn in fud na di bɛst.
17 Fɔ se i go kɔntinyu fɔ ɛmti in fishin nɛt?*
Fɔ se i go kɔntinyu fɔ kil pipul dɛn ɛn nɔ sho sɔri-at?
Futnot Dɛn
^ I kin min “Tayt Tayt Ɔg.”
^ Ɔ i kin bi, “dɛn pawa na dɛn gɔd.”
^ Ɔ i kin bi, “wi nɔ go day.”
^ Ɔ “fɔ kɔrɛkt dɛn.”
^ Dat na, di Kaldian ɛnimi.
^ Ɔ i kin bi, “kɔntinyu fɔ drɔ in sɔd?”
