Abakɔk 3:1-19
3 Di prea we prɔfɛt Abakɔk pre insay wan sɔri siŋ:
2 E Jiova, a dɔn yɛri bɔt yu.
E Jiova, a de wɔnda ɛn kɔle pan di tin dɛn we yu de du.
Insay wi tɛm,* du di tin dɛn we yu bin dɔn de du!
Insay wi tɛm,* mek lɛ dɛn no di tin dɛn we yu bin dɔn de du.
Duya, mɛmba wi ɛn sɔri fɔ wi di tɛm we wi go gɛt trɔbul.
3 Gɔd kɔmɔt frɔm Timan,Di Oli Wan kɔmɔt frɔm Mawnt Peran. (Sila)*
In glori de ɔlsay na ɛvin;Di wɔl ful-ɔp wit pipul dɛn we de prez am.
4 I brayt jɔs lɛk di san.
Layt dɛn de shayn na in an,Usay in trɛnk ayd.
5 I bin de sɛn sik we de prɛd pan di wan dɛn we bin de bifo am,Ɛn ay fiva bin de pan di wan dɛn we bin de biɛn am.
6 I tinap ɛn shek di wɔl.
We i luk, i mek di neshɔn dɛn jomp.
Di mawntin dɛn we bin dɔn de lɔng lɔng tɛm skata,Ɛn di il dɛn we bin dɔn de trade trade bin butu.
Na in gɛt di rod dɛn we bin de frɔm trade trade.
7 A si trɔbul na di tɛnt dɛn na Kushan.
Di tɛnt klos dɛn na Midian bin trimbul.
8 E Jiova, fɔ se na pan di riva dɛn yu de vɛks?Fɔ se na pan di watasay dɛn yu de vɛks bad bad wan?
Ɔ fɔ se na pan di si yu de pul yu wamat?
Yu rayd yu ɔs dɛn;Yu chariɔt dɛn win.
9 Yu dɔn pul yu bo ɛn rɛdi am.
Di wɛpɔn* dɛn dɔn rɛdi bikɔs ɔf di swɛ. (Sila)
Yu divayd di wɔl wit riva dɛn.
10 Mawntin dɛn fil siriɔs pen we dɛn si yu.
Ɛvi ɛvi ren kam na di land.
Di dip wata mek lawd nɔys.
I es in an dɛn ɔp.
11 San ɛn mun nɔ kɔmɔt.
Yu aro dɛn bin de flash lɛk layt.
Di layt we bin de kɔmɔt pan yu spia bin brayt.
12 Yu vɛks we yu de waka na di wɔl.
Yu waka pan* di neshɔn dɛn wit wamat.
13 Yu go fɔ sev yu pipul dɛn, fɔ sev di wan we yu dɔn anɔynt.
Yu dɔnawe wit di lida* fɔ di wikɛd wan in os.
Yu dɔnawe wit di os frɔm di fawndeshɔn te go ɔp.* (Sila)
14 Yu chuk di edman fɔ in fɛtman dɛn wit in yon wɛpɔn* dɛnWe dɛn rɔsh pan mi fɔ skata mi.
Dɛn bin gladi pasmak fɔ kil na kɔna di wan we de sɔfa.
15 Yu waka na di si wit yu ɔs dɛn,Yu waka insay bɔku bɔku wata.
16 A yɛri ɛn a trimbul,*We a yɛri di sawnd, mi lip dɛn shek.
Mi bɔn dɛn wik,Mi lɛg dɛn bin de shek ɔnda mi.
Bɔt a wet kwayɛt wan fɔ di de we trɔbul go kam,Bikɔs i de kam pan di pipul dɛn we atak wi.
17 Pan ɔl we di fig stik nɔ go pul flawa,Ɛn di vayn dɛn nɔ gɛt ɛni frut;Pan ɔl we di ɔliv nɔ bia,Ɛn it nɔ gro na di fam dɛn;Pan ɔl we di ship ɛn got dɛn nɔ go de igen na di say usay dɛn de mɛn dɛn,Ɛn di kaw dɛn nɔ go de igen usay dɛn de mɛn dɛn;
18 Bɔt as fɔ mi, a go gladi bikɔs ɔf Jiova;A go gladi bikɔs ɔf di Gɔd we de sev mi.
19 Na Jiova we na di Masta We De Rul Ɔlman de gi mi trɛnk;I go mek mi fut fast lɛk diaƐn mek a waka na ay ay ples dɛn.
Futnot Dɛn
^ Insay Ibru, “Insay di ia dɛn.”
^ Insay Ibru, “Insay di ia dɛn.”
^ Rid Baybul Wɔd dɛn Minin.
^ Ɔ i kin bi, “aro.”
^ Insay Ibru, “mas mas.”
^ Insay Ibru, “wit di ed.”
^ Insay Ibru, “go na di nɛk.”
^ Insay Ibru, “in rɔd.”
^ Insay Ibru, “ɛn mi bɔtɔm bɛlɛ bwɛl.”
