Daniɛl 6:1-28
6 Darayɔs bin si se i fayn fɔ pik 120 setrap* dɛn fɔ de oba di wan ol kiŋdɔm.
2 Tri man dɛn we bin gɛt ay pozishɔn bin de oba dɛn, ɛn wan pan dɛn na bin Daniɛl; di setrap* dɛn bin de ripɔt to dɛn, so dat bad tin nɔ go apin we go afɛkt di kiŋ.
3 Daniɛl bin de sho se i kwalifay pas di ɔda man dɛn we gɛt ay pozishɔn ɛn di setrap* dɛn, bikɔs i bin gɛt sɛns pasmak, ɛn di kiŋ bin want fɔ put am oba di wan ol kiŋdɔm.
4 Da tɛm de, di man dɛn we gɛt ay pozishɔn ɛn di setrap* dɛn bin de fɛn bad tin dɛn we dɛn go se Daniɛl dɔn du we gɛt fɔ du wit di kiŋdɔm, bɔt dɛn nɔ bin ebul fɔ fɛn ɛni bad tin ɔ ɛni kɔrɔpt tin, bikɔs in na bin sɔmbɔdi we pɔsin kin abop pan, i nɔ bin de lɛf ɛni wok we i fɔ du, ɛn i nɔ bin de put an pan kɔrɔpshɔn.
5 Di man dɛn se: “Wi nɔ go fɛn ɛni fɔlt pan dis Daniɛl, pas wi fɛn sɔntin agens am we gɛt fɔ du wit in Gɔd in lɔ.”
6 So dɛn bigman ya ɛn di setrap* dɛn go to di kiŋ togɛda, ɛn dɛn tɛl am se: “E Kiŋ Darayɔs, lɛ yu de sote go.
7 Ɔl di kiŋ in bigman dɛn, di prifɛkt dɛn, di setrap* dɛn, di advaysa dɛn, ɛn di gɔvnɔ dɛn dɔn kam togɛda fɔ mek wan lɔ na di kiŋdɔm ɛn fɔ put wan ban se fɔ 30 dez ɛnibɔdi we pre to ɛni gɔd ɔ mɔtalman apat frɔm yu, E kiŋ, dɛn fɔ trowe am insay di layɔn dɛn ol.
8 E kiŋ, mek di lɔ ɛn sayn am, so dat i nɔ go chenj, bikɔs natin nɔ de mek di Mid dɛn ɛn di Pashian dɛn lɔ nɔ ol wata.”
9 So Kiŋ Darayɔs sayn di lɔ ɛn di ban.
10 Bɔt as Daniɛl no se dɛn dɔn sayn di lɔ, i go na in os, na in rum we de ɔp di ruf we gɛt winda dɛn we opin ɛn we fesin Jerusɛlɛm. Ɛn tri tɛm fɔ di de i bin de nil dɔŋ, pre, ɛn prez in Gɔd, jɔs lɛk aw i bin dɔn de du ɔltɛm bifo dis tɛm.
11 Da sem tɛm de, di man dɛn bɔs pan Daniɛl, ɛn dɛn mit i de pre ɛn rili beg in Gɔd.
12 So dɛn go to di kiŋ ɛn mɛmba am bɔt di ban we i bin dɔn mek. Dɛn aks am se: “E kiŋ, yu nɔ bin sayn wan ban we se fɔ 30 dez ɛnibɔdi we pre to ɛni gɔd ɔ mɔtalman apat frɔm yu, dɛn fɔ trowe am insay di layɔn dɛn ol?” Di kiŋ ansa dɛn se: “Di tin kɔnfam akɔdin to di Mid dɛn ɛn di Pashian dɛn lɔ we natin nɔ de mek i nɔ ol wata.”
13 Dɛn tɛl di kiŋ wantɛm wantɛm se: “E kiŋ, Daniɛl, we na wan pan di pipul dɛn we dɛn pul kɔmɔt na Juda, dɔn sho se i nɔ gɛt wan rɛspɛkt fɔ yu ɔ fɔ di ban we yu sayn; i de pre tri tɛm fɔ di de.”
14 As di kiŋ yɛri dis so, in at bin pwɛl bad bad wan, ɛn i tray fɔ tink bɔt we fɔ sev Daniɛl; ɛn te di san go dɔŋ i fɛn ɔlkayn we fɔ sev am.
15 So dɛn man ya go togɛda to di kiŋ, ɛn dɛn tɛl am se: “E kiŋ, mɛmba se di Mid dɛn ɛn di Pashian dɛn lɔ se ɛni ban ɔ lɔ we di kiŋ mek nɔ de chenj.”
16 So di kiŋ gi ɔda, ɛn dɛn kam wit Daniɛl ɛn ib am insay di layɔn dɛn ol. Di kiŋ tɛl Daniɛl se: “Yu Gɔd we yu de sav ɔltɛm go sev yu.”
17 Dɛn kam wit wan ston ɛn yuz am fɔ kɔba di ol, ɛn di kiŋ sil am wit in riŋ we i kin yuz fɔ stamp ɛn wit di riŋ we in bigman dɛn kin yuz fɔ stamp, so dat di tin we dɛn dɔn disayd bɔt Daniɛl nɔ go chenj.
18 Na de di kiŋ go na in pales. I fast da nɛt de ɛn i nɔ gri fɔ du ɛnitin fɔ ɛnjɔy insɛf,* ɛn i nɔ bin ebul fɔ slip.*
19 As do bigin klin so, di kiŋ grap ɛn go kwik kwik wan na di ol usay di layɔn dɛn de.
20 We i go nia di ol, i kɔl Daniɛl lawd wan wit sɔri vɔys. Di kiŋ aks Daniɛl se: “E Daniɛl, di Gɔd we de alayv in savant, yu Gɔd we yu de sav ɔltɛm bin ebul fɔ sev yu frɔm di layɔn dɛn?”
21 Wantɛm wantɛm Daniɛl ansa di kiŋ se: “E kiŋ, lɛ yu de sote go.
22 Mi Gɔd sɛn in enjɛl ɛn i lɔk di layɔn dɛn mɔt, ɛn dɛn nɔ du mi natin, bikɔs a inosɛnt bifo am; ɛn a nɔ du yu ɛni bad tin, E kiŋ.”
23 Di kiŋ bin gladi pasmak, ɛn i gi ɔda se mek dɛn pul Daniɛl kɔmɔt na di ol. We dɛn pul Daniɛl kɔmɔt na di ol, natin nɔ bin du am, bikɔs i bin abop pan in Gɔd.
24 Na de di kiŋ gi ɔda, ɛn dɛn kam wit di man dɛn we bin dɔn tɔk se Daniɛl du bad,* ɛn dɛn trowe dɛn wit dɛn pikin dɛn ɛn dɛn wɛf dɛn na di ol usay di layɔn dɛn de. Dɛn nɔ ivin rich dɔŋ di ol nain di layɔn dɛn atak dɛn ɛn nyamanyama ɔl dɛn bon dɛn.
25 Na de Kiŋ Darayɔs rayt to ɔl di pipul dɛn, neshɔn dɛn, ɛn grup dɛn we de tɔk difrɛn langwej dɛn we de ɔlsay na di wɔl se: “Mek una rili gɛt pis!
26 A de pas lɔ se ɔlsay na mi kiŋdɔm, pipul dɛn fɔ fred Daniɛl in Gɔd ɛn trimbul bifo am. Na in na di Gɔd we de alayv ɛn i go de sote go. Dɛn nɔ go ɛva dɔnawe wit in kiŋdɔm ɛn i go rul* sote go.
27 I de protɛkt, sev, ɛn pafɔm sayn ɛn wɔndaful tin dɛn na ɛvin ɛn na di wɔl, bikɔs i sev Daniɛl na di layɔn dɛn an.”
28 So tin bin fayn fɔ Daniɛl na Darayɔs in kiŋdɔm ɛn na Sayrɔs we na di Pashian in kiŋdɔm.
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ i kin bi, “ɛn dɛn nɔ kɛr ɛni myuzishian to am.”
^ Insay Arameik, “ɛn slip kɔmɔt na in yay.”
^ Ɔ “we bin dɔn tɔk bad bɔt Daniɛl fɔ pwɛl in nem.”
^ Ɔ “go gɛt rayt fɔ rul.”
