Faylimɔn 1:1-25
1 Mi, Pɔl, we na prizina fɔ Krays Jizɔs in sek, a de wit Timoti wi brɔda. A de rayt to Faylimɔn wi kɔmpin wokman we wi rili lɛk,
2 ɛn to Apfia wi sista, ɛn to Akipɔs, we na wi kɔmpin sojaman, ɛn to di kɔngrigeshɔn we de na yu os.
3 Lɛ Gɔd, wi Papa, ɛn Masta Jizɔs Krays dɛn spɛshal gudnɛs* ɛn pis de pan una.
4 A kin tɛl mi Gɔd tɛnki ɔltɛm we a mɛmba yu we a de pre,
5 we a de yɛri bɔt yu fet ɛn di lɔv we yu gɛt fɔ Masta Jizɔs ɛn fɔ ɔl di oli wan dɛn.
6 A de pre mek di fet we yu ɛn ɔda pipul dɛn gɛt mek yu no ɔl di gud tin dɛn we Krays mek wi gɛt.
7 Mi brɔda, we a yɛri bɔt di lɔv we yu gɛt, yu mek a gladi ɛn a gɛt kɔrej, bikɔs yu mek di oli wan dɛn fil fayn.
8 So na dis mek, pan ɔl we a de rili fil fri fɔ tɛl yu fɔ du wetin rayt bikɔs a gɛt wanwɔd wit Krays,
9 a nɔ go du dat, bifo dat, a go beg yu bikɔs ɔf di lɔv we yu gɛt, bikɔs mi, Pɔl, na man we dɔn ol ɛn mi na prizina bak fɔ Krays Jizɔs in sek.
10 A de beg yu fɔ mi pikin, Onɛsimɔs, we a dɔn bi papa to we a de na prizin.
11 Trade i nɔ bin gɛt wan yus to yu, bɔt naw i dɔn gɛt yus to yu ɛn to mi.
12 A de sɛn am bak to yu, di wan we a rili lɛk.
13 A go lɛk fɔ mek i de ya wit mi so dat i go tek yu ples fɔ de ɛp mi we a de na prizin fɔ di gud nyuz in sek.
14 Bɔt a nɔ want fɔ du ɛnitin we yu nɔ gri wit, so dat a nɔ go fos yu fɔ du gud, bɔt yu go du am bikɔs na dat yu want.
15 Sɔntɛm na dis rili mek i kɔmɔt nia yu fɔ shɔt tɛm,* so dat yu go gɛt am bak sote go,
16 bɔt nɔto as slev igen, bɔt as pɔsin we pas slev, as brɔda we wi rili lɛk, we a lɛk bad ɛn we yu lɛk mɔ as slev ɛn as pɔsin we biliv di Masta.
17 So if yu tek mi as yu padi, wɛlkɔm am fayn, lɛk aw yu go wɛlkɔm mi.
18 Pantap dat, if i dɔn du yu ɛnitin we bad ɔ i o yu ɛnitin, a go pe fɔ am.
19 Mi, Pɔl, a de rayt wit mi yon an: A go pe yu bak—a nɔ de tɔk bɔt di o we yu o mi yu yon layf.
20 Mi brɔda, du dis fɔ mi bikɔs wi gɛt wanwɔd wit di Masta; mek lɛ a fil fayn bikɔs wi gɛt wanwɔd wit Krays.
21 A biliv se yu go du am, so a de rayt to yu, bikɔs a no se yu go ivin du pas wetin a se.
22 Pantap dat, rɛdi ples fɔ mi usay a go de, bikɔs a de op se di pre we una de pre fɔ mi go mek a kam bak to una.*
23 Ɛpafras, we na mi kɔmpin prizina we gɛt wanwɔd wit Krays Jizɔs, de grit yu,
24 ɛn Mak, Aristakɔs, Dimas, ɛn Lyuk we na mi kɔmpin wokman dɛn, dɛnsɛf de grit yu.
25 Mek wi Masta Jizɔs Krays in spɛshal gudnɛs* de pan una we una de sho se una gɛt gud kwaliti dɛn.
Futnot Dɛn
^ Rid Baybul Wɔd dɛn Minin.
^ Insay Grik, “wan awa.”
^ Ɔ “dɛn fri mi fɔ una.”
^ Rid Baybul Wɔd dɛn Minin.
