Jɔn 13:1-38
13 Jizɔs bin no bifo di Pasova fɛstival se in tɛm dɔn kam fɔ mek i lɛf dis wɔl ɛn go bak to di Papa, ɛn bikɔs i bin lɛk in yon dɛn we de na di wɔl, i kɔntinyu fɔ lɛk dɛn te to di ɛnd.
2 We dɛn de it di ivintɛm it, di Dɛbul bin dɔn ɔlrɛdi mek Judas Iskariɔt, we na Saymɔn in pikin, want fɔ ɛp pipul dɛn fɔ arɛst Jizɔs.
3 So bikɔs Jizɔs no se in Papa dɔn put ɔltin na in an, ɛn i no se i kɔmɔt to Gɔd ɛn i de go to Gɔd,
4 i grap we dɛn de it di ivintɛm it ɛn pul in klos we i wɛr pantap ɛn put am wansay. Dɔn i tek wan tawɛl ɛn tay am na in midul.
5 Afta dat i put wata insay wan bol ɛn bigin fɔ was in disaypul dɛn fut, dɔn i wep dɛn fut wit di tawɛl we i tay pan insɛf.
6 Dɔn i kam to Saymɔn Pita. Pita aks am se: “Masta, yu want fɔ was mi fut?”
7 Jizɔs tɛl am se: “Yu nɔ go ɔndastand wetin a de du naw, bɔt yu go ɔndastand leta.”
8 Pita tɛl am se: “Yu nɔ go ɛva was mi fut.” Jizɔs tɛl am se: “If a nɔ was yu, yu nɔ go de wit mi.”
9 Saymɔn Pita tɛl am se: “Masta, nɔ jɔs was mi fut nɔmɔ, bɔt was mi an dɛn ɛn mi ed bak.”
10 Jizɔs tɛl am se: “Pɔsin we dɔn was jɔs nid fɔ was in fut, bikɔs in wan ol bɔdi klin. Ɛn una klin, bɔt nɔto una ɔl klin.”
11 I bin no di man we go ɛp pipul dɛn fɔ arɛst am. Na dat mek i se: “Nɔto una ɔl klin.”
12 We i dɔn was dɛn fut dɔn ɛn wɛr di klos we i bin wɛr pantap, i sidɔm bak na di tebul ɛn aks dɛn se: “Una ɔndastand wetin a dɔn du to una?
13 Una de kɔl mi ‘Ticha’ ɛn ‘Masta,’ ɛn na di rayt tin una de du, bikɔs mi na Ticha ɛn Masta.
14 So if mi we na di Masta ɛn Ticha dɔn was una fut, unasɛf fɔ was una kɔmpin dɛn fut.
15 A dɔn sho una wetin una fɔ du. Di tin we a du to una, na in unasɛf fɔ du.
16 Fɔ tru, a de tɛl una se slev nɔ pas in masta, ɛn di wan we dɛn sɛn nɔ pas di wan we sɛn am.
17 If una no dɛn tin ya, una go gladi if una du dɛn.
18 Nɔto una ɔl a de tɔk bɔt; a no di wan dɛn we a dɔn pik. Bɔt dis de apin so dat wetin di skripchɔ bin dɔn tɔk go apin, we i se: ‘Di wan we bin de it mi bred dɔn tɔn agens mi.’
19 Naw a de tɛl una bifo i apin, so dat we i apin una go biliv se mi na in.
20 Fɔ tru, a de tɛl una se ɛnibɔdi we wɛlkɔm di wan we a sɛn dɔn wɛlkɔm mi, ɛn ɛnibɔdi we wɛlkɔm mi dɔn wɛlkɔm di Wan we sɛn mi.”
21 Afta Jizɔs tɔk dɛn tin ya, in at pwɛl ɛn i tɔk se: “Fɔ tru, a de tɛl una se wan pan una go ɛp pipul dɛn fɔ arɛst mi.”
22 Di disaypul dɛn bigin fɔ luk dɛnsɛf ɛn dɛn nɔ bin no uswan pan dɛn i de tɔk bɔt.
23 Di disaypul we Jizɔs lɛk bin ling nia* am.
24 So Saymɔn Pita mek sayn to am wit in ed ɛn tɛl am se: “Tɛl wi udat i de tɔk bɔt.”
25 So di disaypul ling na Jizɔs in chɛst ɛn aks am se: “Masta, na udat?”
26 Jizɔs tɛl am se: “Na di wan we a go gi di bred we a put insay di sup.” So afta i put di bred insay di sup, i gi am to Judas we na Saymɔn Iskariɔt in pikin.
27 We Judas tek di bred, na de Setan go insay am. So Jizɔs tɛl am se: “Wetin yu want fɔ du, du am kwik kwik wan.”
28 Bɔt ɔl di wan dɛn we ling nia di tebul nɔ no wetin mek i tɛl am dat.
29 Sɔm pan dɛn bin de tink se bikɔs na Judas bin de ol di mɔni bɔks, na in mek Jizɔs tɛl am se, “Bay wetin wi nid fɔ di fɛstival,” ɔ i fɔ gi sɔntin to di po pipul dɛn.
30 So afta i tek di bred, i go na do wantɛm wantɛm. Ɛn na bin nɛt.
31 We i dɔn go na do, Jizɔs se: “Naw mɔtalman Pikin de gɛt glori, ɛn Gɔd insɛf de gɛt glori tru am.
32 Na Gɔd insɛf go gi am ɔnɔ, ɛn i go ɔnɔ am wantɛm wantɛm.
33 Smɔl pikin dɛn, a nɔ go de wit una fɔ lɔng tɛm igen. Una go luk fɔ mi; ɛn jɔs lɛk aw a tɛl di Ju dɛn, a de tɛl una bak se, ‘Usay a de go, una nɔ go ebul fɔ kam de.’
34 A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una.
35 If una lɛk una kɔmpin dɛn, ɔlman go no se una na mi disaypul dɛn.”
36 Saymɔn Pita aks am se: “Masta, usay yu de go?” Jizɔs tɛl am se: “Yu nɔ go ebul fɔ fala mi usay a de go naw, bɔt yu go fala mi leta.”
37 Pita tɛl am se: “Masta, wetin mek a nɔ go ebul fɔ fala yu naw? A go day fɔ yu sek.”
38 Jizɔs aks am se: “Yu go day fɔ mi sek? Fɔ tru, a de tɛl yu se fɔl* nɔ go kro pas te yu dinay tri tɛm se yu nɔ no mi.”
