Jɔn 17:1-26
17 Afta Jizɔs tɔk dɛn tin ya, i luk ɔp ɛn tɔk se: “Papa, di tɛm dɔn kam. Ɔnɔ yu pikin so dat yu pikin go ɔnɔ yu,
2 jɔs lɛk we yu dɔn gi am pawa oba ɔlman,* so dat i go gi layf we go de sote go to ɔl di wan dɛn we yu dɔn gi am.
3 Fɔ gɛt layf we go de sote go, dɛn fɔ no yu,* we na di wangren tru Gɔd, ɛn di wan we yu sɛn, Jizɔs Krays.
4 A dɔn ɔnɔ yu na di wɔl, ɛn a dɔn dɔn di wok we yu gi mi fɔ du.
5 So naw, Papa, ɔnɔ mi nia yu wit di ɔnɔ we a bin gɛt nia yu bifo di wɔl bigin.
6 “A dɔn mek di wan dɛn we yu gi mi na di wɔl no yu nem. Na yu bin gɛt dɛn; yu gi dɛn to mi, ɛn dɛn dɔn obe yu wɔd.
7 Naw dɛn dɔn no se ɔl wetin a gɛt na yu gi mi;
8 bikɔs a dɔn tɛl dɛn wetin yu tɛl mi, ɛn dɛn dɔn biliv ɛn rili no se na to yu a kɔmɔt, ɛn dɛn dɔn biliv se na yu sɛn mi.
9 A de pre fɔ dɛn; a nɔ de pre fɔ di wɔl, bɔt a de pre fɔ di wan dɛn we yu dɔn gi mi, bikɔs na yu yon dɛn.
10 Ɛn ɔl wetin a gɛt na yu yon ɛn wetin na yu yon na mi yon, ɛn a dɔn gɛt ɔnɔ we a de wit dɛn.
11 “A nɔ de na di wɔl igen, a de kam to yu, bɔt dɛn de na di wɔl. Papa we Oli, protɛkt dɛn bikɔs ɔf yu nem we yu dɔn gi mi, so dat dɛn go bi wan* jɔs lɛk aw wi na wan.*
12 We a bin de wit dɛn, a bin de wach dɛn bikɔs ɔf yu nem we yu dɔn gi mi; ɛn a dɔn protɛkt dɛn, ɛn nɔn pan dɛn nɔ lɔs pas di bɔypikin we dɛn go dɔnawe wit, so dat wetin di skripchɔ bin dɔn tɔk go apin.
13 Bɔt naw a de kam to yu, ɛn a de se dɛn tin ya na di wɔl, so dat dɛn go rili gladi lɛk aw a gladi.
14 A dɔn tɛl dɛn yu wɔd, bɔt di wɔl dɔn et dɛn, bikɔs dɛn nɔ tan lɛk di pipul dɛn na di wɔl, jɔs lɛk aw a nɔ tan lɛk di pipul dɛn na di wɔl.
15 “A nɔ de pre mek yu pul dɛn kɔmɔt na di wɔl, a de pre mek yu protɛkt dɛn bikɔs ɔf di wikɛd wan.
16 Dɛn nɔ tan lɛk di pipul dɛn na di wɔl, jɔs lɛk aw a nɔ tan lɛk di pipul dɛn na di wɔl.
17 Mek lɛ di trut mek dɛn oli, bikɔs yu wɔd na trut.
18 Jɔs lɛk aw yu sɛn mi na di wɔl, misɛf dɔn sɛn dɛn na di wɔl.
19 Ɛn a de mek misɛf oli fɔ dɛn sek, so dat di trut go mek dɛnsɛf oli.
20 “A nɔ de pre nɔmɔ fɔ dɛn wan ya, bɔt a de pre bak fɔ di wan dɛn we go put fet pan mi afta dɛn dɔn lisin to wetin dɛn wan ya tich,
21 so dat dɛn ɔl go bi wan, jɔs lɛk we yu, Papa, gɛt wanwɔd wit mi ɛn a gɛt wanwɔd wit yu; lɛ dɛnsɛf go gɛt wanwɔd wit wi, so dat di wɔl go biliv se na yu sɛn mi.
22 A dɔn gi dɛn di ɔnɔ we yu gi mi so dat dɛn go bi wan jɔs lɛk aw wi na wan.
23 A gɛt wanwɔd wit dɛn ɛn yu gɛt wanwɔd wit mi, so dat dɛn go rili bi wan, ɛn di wɔl go no se na yu sɛn mi, ɛn yu lɛk dɛn jɔs lɛk aw yu lɛk mi.
24 Papa, a want mek di wan dɛn we yu dɔn gi mi de wit mi usay a de, so dat dɛn go si di ɔnɔ we yu dɔn gi mi, bikɔs yu lɛk mi bifo di wɔl bigin.
25 Papa we De Du Wetin Rayt, fɔ tru, di wɔl nɔ no yu, bɔt a no yu, ɛn dɛn wan ya we yu dɔn gi mi no se na yu sɛn mi.
26 A dɔn mek dɛn no yu nem, ɛn a go kɔntinyu fɔ mek dɛn no am, so dat dɛn go lɛk ɔda pipul dɛn di sem we aw yu lɛk mi, so dat a go gɛt wanwɔd wit dɛn.”
Futnot Dɛn
^ Ɔ “mɔtalman; pipul dɛn.”
^ Ɔ “dɛn fɔ kɔntinyu fɔ lan bɔt yu.”
^ Ɔ “gɛt wanwɔd.”
^ Ɔ “gɛt wanwɔd.”
