Jɔn 18:1-40
18 Afta Jizɔs tɔk dɛn tin ya, in ɛn in disaypul dɛn krɔs di Kidrɔn Vali ɛn go na wansay we gadin bin de, dɔn in ɛn in disaypul dɛn go insay de.
2 Judas, we ɛp pipul dɛn fɔ arɛst am, bin no di ples, bikɔs Jizɔs bin dɔn go de bɔku tɛm wit in disaypul dɛn.
3 So Judas briŋ sojaman dɛn ɛn ɔfisa dɛn we de ɔnda di edman dɛn fɔ di prist dɛn ɛn di Faresi dɛn. Dɛn kam wit tik dɛn we gɛt faya pan dɛn,* lamp dɛn, ɛn wɛpɔn dɛn.
4 Dɔn, bikɔs Jizɔs bin no ɔl di tin dɛn we go apin to am, i kam bifo ɛn aks dɛn se: “Udat una de luk fɔ?”
5 Dɛn ansa am se: “Jizɔs di Nazarin.” I tɛl dɛn se: “Na mi dis.” Da tɛm de, Judas we ɛp pipul dɛn fɔ arɛst am, insɛf bin tinap wit dɛn.
6 Bɔt we Jizɔs tɛl dɛn se, “Na mi dis,” dɛn push go biɛn ɛn fɔdɔm na grɔn.
7 So i aks dɛn bak se: “Udat una de luk fɔ?” Dɛn se: “Jizɔs di Nazarin.”
8 Jizɔs tɛl dɛn se: “A dɔn tɛl una se na mi dis. So if una de luk fɔ mi, una mek lɛ dɛn man ya go.”
9 Dis apin so dat wetin i bin dɔn tɔk go apin. I bin dɔn tɔk se: “A nɔ lɔs ɛniwan pan di wan dɛn we yu dɔn gi mi.”
10 Dɔn Saymɔn Pita we bin gɛt sɔd, pul am ɛn kɔt di ay prist in slev in rayt yes kɔmɔt. Di slev in nem na Malkɔs.
11 Bɔt Jizɔs tɛl Pita se: “Put di sɔd usay yu pul am. Yu nɔ tink se a fɔ drink na di kɔp we di Papa dɔn gi mi?”
12 Dɔn di sojaman dɛn ɛn dɛn kɔmanda wit di Ju ɔfisa dɛn ol* Jizɔs ɛn tay am.
13 Dɛn kɛr am go fɔs to Anas. Anas na bin Keyafas in fadɛnlɔ, ɛn Keyafas na bin di ay prist da ia de.
14 Infakt, na Keyafas bin dɔn advays di Ju dɛn se dɛn go bɛnifit if wan man day fɔ di pipul dɛn.
15 Da tɛm de, Saymɔn Pita ɛn wan ɔda disaypul bin de fala Jizɔs. Di ay prist bin no di ɔda disaypul, ɛn i fala Jizɔs go insay di ay prist in kɔmpawnd,
16 bɔt Pita bin tinap na do bay di domɔt. So di ɔda disaypul, we di ay prist no, go na do ɛn tɔk to di pɔsin we bin de wach di get ɛn briŋ Pita kam insay.
17 Di savant gal we bin de wach di get, aks Pita se: “Yusɛf na wan pan dis man in disaypul dɛn, nɔto so?” Pita ansa se: “Mi nɔto wan pan dɛn.”
18 Di slev dɛn ɛn di ɔfisa dɛn bin tinap rawnd wan chakol-faya we dɛn dɔn mek, bikɔs di ples bin kol ɛn dɛn bin de wam dɛnsɛf. Pita insɛf bin tinap wit dɛn de wam in bɔdi.
19 So di edman fɔ di prist dɛn aks Jizɔs kwɛstyɔn bɔt in disaypul dɛn ɛn bɔt di tin dɛn we i de tich.
20 Jizɔs ansa am se: “A dɔn tɔk bifo ɔlman. A kin tich ɔltɛm na sinagɔg* ɛn na di tɛmpul usay ɔl di Ju dɛn kin kam togɛda ɛn a nɔ tɔk natin sikrit wan.
21 Wetin mek yu de aks mi kwɛstyɔn? Aks di wan dɛn we yɛri wetin a tɛl dɛn. Dɛn no wetin a se.”
22 Afta Jizɔs tɔk dɛn tin ya, wan pan di ɔfisa dɛn we tinap nia de slap Jizɔs na in fes ɛn aks am se: “Na so fɔ tɔk to di edman fɔ di prist dɛn?”
23 Jizɔs ansa am se: “If wetin a tɔk nɔ rayt, pruv se a nɔ rayt; bɔt if na di rayt tin a tɔk, wetin mek yu slap mi?”
24 Dɔn Anas sɛn Jizɔs go to Keyafas we na di ay prist. Jizɔs in an bin tay.
25 Saymɔn Pita bin tinap de, de wam in bɔdi. Dɔn dɛn aks am se: “Yusɛf na wan pan in disaypul dɛn, nɔto so?” I dinay ɛn tɔk se: “Mi nɔto wan pan dɛn.”
26 Wan pan di ay prist in slev dɛn we na fambul to di man we na in yes Pita bin kɔt, tɔk se: “A si yu na di gadin wit am, nɔto so?”
27 Bɔt Pita dinay bak, ɛn wantɛm wantɛm fɔl* kro.
28 Dɛn pul Jizɔs to Keyafas ɛn kɛr am go na di gɔvnɔ in os. Na bin ali mɔnin. Bɔt dɛn nɔ go insay di gɔvnɔ in os, so dat dɛn nɔ go dɔti dɛnsɛf, bikɔs dɛn bin want it di Pasova.
29 So Paylet kɔmɔt na do ɛn aks dɛn se: “Us bad tin dis man du?”
30 Dɛn ansa am se: “If dis man nɔ bin du bad, wi nɔ fɔ dɔn briŋ am kam to yu.”
31 So Paylet tɛl dɛn se: “Una tek am ɛn jɔj am lɛk aw una lɔ se.” Di Ju dɛn tɛl am se: “Wi nɔ gɛt rayt fɔ kil ɛnibɔdi.”
32 Dis bi so dat wetin Jizɔs bin dɔn tɔk bɔt di kayn we aw i go day, go apin.
33 So Paylet go insay di gɔvnɔ in os bak ɛn kɔl Jizɔs ɛn aks am se: “Na yu na di Kiŋ fɔ di Ju Dɛn?”
34 Jizɔs aks am se: “Yu de aks dis bay yusɛf, ɔ na bikɔs ɔda pipul dɛn tɛl yu bɔt mi?”
35 Paylet tɛl am se: “Mi nɔto Ju. Mi na Ju? Na yu yon pipul dɛn ɛn di edman dɛn fɔ di prist dɛn kam wit yu to mi. Wetin yu du?”
36 Jizɔs ansa am se: “Mi Kiŋdɔm nɔ de na dis wɔl. If mi Kiŋdɔm bin de na dis wɔl, di wan dɛn we de fala mi fɔ dɔn fɛt mek dɛn nɔ gi mi to di Ju dɛn. Bɔt mi Kiŋdɔm nɔ de na ya.”
37 So Paylet aks am se: “So yu na kiŋ?” Jizɔs ansa am se: “Yusɛf sɛf de tɔk se mi na kiŋ. Na dat mek dɛn bɔn mi, ɛn na dat mek a kam na di wɔl fɔ tɔk bɔt di trut. Ɛnibɔdi we de fɔ di trut de lisin to mi vɔys.”
38 Paylet aks am se: “Wetin na trut?”
Afta i aks am, i go bak na do to di Ju dɛn ɛn tɛl dɛn se: “A nɔ si ɛni fɔlt pan dis man.
39 Ɛn ɛnitɛm we di Pasova kam una se a fɔ fri wan pɔsin fɔ una. So una want mek a fri di Kiŋ fɔ di Ju Dɛn?”
40 Na in dɛn ala bak se: “Nɔ fri dis man, fri Barabas!” Barabas na bin tifman.
Futnot Dɛn
^ Dat na, tik dɛn we dɛn kin yuz as layt.
^ Ɔ “arɛst.”
^ Rid Baybul Wɔd dɛn Minin.
^ Insay Grik, “kak.”
