Jɔn 2:1-25
2 Di tɔd de, mared pati bin de na Kena we de na Galili ɛn Jizɔs in mama bin de de.
2 Dɛn bin invayt Jizɔs ɛn in disaypul dɛn bak na di mared pati.
3 We di wayn want fɔ dɔn, Jizɔs in mama tɛl am se: “Dɛn nɔ gɛt wayn.”
4 Bɔt Jizɔs aks am se: “Uman, uswan na wi yon de?* Mi tɛm nɔ kam yet.”
5 In mama tɛl di wan dɛn we de sav se: “Una du ɛnitin we i tɛl una.”
6 Siks big kɔntena dɛn we dɛn mek wit ston bin de de fɔ mek di pipul dɛn klin dɛnsɛf jɔs lɛk aw di Ju dɛn lɔ se. Ɛn na tu ɔ tri big bɔkɛt* wata kin go insay ɛniwan pan dɛn.
7 Jizɔs tɛl dɛn se: “Una ful-ɔp di kɔntena dɛn wit wata.” So dɛn ful-ɔp dɛn piŋ.
8 Dɔn i tɛl dɛn se: “Una tek sɔm ɛn go gi di wan we de in chaj ɔf di pati.” So dɛn kɛr am go.
9 We di man we de in chaj ɔf di pati tes di wata we dɔn tɔn to wayn, pan ɔl we i nɔ no usay i kɔmɔt (bɔt di savant dɛn we gɛt di wata bin no), i kɔl di ɔkɔ
10 ɛn tɛl am se: “Ɔlman kin sav di fayn wayn fɔs, dɔn we pipul dɛn dɔn chak, dɛn kin sav di wayn we nɔ fayn bɛtɛ. Yu kip di fayn wayn, na naw yu de pul am.”
11 Na Kena we de na Galili Jizɔs pafɔm in fɔs sayn; i mek dɛn si in glori ɛn in disaypul dɛn gɛt fet pan am.
12 Afta dat in, in mama, in brɔda dɛn, ɛn in disaypul dɛn go dɔŋ na Kepanyɔm, bɔt dɛn jɔs tek tu-tri dez de.
13 Di tɛm fɔ lɛ di Ju dɛn sɛlibret di Pasova bin dɔn kam nia, ɛn Jizɔs go ɔp na Jerusɛlɛm.
14 I si di wan dɛn we de sɛl kaw, ship, ɛn dɔv dɛn na di tɛmpul, ɛn i si di wan dɛn we de chenj mɔni sidɔm na dɛn sidɔmples.
15 So i tek rop dɛn ɛn mek wip, dɔn i drɛb ɔl di wan dɛn we de sɛl ship ɛn kaw na di tɛmpul, ɛn i trowe di kɔyn dɛn we di wan dɛn we bin de chenj mɔni de yuz ɛn tɔnoba dɛn tebul dɛn.
16 Ɛn i tɛl di wan dɛn we de sɛl di dɔv dɛn se: “Una pul dɛn tin ya kɔmɔt na ya! Una lɛf fɔ tɔn mi Papa in os to makit!”
17 In disaypul dɛn mɛmba wetin rayt na di Skripchɔ se: “Di zil we a gɛt fɔ yu os go bɔn insay mi.”
18 So we di Ju dɛn si dat, dɛn aks am se: “Us sayn yu go sho wi fɔ pruv se yu gɛt rayt fɔ du dɛn tin ya?”
19 Jizɔs ansa dɛn se: “Una brok dis tɛmpul, ɛn insay tri dez a go bil am bak.”
20 Di Ju dɛn aks am se: “Na 46 ia dɛn tek fɔ bil dis tɛmpul, yu go ebul bil am insay tri dez?”
21 Bɔt na in bɔdi i bin min we i de tɔk bɔt di tɛmpul.
22 We i gɛt layf bak, in disaypul dɛn mɛmba se i bin dɔn de tɔk bɔt dis, ɛn dɛn biliv di skripchɔ ɛn wetin Jizɔs bin dɔn tɔk.
23 Bɔt we i bin de na Jerusɛlɛm fɔ di Pasova fɛstival, bɔku pipul dɛn gɛt fet pan am* we dɛn si di sayn dɛn we i de pafɔm.
24 Bɔt Jizɔs nɔ bin rili biliv dɛn bikɔs i no dɛn ɔl
25 ɛn i nɔ nid ɛnibɔdi fɔ tɛl am bɔt mɔtalman, bikɔs i no wetin de insay mɔtalman in at.
Futnot Dɛn
^ Insay Grik, “Wetin to mi ɛn to yu, uman?” Dis na di we aw pipul dɛn bin de tɔk fɔ sho se dɛn nɔ gri wit sɔntin. We Jizɔs yuz di wɔd “uman,” i nɔ min se i fityay.
^ I go bi se na di bat mɛzhɔmɛnt we ikwal to 22 lita (5.81 galɔn). Dɛn bin de yuz di bat mɛzhɔmɛnt fɔ mɛzhɔ watawata sɔntin.
^ Insay Grik, “in nem.”
