Jɔn 3:1-36
3 Wan man bin de we nem Nikodimɔs. Na bin Faresi ɛn lida fɔ di Ju dɛn.
2 I go to Jizɔs na nɛt ɛn tɛl am se: “Ticha,* wi no se yu na ticha we Gɔd sɛn, bikɔs nɔbɔdi nɔ go ebul fɔ du di sayn dɛn we yu de du pas Gɔd de wit am.”
3 Jizɔs tɛl am se: “Fɔ tru, a de tɛl yu se if pɔsin nɔ bɔn bak,* i nɔ go si Gɔd in Kiŋdɔm.”
4 Nikodimɔs aks am se: “Aw dɛn go bɔn pɔsin bak we i dɔn ol? I nɔ go ebul go insay in mama in bɛlɛ di sɛkɔn tɛm fɔ mek dɛn bɔn am bak; i go ebul?”
5 Jizɔs ansa se: “Fɔ tru, a de tɛl yu se if pɔsin nɔ bɔn frɔm wata ɛn spirit, i nɔ go go insay Gɔd in Kiŋdɔm.
6 Na mɔtalman, mɔtalman de bɔn, bɔt di wan we bɔn frɔm di spirit na spirit.
7 Nɔ sɔprayz bikɔs a tɛl yu se: Una fɔ bɔn bak.
8 Di briz de blo usay i want fɔ blo, ɛn yu de yɛri am, bɔt yu nɔ no usay i kɔmɔt ɛn usay i de go. Na so i kin bi to di wan we bɔn frɔm di spirit.”
9 Nikodimɔs aks am se: “Aw dɛn tin ya go bi?”
10 Jizɔs ansa am se: “Yu na ticha na Izrɛl ɛn yu nɔ no dɛn tin ya?
11 Fɔ tru, a de tɛl yu se na wetin wi no na in wi de tɔk bɔt, ɛn na wetin wi dɔn si na in wi de tɔk bɔt, bɔt una nɔ biliv wetin wi tɔk.
12 If yu nɔ biliv we a tɛl yu bɔt tin dɛn we de na dis wɔl, aw yu go biliv if a tɛl yu bɔt tin dɛn we de na ɛvin?
13 Pantap dat, no mɔtalman nɔ ɛva go na ɛvin pas mɔtalman Pikin we kɔmɔt na ɛvin kam dɔŋ.
14 Ɛn jɔs lɛk aw Mozis bin es di snek ɔp na di wildanɛs,* na so dɛn go es mɔtalman Pikin ɔp,
15 so dat ɛnibɔdi we biliv am go gɛt layf we go de sote go.
16 “Bikɔs Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.
17 Gɔd nɔ sɛn in Pikin na di wɔl fɔ kam jɔj di wɔl, bɔt i sɛn am fɔ lɛ di wɔl sev.
18 Dɛn nɔ go jɔj ɛnibɔdi we sho se i gɛt fet pan am. Dɛn dɔn ɔlrɛdi jɔj ɛnibɔdi we nɔ sho se i gɛt fet pan am, bikɔs i nɔ sho se i gɛt fet pan Gɔd in wangren Pikin in nem, di Pikin we Gɔd insɛf sɛf mek.
19 Di layt dɔn kam na di wɔl, bɔt pipul dɛn nɔ lɛk di layt, bifo dat, na di daknɛs dɛn lɛk bikɔs dɛn de du wetin bad, ɛn na dat mek dɛn go jɔj dɛn.
20 Ɛnibɔdi we de du bad et di layt, ɛn i nɔ de kam na di layt, so dat di bad tin dɛn we i de du nɔ go kɔmɔt na do.
21 Bɔt ɛnibɔdi we de du wetin rayt de kam na di layt, so dat pipul dɛn go si se i de du wetin Gɔd want.”
22 Afta dat Jizɔs ɛn in disaypul dɛn go na di vilej dɛn we de nia Judia. I spɛn sɔm tɛm wit dɛn de ɛn bin de baptayz pipul dɛn.
23 Bɔt Jɔn insɛf bin de baptayz na Inɔn nia Selim bikɔs bɔku bɔku wata bin de de, ɛn pipul dɛn bin de go mit am, ɛn i de baptayz dɛn.
24 Da tɛm de, dɛn nɔ put Jɔn na prizin yet.
25 Jɔn in disaypul dɛn ɛn wan Ju bin de agyu bɔt aw pɔsin go klin na Gɔd in yay.
26 So dɛn go mit Jɔn ɛn tɛl am se: “Ticha,* da man we bin de wit yu oba di Jɔdan we yu bin tɔk bɔt, de baptayz pipul dɛn, ɛn ɔlman de go to am.”
27 Jɔn tɛl dɛn se: “Pɔsin nɔ go gɛt ɛnitin if Gɔd we de na ɛvin nɔ gi am.
28 Unasɛf sɛf yɛri we a bin tɔk se, ‘Mi nɔto di Krays, bɔt dɛn sɛn mi fɔ go bifo am.’
29 Na di ɔkɔ gɛt di yawo. Bɔt we di ɔkɔ in padi tinap ɛn yɛri di ɔkɔ in vɔys, i de gladi pasmak. So a rili gladi.
30 Mɔ ɛn mɔ pipul dɛn go fala da wan de, bɔt di wan dɛn we de fala mi go de ridyus.”
31 Di wan we kɔmɔt ɔp de oba ɔlman. Di wan we de na dis wɔl kɔmɔt na dis wɔl, ɛn i de tɔk bɔt tin dɛn we de na dis wɔl. Di wan we kɔmɔt na ɛvin de oba ɔlman.
32 Na wetin i dɔn si ɛn yɛri na in i de tɔk, bɔt nɔbɔdi nɔ biliv wetin i de tɔk.
33 Ɛnibɔdi we dɔn biliv wetin i tɔk dɔn rili biliv se Gɔd de tɔk tru.
34 Di wan we Gɔd sɛn de tɔk wetin Gɔd tɛl am fɔ tɔk, bikɔs we i de gi di spirit, i nɔ de gi smɔl.*
35 Di Papa lɛk di Pikin, ɛn I dɔn put ɔltin na in an.
36 Di wan we sho se i gɛt fet pan di Pikin go gɛt layf we go de sote go; di wan we nɔ de obe di Pikin nɔ go gɛt layf, ɛn Gɔd go vɛks pan am ɔltɛm.
Futnot Dɛn
^ Insay Grik, “Rabay.”
^ Ɔ i kin bi “bɔn frɔm ɛvin.”
^ Rid Baybul Wɔd dɛn Minin.
^ Insay Grik, “Rabay.”
^ Ɔ “i nɔ de mɛzhɔ am.”
