Joɛl 2:1-32
2 “Blo ɔn na Zayɔn!
Ala lawd wan na mi oli mawntin se wɔ de kam.
Lɛ ɔl di pipul dɛn na di land* trimbul,Bikɔs Jiova in de de kam! I dɔn kam nia!
2 Da de de di ples go dak bad bad wan,Da de de di klawd go rili dak,Lɛk ali mɔnin layt we di mawntin dɛn kin blɔk.
Pipul dɛn de we bɔku ɛn pawaful;Dɛn kayn nɔ ɛva de,Ɛn dɛn nɔ go ɛva de igenInsay ɔl di jɛnɛreshɔn dɛn we go kam.
3 Faya de bɔn ɔl wetin de bifo dɛnƐn ɔl wetin de biɛn dɛn.
Di land we de bifo dɛn tan lɛk di gadin na Idɛn,Bɔt di land we de biɛn dɛn tan lɛk wildanɛs* we nɔbɔdi nɔ de,Ɛn natin nɔ de ɛskep.
4 Dɛn tan lɛk ɔs dɛn,Ɛn dɛn de rɔn lɛk ɔs dɛn we dɛn de rayd fɔ go fɛt wɔ.
5 Dɛn sawnd tan lɛk chariɔt dɛn we de jomp pantap mawntin dɛn,Lɛk di sawnd we kin kɔmɔt we faya de bɔn dray gras.
Dɛn tan lɛk we pawaful pipul dɛn gɛda fɔ fɛt.
6 Pipul dɛn go wɔri pasmak bikɔs ɔf dɛn.
Ɛn fred go de na ɔlman in fes.
7 Dɛn de atak lɛk fɛtman dɛn,Dɛn de klem wɔl lɛk sojaman dɛn,Ɔlman de kip na in len,Ɛn nɔbɔdi nɔ de lɛf di say we i de waka.
8 Dɛn nɔ de push dɛnsɛf;Ɛn we dɛn de go bifo, ɔlman de kip na in len.
If wɛpɔn dɛn mek sɔm fɔdɔm,Di ɔda wan dɛn nɔ de kɔmɔt na dɛn layn.
9 Dɛn de rɔsh insay di siti ɛn rɔn pantap di wɔl.
Dɛn de klem fɔ go insay di os dɛn ɛn pas na di winda dɛn lɛk tifman.
10 As dɛn de go, di grɔn de trimbul bifo dɛn ɛn di ɛvin de shek.
Di san ɛn di mun dɔn dak,Ɛn di sta dɛn nɔ de shayn igen.
11 Jiova go tɔk lawd wan bifo in ami, bikɔs dɛn rili bɔku.
Di wan we de du wetin I se pawaful;Jiova in de gret ɛn rili fiaful.
Udat go ebul fɔ bia?”
12 Jiova se, “Ivin naw, una kam bak to mi wit ɔl una at,Una fast ɛn kray lawd wan.
13 Una nɔ jɔs chɛr una klos dɛn, una sho se una dɔn rili ripɛnt,*Ɛn una tɔn bak to una Gɔd Jiova,Bikɔs i gɛt sɔri-at, i de sho masi, i nɔ de vɛks kwik, ɛn i rili gɛt lɔv we nɔ de chenj.I go chenj in maynd ɛn nɔ briŋ di trɔbul igen.
14 Udat no if i go chenj in mayndƐn nɔ du wetin i want fɔ du igen ɛn blɛs una,So dat una go mek fud ɔfrin ɛn drink ɔfrin to Jiova una Gɔd?
15 Blo ɔn na Zayɔn!
Anawns se una fɔ fast; kɔl di pipul dɛn fɔ gɛda ɛn dɛn fɔ siriɔs we dɛn kam.
16 Gɛda di pipul dɛn; mek di kɔngrigeshɔn oli.
Gɛda di bigman dɛn; gɛda di pikin dɛn ɛn di yɔŋbebi dɛn.
Lɛ di ɔkɔ kɔmɔt na in rum ɛn mek di yawo kɔmɔt na in rum.
17 Lɛ di prist dɛn we na Jiova in wokman dɛnGo bitwin di ɔl ɛn di ɔlta ɛn kray ɛn tɔk se:
‘E Jiova, sɔri fɔ yu pipul dɛn;Nɔ mek lɛ yu pipul dɛn shem,Nɔ mek lɛ ɔda neshɔn dɛn rul dɛn.
Wetin mek di pipul dɛn fɔ se, “We dɛn Gɔd?”’
18 Dɔn Jiova go protɛkt in land,Ɛn i go sɔri fɔ in pipul dɛn.
19 Jiova go ansa in pipul dɛn ɛn tɔk se:
‘A go gi una fud, nyu wayn, ɛn ɔyl,Ɛn una go rili satisfay;A nɔ go mek una shem igen bifo ɔda neshɔn dɛn.
20 A go drɛb di wan we kɔmɔt na di nɔt fa frɔm una;Ɛn a go rɔnafta am go na land we dray ɛn we pipul dɛn nɔ de.In fes go tɔn to di si* we de na di ist,Ɛn in bak go tɔn to di si* we de na di wɛst.
Bad sɛnt go kɔmɔt pan am,Ɛn di bad sɛnt we go kɔmɔt pan am go go ɔlsay;Bikɔs I go du wɔndaful tin dɛn.’
21 E land, nɔ fred.
Gladi pasmak, bikɔs Jiova go du wɔndaful tin dɛn.
22 Una dɛn wayl animal dɛn, una nɔ fred,Bikɔs di gras na di wildanɛs* go grin,Ɛn di stik dɛn go bia frut;Di fig stik ɛn di vayn go bia bɔku bɔku wan.
23 Una di bɔypikin dɛn na Zayɔn,Una gladi pasmak fɔ Jiova we na una Gɔd;Bikɔs i go gi una ren kwik, di wan we go du fɔ una,Ɛn i go mek ren kam bɔku wan,
Di wan we de kam kwik* ɛn di wan we de kam let,*
Jɔs lɛk aw i bin de bi trade.
24 Di say we dɛn de pul sid pan plantGo ful-ɔp wit sid dɛn we nɔ gɛt wan kanda,
Ɛn nyu wayn ɛn ɔyl go bɔku pasmak na di say we dɛn de mek dɛn.
25 Ɛn a go pe una bak fɔ ɔl di ia dɛn we di grasɔpa dɛn dɔn it una plant dɛn,Dat na, di grasɔpa dɛn we machɔ, di grasɔpa dɛn we nɔ gɛt wiŋ,Di grasɔpa dɛn we de it ɔltin, ɛn di grasɔpa dɛn we bigyay,
Mi pawaful amiman dɛn we a sɛn pan una.
26 Una go it ɛn satisfay,Ɛn una go prez Jiova we na una Gɔd in nem,We dɔn du wɔndaful tin dɛn fɔ una;Mi pipul dɛn nɔ go ɛva shem igen.
27 Ɛn una go no se a de wit Izrɛl,Dɔn una go no se mi na Jiova una Gɔd—no ɔda Gɔd nɔ de!
Mi pipul dɛn nɔ go ɛva shem igen.
28 Afta dat, a go put mi spirit pan ɔlkayn pipul dɛn,Ɛn una bɔypikin dɛn ɛn galpikin dɛn go prɔfɛsay,Una ol pa dɛn go drim drim dɛn,Ɛn una yɔŋman dɛn go si vishɔn dɛn.
29 Ɛn dɛn tɛm dɛn de, a go ivin put mi spiritPan mi man slev dɛn ɛn uman slev dɛn.
30 A go mek wɔndaful tin dɛn apin na ɛvin ɛn na di wɔl,Ɛn dɛn go apin wit blɔd, faya, ɛn tik tik smok.
31 Bifo Jiova in de we gret ɛn we fiaful kam,Di san go dak ɛn di mun go rɛd lɛk blɔd.
32 Ɛn ɛnibɔdi we de kɔl Jiova in nem go sev;Jɔs lɛk aw Jiova bin dɔn tɔk,Sɔm pipul dɛn na Mawnt Zayɔn ɛn Jerusɛlɛm go ɛskep,
Di wan dɛn we Jiova dɔn kɔl go sev.”
Futnot Dɛn
^ Ɔ “wɔl.”
^ Rid Baybul Wɔd dɛn Minin.
^ Insay Ibru, “una chɛr una at.”
^ Dat na, di Dɛd Si.
^ Dat na, di Mɛditarenian Si.
^ Rid Baybul Wɔd dɛn Minin.
^ Di ren we de kam kwik kin bigin midul Ɔktoba.
^ Di ren we de kam let kin bigin midul Epril.
