Nɛimaya 13:1-31
13 Da de de, dɛn rid Mozis in buk to di pipul dɛn, ɛn dɛn kam fɔ si se Amɔnayt ɔ Moabayt nɔ fɔ ɛva kam usay di tru Gɔd in pipul dɛn de,
2 bikɔs dɛn nɔ bin gi di Izrɛlayt dɛn bred ɛn wata, bifo dat, dɛn pe Belam fɔ swɛ dɛn. Bɔt wi Gɔd chenj di swɛ to blɛsin.
3 As dɛn yɛri wetin di Lɔ se, dɛn bigin fɔ pul kɔmɔt ɔl di wan dɛn we na fɔrina* dɛn.
4 Bifo dis tɛm, di prist we bin de in chaj ɔf di stɔ dɛn* na wi Gɔd in os* na Ilayashib, we na Tobaya in fambul.
5 Ilayashib bin gi Tobaya wan big stɔ we dɛn bin de yuz fɔ put di fud sakrifays, di frankinsɛns,* di tin dɛn we dɛn de yuz fɔ wok, di tayt fɔ di fud, di nyu wayn, ɛn di ɔyl we di Livayt dɛn, di wan dɛn we de siŋ, ɛn di getman dɛn fɔ gɛt ɛn di kɔntribyushɔn fɔ di prist dɛn.
6 Ɔl dis tɛm, a nɔ bin de na Jerusɛlɛm, a bin go to Kiŋ Atazaksis na Babilɔn insay di 32 ia we i de rul. Afta sɔm tɛm, a bin aks di kiŋ fɔ gi mi liv.
7 Dɔn a kam na Jerusɛlɛm ɛn si di bad bad tin we Ilayashib dɔn du fɔ Tobaya. I gi am wan stɔ na di kɔmpawnd usay di tru Gɔd in os de.
8 Dis bin mek a rili vɛks. So a trowe ɔl di fɔnichɔ dɛn we Tobaya bin kip insay di stɔ.*
9 Afta dat, a tɛl dɛn fɔ klin di stɔ* dɛn, ɛn a put bak di tin dɛn we dɛn de yuz na di tru Gɔd in os, wit di fud sakrifays ɛn di frankinsɛns.*
10 A faynd awt bak se dɛn nɔ bin de gi di Livayt dɛn wetin dɛn fɔ gɛt, so dat mek di Livayt dɛn ɛn di wan dɛn we de siŋ we bin de du di wok, dɛn ɔl dɔn go bak na dɛn yon fam dɛn.
11 So a tɔk pan di dɛpiti rula dɛn ɛn aks dɛn se: “Wetin mek una dɔn fɔgɛt bɔt di tru Gɔd in os?” Dɔn a gɛda dɛn togɛda ɛn put dɛn bak na di say we dɛn fɔ wok.
12 Ɔl di pipul dɛn na Juda sheb wetin dɛn gɛt to tɛn pat ɛn briŋ wan pat pan di it, di nyu wayn, ɛn di ɔyl na di stɔ.
13 Dɔn a put Shɛlimaya di prist, Zedɔk we na man we de kɔpi, ɛn Pɛdaya di Livayt in chaj ɔf di stɔ dɛn ɛn na Enan we na Zakɔ in bɔypikin, we na Matanaya in granpikin bin de ɛp dɛn bikɔs na man dɛn we pɔsin kin abop pan. Na dɛn bin gɛt di wok fɔ sheb wetin de na di stɔ to dɛn brɔda dɛn.
14 E mi Gɔd, duya, mɛmba mi fɔ dis, ɛn nɔ fɔgɛt ɔl wetin a dɔn du fɔ sho mi lɔv we nɔ de chenj fɔ mi Gɔd in os ɛn di wok dɛn we dɛn de du de.
15 Dɛn tɛm dɛn de, a si pipul dɛn na Juda de mas mas greps fɔ mek wayn di Sabat de, dɛn bin de briŋ bɔku bɔku it dɛn we dɛn lod pan dɔnki dɛn, ɛn dɛn bin de briŋ wayn, greps, fig, ɛn ɔlkayn lod dɛn na Jerusɛlɛm di Sabat de. So a wɔn dɛn se dɛn nɔ fɔ sɛl da de de.*
16 Di pipul dɛn frɔm Taya we bin de na di siti bin de briŋ fish ɛn ɔlkayn makit, ɛn sɛl dɛn to di pipul dɛn na Juda ɛn na Jerusɛlɛm di Sabat de.
17 So a tɔk pan di lida dɛn na Juda ɛn aks dɛn se: “Uskayn bad tin una de du so, we de ivin mek di Sabat de nɔ oli?
18 Nɔto dis una gret gret granpa dɛn bin du we mek Gɔd briŋ trɔbul pan wi ɛn dis siti? Naw una de mek Gɔd vɛks pan Izrɛl mɔ ɛn mɔ bikɔs una de mek di Sabat de nɔ oli.”
19 A tɛl dɛn fɔ lɔk di get dɛn na Jerusɛlɛm bifo di ples dak, dat na, bifo di Sabat bigin. A tɛl dɛn bak se dɛn nɔ fɔ opin di get dɛn te afta di Sabat, ɛn a put sɔm pan mi yon savant dɛn na di get dɛn so dat di pipul dɛn nɔ go kam wit ɛni lod na di siti di de fɔ di Sabat.
20 So di biznɛsman dɛn ɛn di wan dɛn we de sɛl ɔlkayn makit nɔ bin ɛnta Jerusɛlɛm ɛn dɛn slip na do wan ɔ tu tɛm.
21 So a wɔn dɛn ɛn aks dɛn se: “Wetin mek una de slip bifo di wɔl? If una du am igen, a go drɛb una bay fos.” Frɔm da tɛm de, dɛn nɔ bin kam igen di Sabat de.
22 Dɔn a tɛl di Livayt dɛn se dɛn fɔ de kip dɛnsɛf oli ɔltɛm ɛn kam gayd di get dɛn, so dat dɛn go mek di Sabat de oli. E mi Gɔd, duya, mɛmba mi bak fɔ dis, ɛn sɔri fɔ mi bikɔs ɔf yu pasmak lɔv we nɔ de chenj.
23 Dɛn tɛm dɛn de, a bin de si Ju dɛn de mared Ashdɔdayt, Amɔnayt, ɛn Moabayt uman dɛn.
24 Af pan dɛn pikin dɛn bin de tɔk Ashdɔdayt ɛn di langwej we difrɛn pipul dɛn de tɔk, bɔt nɔn pan dɛn nɔ bin no aw fɔ tɔk di Ju dɛn langwej.
25 So a tɔk pan dɛn ɛn wɔn dɛn bɔt wetin Gɔd bin se go apin we dɛn du dɛn kayn tin dɛn de. Dɔn a bit sɔm pan dɛn man dɛn ɛn rut dɛn ia ɛn mek dɛn swɛ to Gɔd se: “Una nɔ go mek una galpikin dɛn mared to fɔrina, ɛn una ɔ una bɔypikin dɛn nɔ go mared to fɔrina.
26 Nɔto bikɔs ɔf dɛn tin dɛn ya bin mek Kiŋ Sɔlɔmɔn na Izrɛl sin? Pan ɔl di bɔku neshɔn dɛn no kiŋ nɔ bin tan lɛk am, ɛn in Gɔd bin lɛk am, so i mek am kiŋ na Izrɛl. Bɔt in wɛf dɛn we na fɔrina dɛn bin mek insɛf sin.
27 A nɔ biliv se una go du dis kayn wikɛd tin ɛn sin agens wi Gɔd bay we una mared uman dɛn we na fɔrina!”
28 Wan pan Joyada in bɔypikin dɛn ɛn we na Ilayashib di ay prist in granpikin dɔn bi sɔnɛlɔ to Sanbalat di Ɔrɔnayt. So a drɛb am kɔmɔt nia mi.
29 E mi Gɔd, duya mɛmba dɛn, bikɔs dɛn dɔn dɔti di wok we di prist dɛn de du ɛn di agrimɛnt we di prist dɛn ɛn di Livayt dɛn mek.
30 So a klin di prist ɛn di Livayt dɛn ɛn mek dɛn nɔ gɛt ɛnitin fɔ du wit fɔrina dɛn. Dɔn a gi dɛn ɔl wok fɔ du; ɔlman na in yon say usay i de wok.
31 A arenj bak di patikyula tɛm dɛn fɔ de briŋ kam wud ɛn di fɔs tin dɛn we dɛn avɛst.
E mi Gɔd, mɛmba mi ɛn blɛs mi.
Futnot Dɛn
^ Ɔ “we dɛn mama ɔ papa nɔto Izrɛlayt.”
^ Ɔ “say dɛn fɔ it.”
^ Ɔ “tɛmpul.”
^ Frankinsɛns na tin we gɛt fayn sɛnt.
^ Ɔ “say fɔ it.”
^ Ɔ “say fɔ it.”
^ Frankinsɛns na tin we gɛt fayn sɛnt.
^ Ɔ i kin bi, “a wɔn dɛn da de de se dɛn nɔ fɔ sɛl tin dɛn.”
