Nɛimaya 4:1-23
4 As Sanbalat yɛri se wi de bil di wɔl bak, in at wam, i vɛks pasmak, ɛn i kɔntinyu fɔ provok di Ju dɛn.
2 Ɛn bifo in brɔda dɛn ɛn di sojaman dɛn na Sameria, i tɔk se: “Wetin dɛn wik wik Ju dɛn de du? Dɛn go ebul fɔ du dis fɔ dɛnsɛf? Dɛn go ebul fɔ mek sakrifays dɛn? Dɛn go dɔn insay wan de? Dɛn go ebul fɔ yuz ston dɛn we dɔn bɔn we de ɔnda dɔti?”
3 Na de Tobaya di Amɔnayt we bin tinap nia am tɔk se: “Ilɛksɛf fɔks klem pan di ston wɔl we dɛn de bil, i go brok am.”
4 E wi Gɔd, lisin to wi bikɔs dɛn nɔ tek wi mek natin. Mek lɛ dɛn shem kam pan dɛn, ɛn mek lɛ dɛn tan lɛk tin we dɛn tek bay fos ɛn mek lɛ dɛn kapchɔ dɛn ɛn kɛr dɛn go na ɔda land.
5 Ɛn nɔ ayd di bad tin we dɛn du ɔ mek dɛn sin kɔmɔt bifo yu, bikɔs dɛn dɔn tɔk bad bɔt di wan dɛn we de bil.
6 So wi kɔntinyu fɔ bil di wɔl, ɛn di wan ol wɔl bin jɔyn togɛda ɛn wi bil am te di ayt rich midul, ɛn di pipul dɛn kɔntinyu fɔ wok wit zil.
7 We Sanbalat, Tobaya, di Arebian dɛn, di Amɔnayt dɛn, ɛn di Ashdɔdayt dɛn yɛri se wi de go bifo fɔ bil Jerusɛlɛm in wɔl dɛn ɛn lɔk lɔk di spes dɛn, dɛn vɛks bad bad wan.
8 Dɛn mek plan togɛda fɔ kam fɛt Jerusɛlɛm ɛn fɔ ib kɔnfyushɔn de.
9 Bɔt wi pre to wi Gɔd ɛn put gaydman fɔ protɛkt wi frɔm dɛn de ɛn nɛt.
10 Bɔt pipul dɛn na Juda bin de se: “Di wan dɛn we de du di wok dɔn taya, ɛn di dɔti ɛn ston ston dɛn bɔku, wi nɔ go ɛva ebul fɔ bil di wɔl.”
11 Wi ɛnimi dɛn kɔntinyu fɔ tɔk se: “Bifo dɛn no ɔ si wetin de apin, wi go kam rayt usay dɛn de ɛn kil dɛn ɛn stɔp di wok.”
12 Ɛnitɛm we di Ju dɛn we de nia dɛn kam, dɛn de tɛl wi igen ɛn igen* se: “Dɛn go atak wi frɔm ɔlsay.”
13 So a put man dɛn biɛn di wɔl na di say dɛn we opin ɛn di say dɛn we lo. A put dɛn bay famili wit dɛn sɔd dɛn, lɔng spia dɛn, ɛn bo dɛn.
14 We a si se dɛn de fred, wantɛm wantɛm a grap ɛn tɛl di dɛpiti rula dɛn, di ɔda impɔtant pipul dɛn, ɛn ɔl di pipul dɛn se: “Una nɔ fred dɛn. Una mɛmba Jiova, we gret ɛn we pipul dɛn fɔ fred ɛn rɛspɛkt; ɛn una fɛt fɔ una brɔda dɛn, una bɔypikin dɛn ɛn galpikin dɛn, una wɛf dɛn ɛn os dɛn.”
15 We wi ɛnimi dɛn yɛri se wi dɔn no wetin dɛn want fɔ du ɛn di tru Gɔd dɔn mek dɛn plan nɔ wok, wi ɔl go bak ɛn kɔntinyu fɔ bil di wɔl.
16 Frɔm da de de, na sɔm pan di man dɛn bin de du di wok ɛn di ɔda wan dɛn ol di lɔng spia dɛn, di shild dɛn, di bo dɛn, ɛn di tin we sojaman dɛn de wɛr pantap dɛn klos fɔ protɛkt dɛn bɔdi. Di prins dɛn bin tinap biɛn di Ju dɛn
17 we bin de bil di wɔl. Di wan dɛn we bin de tot di lod dɛn bin de wok wit wan an ɛn ol wɛpɔn wit di ɔda an.
18 Di wan dɛn we bin de bil bin gɛt sɔd pan dɛn bɛlt as dɛn de bil, ɛn di wan we fɔ blo di ɔn bin tinap nia mi.
19 Dɔn a tɛl di dɛpiti rula dɛn, di ɔda impɔtant pipul dɛn, ɛn ɔl di pipul dɛn se: “Di wok big ɛn i bɔku, ɛn wi skata ɔlsay ɛn de fa frɔm wisɛf.
20 So we una yɛri di ɔn in sawnd, una kam ɛn gɛda usay wi de. Wi Gɔd go fɛt fɔ wi.”
21 So wi kɔntinyu fɔ wok ɛn di ɔda wan dɛn ol di lɔng spia dɛn, frɔm doklin te di sta dɛn kɔmɔt.
22 Dɔn a tɛl di pipul dɛn se: “Lɛ di man dɛn ɛn dɛn savant dɛn slip insay Jerusɛlɛm, ɛn dɛn go gayd wi na nɛt ɛn wok de tɛm.”
23 So mi, mi brɔda dɛn, mi savant dɛn, ɛn mi gaydman dɛn we bin de fala mi nɔ ɛva pul wi klos ɛn wi ɔl ol wi wɛpɔn na wi raytan.
Futnot Dɛn
^ Insay Ibru, “tɛn tɛm.”
