Neɔm 1:1-15
1 Wan impɔtant mɛsej fɔ Ninivɛ:
Di buk we de tɔk bɔt di vishɔn we Neɔm* di Ɛlkoshayt bin si:
2 Jiova na Gɔd we want lɛ dɛn wɔship in wangren, ɛn i de tɔn-am-gi;Jiova de tɔn-am-gi, ɛn i rɛdi fɔ sho in wamat.
Jiova de tɔn-am-gi in ɛnimi dɛn,Ɛn in at go kɔntinyu fɔ wam pan in ɛnimi dɛn.
3 Jiova nɔ de vɛks kwik ɛn i gɛt bɔku pawa,Bɔt natin nɔ go mek Jiova nɔ gi di wan dɛn we de sin di pɔnishmɛnt we dɛn fɔ gɛt.
We i de waka, big big briz we de pwɛl tin dɛn de blo,Ɛn di dɔst we in fut de es na in na di klawd dɛn.
4 I de tɔk pan di si, ɛn i de mek i dray;Ɛn i de mek ɔl di riva dɛn dray.
Di plant dɛn na Beshan ɛn Kamɛl wida,Ɛn di flawa dɛn na Libanɔn wida.
5 Mawntin dɛn de trimbul bikɔs ɔf am,Ɛn di il dɛn de mɛlt.
Di wɔl go shek bikɔs ɔf in fes,Di land ɛn ɔl di wan dɛn we de de go shek.
6 Udat ebul tinap bifo am we i vɛks?
We i vɛks bad bad wan, udat go ebul bia?
We in at wam i de blez lɛk faya,Ɛn di rɔk dɛn go skata bikɔs ɔf am.
7 Jiova gud, i tan lɛk ples fɔ ayd di de we trɔbul kam.
I de kia fɔ* di wan dɛn we de go to am fɔ lɛ i protɛkt dɛn.
8 I go yuz flɔd fɔ pwɛl in* ples kpatakpata,Ɛn daknɛs go rɔnafta in ɛnimi dɛn.
9 Wetin yu go plan agens Jiova?
I de pwɛl kpatakpata.
Nid nɔ de fɔ mek i dɔnawe wit sɔntin tu tɛm.
10 Pan ɔl we dɛn tan lɛk chukchuk we tangulƐn lɛk di wan dɛn we dɔn drink bia* te dɛn chak,Faya go bɔn dɛn lɛk dray gras.
11 Pɔsin we de de* go plan bad tin agens Jiova,I go de gi advays we nɔ mek wan sɛns.
12 Na dis Jiova se:
“Pan ɔl we dɛn rili gɛt trɛnk ɛn dɛn bɔku,A go dɔnawe wit dɛn ɛn dɛn nɔ go de igen.*
A dɔn mek una* sɔfa, bɔt a nɔ go mek una sɔfa igen.
13 Ɛn a go brok di stik we i put pan una fɔ tot lod,Ɛn di tin we dɛn tay una wit, a go kɔt am to tu.
14 Na dis Jiova dɔn se bɔt yu,*‘Yu nem go lɔs.
A go dɔnawe wit di imej dɛn we dɛn kav ɛn di mɛtal imej dɛn we de na yu gɔd dɛn os.*
A go mek grev fɔ yu bikɔs yu nɔ gɛt wan yus.’
15 Luk! Pɔsin de na di mawntin dɛn we de kam wit gud nyuz,Ɛn we de tɔk bɔt pis.
Una we de na Juda, una sɛlibret una fɛstival dɛn, ɛn una du di tin dɛn we una dɔn prɔmis,Bikɔs di wan we nɔ gɛt wan yus nɔ go kam to una igen.
Dɛn go dɔnawe wit am kpatakpata.”
Futnot Dɛn
^ I min “Pɔsin We De Kɔrej.”
^ Insay Ibru, “I no.”
^ Dat na, Ninivɛ.
^ Ɔ “bia we dɛn yuz wit fɔ mek.”
^ Dat na, Ninivɛ.
^ Ɔ i kin bi, “ɛn i go pas midul dɛn.”
^ Dat na, Juda.
^ Dat na, Asiria.
^ Ɔ “tɛmpul.”
