Prɔvabs 1:1-33
1 Dis na di parebul dɛn we Sɔlɔmɔn, we na Izrɛl dɛn kiŋ ɛn we na Devid in bɔypikin bin pul:
2 Fɔ lan* sɛns ɛn kɔrɛkshɔn;Fɔ ɔndastand sɛns tɔk dɛn;
3 Fɔ gɛt kɔrɛkshɔn we de mek pɔsin tink gud gud wan fɔ ɔndastand,Fɔ du wetin rayt, fɔ ebul disayd fɔ du wetin kɔrɛkt, ɛn fɔ du tin tret;*
4 Fɔ gi sɛns to di wan we nɔ gɛt ɛkspiriɛns;Fɔ mek yɔŋman no tin dɛn ɛn ebul fɔ tink gud gud wan.
5 Pɔsin we gɛt sɛns de lisin ɛn lan mɔ;
Pɔsin we de ɔndastand de gri fɔ lɛ dɛn gi am gud advays
6 So dat i go ɔndastand parebul ɛn pɔzul dɛn,
Di wɔd dɛn we pɔsin we gɛt sɛns de tɔk, ɛn ridul dɛn.
7 Fɔ fred Jiova na di fɔs tin we pɔsin fɔ du fɔ no sɔntin.
Na fulman dɛn nɔmɔ nɔ lɛk sɛns ɛn kɔrɛkshɔn.
8 Mi pikin, lisin to di kɔrɛkshɔn we yu papa de gi yu,
Ɛn nɔ tɔn yu bak pan wetin yu mama de tɛl yu.*
9 Dɛn tan lɛk fayn rawnd tin we dɛn dɛkɔret na yu ed
Ɛn fayn chen fɔ yu nɛk.
10 Mi pikin, if sina dɛn tray fɔ tɛmt yu, nɔ gri fɔ du am.
11 If dɛn se: “Kam lɛ wi go.
Lɛ wi go sɛt ambush fɔ kil.
Wi go ayd ɛn wet fɔ inosɛnt pipul dɛn fɔ no gud rizin.
12 Wi go swɛla dɛn layv layv wan lɛk di Grev,*
Wan ol wan, lɛk di wan dɛn we de go dɔŋ na di ol.
13 Lɛ wi tek ɔl di valyu tin dɛn we dɛn gɛt;
Wi go ful-ɔp wi os dɛn wit di tin dɛn we wi tif.
14 Na fɔ jɔyn wi,
Ɛn wi ɔl go sheb wetin wi tif ikwal wan.”*
15 Mi pikin, nɔ fala dɛn;
Nɔ mas usay dɛn de.
16 Dɛn fut dɛn de rɔn fɔ go du bad;
Dɛn de ɔri fɔ kil.
17 Na fɔ natin pɔsin de prɛd nɛt usay bɔd de si am.
18 Na dat mek dɛn de le ambush fɔ kil;Dɛn de ayd fɔ tek ɔda pipul dɛn layf.*
19 Na so di wan dɛn we want fɔ jɛntri di rɔng we de biev,Ɛn dis go tek di wan dɛn we gɛt am dɛn layf.*
20 Tru tru sɛns de kray lawd wan na strit.
I de kɔntinyu fɔ es in vɔys na pɔblik ples* dɛn.
21 I de tɔk lawd wan na di kɔna na di strit usay bɔku pipul dɛn de pas,
Ɛn i de nia di siti get dɛn de tɔk se:
22 “Aw lɔng una we nɔ gɛt ɛkspiriɛns go et ɛkspiriɛns?
Aw lɔng una we de provok go lɛk fɔ de provok?
Aw lɔng una dɛn fulish wan dɛn go et fɔ no bɔt sɔntin?
23 Tek mi kɔrɛkshɔn.*
Dɔn a go put mi spirit pan yu;A go mek yu no mi wɔd dɛn.
24 A kɔl yu, bɔt yu nɔ gri fɔ lisin,A stret mi an, bɔt nɔbɔdi nɔ bin de pe atɛnshɔn.
25 Yu kɔntinyu fɔ tɔn yu bak pan ɔl mi advays dɛn,Ɛn yu nɔ bin de tek mi kɔrɛkshɔn.
26 Misɛf go laf we bad tin apin to yu.A go provok yu we di tin we yu bin de fred mit yu,
27 We di tin we yu bin de fred kam lɛk ɛvi ɛvi ren,Ɛn prɔblɛm kam pan yu lɛk big big briz,We pwɛlat ɛn trɔbul kam pan yu.
28 Da tɛm de dɛn go de kɔl mi, bɔt a nɔ go ansa;Dɛn go rili luk fɔ mi, bɔt dɛn nɔ go si mi,
29 Bikɔs dɛn nɔ lɛk fɔ no bɔt sɔntin,Ɛn dɛn dɔn disayd nɔ fɔ fred Jiova.
30 Dɛn nɔ gri fɔ lisin to mi advays;Dɛn nɔ sho wan rɛspɛkt fɔ ɔl mi kɔrɛkshɔn dɛn.
31 So dɛn go bia wit di bad tin dɛn we go mit dɛn bikɔs ɔf wetin dɛn du,Ɛn dɛn go sɔfa fɔ wetin dɛn du.
32 Di trangayes we di wan dɛn we nɔ gɛt ɛkspiriɛns de mek go kil dɛn,Ɛn di bisin we fulman dɛn nɔ bisin go dɔnawe wit dɛn.
33 Bɔt di wan we de lisin to mi go de sef wanƐn bad tin nɔ go mek i fred.”
Futnot Dɛn
^ Insay Ibru, “Fɔ no.”
^ Ɔ “fɔ du tin fia wan.”
^ Ɔ “pan yu mama in lɔ.”
^ Ɔ “Shiol.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Ɔ “sheb di sem bag (pɔs).”
^ Ɔ “sol.”
^ Ɔ “sol.”
^ Rid Baybul Wɔd dɛn Minin.
^ Ɔ “Tɔn bak we a kɔrɛkt yu.”
