Prɔvabs 12:1-28
12 Di wan we lɛk disiplin lɛk fɔ no sɔntin,Bɔt di wan we et kɔrɛkshɔn nɔ gɛt sɛns.
2 Jiova de gladi fɔ gud pɔsin,Bɔt i de kɔndɛm pɔsin we de plan wikɛd tin dɛn.
3 Wikɛdnɛs nɔ go protɛkt ɛnibɔdi,Bɔt di wan we de du wetin rayt go kɔntinyu fɔ tinap tranga wan.
4 Gud wɛf tan lɛk krawn to in man,Bɔt wɛf we de du shemful tin dɛn tan lɛk sik we de mek in man in bon dɛn rɔtin.
5 Di wan we de du wetin rayt de tink fia wan,Bɔt di advays we wikɛd pɔsin de gi na fɔ ful ɔda pɔsin.
6 Di tin dɛn we wikɛd pɔsin de tɔk tan lɛk bad bad ambush,*Bɔt di wan dɛn we de du wetin rayt na dɛn mɔt go sev dɛn.
7 We dɛn pul di wikɛd wan dɛn, dɛn nɔ go de igen,Bɔt di wan dɛn we de du wetin rayt, dɛn os go kɔntinyu fɔ de.
8 Dɛn go prez pɔsin fɔ di sɛns tin dɛn we de kɔmɔt na in mɔt,Bɔt dɛn go et pɔsin we kɔrɔpt.
9 I bɛtɛ fɔ bi pɔsin we dɛn nɔ de gi bɛtɛ rɛspɛkt ɛn fɔ gɛt savant,Pas fɔ mek pɔsin es insɛf ɔp ɛn nɔ gɛt tin fɔ it.*
10 Di wan we de du wetin rayt de kia fɔ di animal dɛn we i de mɛn,Bɔt di wikɛd wan in sɔri-at na wikɛdnɛs.
11 Di wan we de plant na in land go satisfay wit tin fɔ it,Bɔt di wan we de rɔnafta tin dɛn we nɔ gɛt valyu nɔ gɛt sɛns.
12 Wikɛd pɔsin de milɛ wetin ɔda bad pipul dɛn dɔn gɛt,Bɔt di wan we de du wetin rayt tan lɛk tik we gɛt dip rut we de bia gud frut.
13 Di bad tin we wikɛd pɔsin de tɔk tan lɛk trap fɔ am,Bɔt di wan we de du wetin rayt de ɛskep trɔbul.
14 Na di tin dɛn we pɔsin de tɔk de mek i satisfay wit gud tin dɛn,Ɛn di tin dɛn we i de du wit in an go bɛnifit am.
15 Di tin we fulman want fɔ du fayn na in yay,Bɔt di wan we gɛt sɛns de tek advays.
16 Fulman kwik fɔ sho se i vɛks,*Bɔt pɔsin we gɛt sɛns nɔ de vɛks we pɔsin du am bad.
17 Di wan we de tɔk di kɔrɛkt tin we apin go tɔk tru,*Bɔt ɛni witnɛs we de lay de tɔk tin we nɔ kɔrɛkt.
18 We pɔsin nɔ tink bifo i tɔk tan lɛk we dɛn de chuk pɔsin wit sɔd,Bɔt we pɔsin we gɛt sɛns de tɔk, i tan lɛk we dɛn de mɛn pɔsin.
19 Pɔsin we de tɔk tru go de sote go,Bɔt pɔsin we de lay go jɔs de fɔ shɔt tɛm nɔmɔ.
20 Na soso lay lay de na di wan dɛn we de plan bad dɛn at,Bɔt di wan dɛn we de tray fɔ mek* pis gɛt gladi-at.
21 No bad tin nɔ go apin to di wan dɛn we de du wetin rayt,Bɔt di wan dɛn we wikɛd go gɛt soso trɔbul.
22 Jiova rili et pɔsin we de lay,Bɔt di wan dɛn we de du tin fetful wan de mek i gladi.
23 Pɔsin we gɛt sɛns de ayd wetin i no,Bɔt fulman de tɔk di ful tin dɛn we de na in at.
24 Di wan dɛn we de wok tranga wan go rul,Bɔt di wan dɛn we aydul, dɛn go fos dɛn fɔ wok.
25 Wɔri de mek pɔsin in at pwɛl,Bɔt gud wɔd kin mek i fil fayn.
26 Di wan we de du wetin rayt de tek tɛm luk fɔ land fɔ in animal dɛn,Bɔt di we aw di wikɛd wan dɛn de biev de mek dɛn go di rɔng we.
27 Pɔsin we lezi nɔ de rɔnafta animal fɔ it am,Bɔt fɔ wok tranga wan na sɔntin we rili valyu fɔ mɔtalman.
28 Fɔ du wetin rayt tan lɛk rod we de gi layf,Ɛn di wan we de waka de nɔ go day.
Futnot Dɛn
^ Insay Ibru, “de wet fɔ kil pɔsin.”
^ Insay Ibru, “bred.”
^ Ɔ “Fulman de sho se i vɛks di sem de.”
^ Insay Ibru, “wetin rayt.”
^ Insay Ibru, “di wan dɛn we de advays fɔ.”
