Prɔvabs 13:1-25
13 Pikin we gɛt sɛns de lisin to in papa in disiplin,Bɔt di wan we nɔ de rɛspɛkt pɔsin nɔ de tek kɔrɛkshɔn.
2 Di tin we pɔsin de tɔk* go mek i it gud tin,Bɔt di tin we pɔsin we de kɔmɔt biɛn in kɔmpin rili lɛk na fɛt-fɛt.
3 Di wan we de tek tɛm wit wetin i de tɔk de protɛkt in layf,*Bɔt di wan we de opin in mɔt big wan go gɛt trɔbul.
4 Lezi pɔsin kin want sɔntin, bɔt i nɔ gɛt natin;Bɔt di wan* we de wok tranga wan go rili satisfay.*
5 Di wan we de du wetin rayt et lay,Bɔt di tin dɛn we wikɛd pɔsin de du de briŋ shem ɛn disgres.
6 Fɔ du wetin rayt de protɛkt di wan we inosɛnt,Bɔt wikɛdnɛs de ambɔg sina.
7 Pɔsin de we de mek lɛk i jɛntri, bɔt i nɔ gɛt natin;Ɔda pɔsin de we de mek lɛk i po, bɔt i gɛt bɔku jɛntri.
8 Jɛntri na di pe fɔ pɔsin in layf,Bɔt di pɔsin we po nɔ de fred.
9 Di wan we de du wetin rayt in layt go shayn brayt wan,*Bɔt di wikɛd wan dɛn lamp go ɔt.
10 Pɔsin we de du sɔntin we i nɔ gɛt rayt fɔ du jɔs de briŋ kɔnfyushɔn,Bɔt di wan dɛn we de aks fɔ advays* gɛt sɛns.
11 Jɛntri we pɔsin gɛda kwik kwik wan* go ridyus,Bɔt jɛntri we pɔsin gɛda smɔl smɔl* go bɔku.
12 We pɔsin de ɛkspɛkt* sɔntin ɛn nɔ gɛt am, dat de mek in at pwɛl;Bɔt we pɔsin gɛt sɔntin we i rili want, i tan lɛk tik we de gi layf.
13 Ɛnibɔdi we tɔn in bak pan wetin dɛn tɛl am* go sɔfa fɔ dat,Bɔt di wan we obe di lɔ go bɛnifit.
14 Pɔsin we gɛt sɛns in tichin* de gi layf,I de mek pɔsin avɔyd di trap dɛn we de mek i day.
15 We pɔsin de tink gud gud wan fɔ ɔndastand, pipul dɛn de lɛk am;Bɔt di tin we pɔsin we de kɔmɔt biɛn ɔda pɔsin de du de kɔz bɔku prɔblɛm.
16 Pɔsin we gɛt sɛns de du tin akɔdin to wetin i no,Bɔt fulman de sho se i ful.
17 Wikɛd mɛsenja de gɛt trɔbul,Bɔt mɛsenja we de du wetin dɛn tɛl am de briŋ kolat.
18 Ɛnibɔdi we nɔ de tek kɔrɛkshɔn go po ɛn disgres,Bɔt di wan we de tek kɔrɛkshɔn go gɛt glori.
19 We pɔsin gɛt sɔntin we i rili want i de fil fayn,Bɔt pɔsin we ful lɛk bad.
20 Di wan we de waka wit pɔsin we gɛt sɛns go gɛt sɛns,Bɔt bad tin go apin to di pɔsin we de miks wit fulman.
21 Trɔbul de biɛn sina dɛn,Bɔt blɛsin de fɔ di wan dɛn we de du wetin rayt.
22 Gud pɔsin de lɛf prɔpati fɔ in granpikin dɛn,Bɔt sina in jɛntri go de fɔ di wan we de du wetin rayt.
23 Po pɔsin in fam we i dɔn wok pan de bia bɔku it,Bɔt sɔntɛm dɛn go tek am na in an bay fos.
24 Ɛnibɔdi we nɔ gri fɔ yuz ken* et in pikin,Bɔt di wan we lɛk in pikin de kɔrɛkt am gud gud wan.*
25 Di wan we de du wetin rayt de it ɛn bɛlful,Bɔt wikɛd pɔsin in bɛlɛ ɛmti.
Futnot Dɛn
^ Insay Ibru, “Di tin we de kɔmɔt na pɔsin in mɔt.”
^ Ɔ “sol.”
^ Ɔ “sol.”
^ Insay Ibru, “go gɛt bɔdi.”
^ Insay Ibru, “go gladi.”
^ Ɔ “di wan dɛn we de ɛng ed.”
^ Ɔ “Fɔ natin jɛntri.”
^ Insay Ibru, “gɛda wit in an.”
^ Ɔ “op fɔ.”
^ Ɔ “pan di wɔd.”
^ Ɔ “in lɔ.”
^ Ɔ “fɔ disiplin; fɔ pɔnish.”
^ Ɔ i kin bi, “am wantɛm wantɛm.”
