Prɔvabs 18:1-24
18 Ɛnibɔdi we de kip to insɛf de tink bɔt wetin in want nɔmɔ;I nɔ want fɔ* du tin wit sɛns.
2 Pɔsin we ful nɔ lɛk fɔ ɔndastand sɔntin;Bifo dat i de tɔk wetin de na in at.
3 We wikɛd pɔsin kam, mɔlɛs bak kin kam;Ɛn usay rɛspɛkt nɔ de, disgres de de.
4 Di wɔd dɛn we pɔsin de tɔk tan lɛk dip wata.Di say usay sɛns de kɔmɔt tan lɛk watasay we gɛt bɔku wata.
5 I nɔ fayn fɔ tek wikɛd pɔsin bɛtɛ pas ɔda pɔsinƆ fɔ mek dɛn nɔ trit pɔsin we de du wetin rayt fia wan.
6 Wetin fulman de tɔk de kam wit plaba,Ɛn in mɔt de mek dɛn bit am.
7 Fulman in mɔt de gi am prɔblɛm,Ɛn in wɔd dɛn tan lɛk trap fɔ in layf.*
8 Di tin dɛn we pɔsin we de pwɛl sɔmbɔdi in nem de tɔk tan lɛk cham cham we swit.*Pipul dɛn kin swɛla am go rayt dɔŋ insay dɛn bɛlɛ.
9 Ɛnibɔdi we lezi pan in wokNa brɔda to di wan we de kɔz prɔblɛm.
10 Jiova in nem na strɔng tawa.
Di wan we de du wetin rayt de rɔn go de, ɛn i de protɛkt am.*
11 Mɔniman in jɛntri na in strɔng siti;Na in maynd, i tan lɛk wɔl we de protɛkt am.
12 Pɔsin we de fil big bɔt insɛf nɔ go ɛnd fayn,Ɛn if pɔsin put insɛf dɔŋ, i go gɛt glori.
13 Ɛnibɔdi we tɔk bɔt sɔntin bifo i no wetin rili apin,Na fulman, ɛn i go disgres.
14 Di maynd we pɔsin gɛt de mek i bia we i sik,Bɔt udat go ebul bia we in at pwɛl?
15 Pɔsin we de ɔndastand de tray fɔ no,Ɛn pɔsin we gɛt sɛns de lisin so dat i go no.
16 Pɔsin in gift de opin we fɔ am;I de mek i ebul mit impɔtant pipul dɛn.
17 I kin tan lɛk se di fɔs pɔsin we kam wit in kes, na in gɛt rayt;Pas te ɔda pɔsin kam ɛn aks am kwɛstyɔn dɛn fɔ sho di ɔda pat pan di stori.
18 We pipul dɛn balɔt, dat kin ɛnd agyumɛnt,Ɛn i kin sɛtul prɔblɛm bitwin tu pawaful pipul dɛn.
19 I at fɔ tɔk to yu brɔda we vɛks pas fɔ kapchɔ strɔng siti;Plaba dɛn de we tan lɛk get na ples dɛn we dɛn rili protɛkt.
20 Di tin dɛn we pɔsin de tɔk de mek in bɛlɛ ful-ɔp;I go satisfay wit wetin de kɔmɔt na in mɔt.
21 Di tɔŋ gɛt di pawa fɔ kil ɛn fɔ gi layf;Di wan dɛn we lɛk fɔ yuz am go gɛt di pe bay aw dɛn yuz am.
22 Di wan we gɛt gud wɛf dɔn gɛt gud tin,Ɛn Jiova go gladi fɔ am.
23 Poman de beg we i de tɔk,Bɔt jɛntriman de tɔk ash wan.
24 Padi dɛn de we rɛdi fɔ du bad to dɛn kɔmpin,Bɔt padi dɛn de we lɛk dɛnsɛf pas aw brɔda dɛn lɛk dɛnsɛf.
Futnot Dɛn
^ Ɔ “I de sho se i et fɔ.”
^ Ɔ “sol.”
^ Ɔ “lɛk tin dɛn we dɛn kin swɛla kwik kwik wan.”
^ Insay Ibru, “i go de ay ɔp,” de sef, dat na, nɔbɔdi nɔ go rich usay i de.
