Rɛvɛleshɔn 3:1-22
3 “Rayt to di enjɛl na di kɔngrigeshɔn na Sadis se: Dis na di tin dɛn we di wan we gɛt Gɔd in sɛvin spirit dɛn ɛn di sɛvin sta dɛn se: ‘A no di tin dɛn we yu de du, i tan lɛk se yu de alayv, bɔt yu dɔn day.
2 Go de wach, ɛn mek di tin dɛn we dɔn lɛf we dɔn ɔlmost day, strɔng, bikɔs a dɔn si se yu nɔ du ɔltin we mi Gɔd want lɛ yu du.
3 So kɔntinyu fɔ mɛmba wetin dɛn gi yu, wetin yu dɔn yɛri, ɛn go de du am, ɛn ripɛnt. Fɔ tru, if yu nɔ wek, a go kam lɛk tifman, ɛn yu nɔ go no atɔl di awa we a go kam.
4 “‘Bɔt yu gɛt tu-tri pipul* dɛn na Sadis we nɔ dɔti dɛn klos, ɛn dɛn go wɛr wayt klos ɛn waka wit mi, bikɔs dɛn fit.
5 Di wan we win go wɛr wayt klos, ɛn a nɔ go ɛva wep* in nem na di buk we de sho se pɔsin go gɛt layf, bɔt a go se a no in nem bifo mi Papa ɛn bifo in enjɛl dɛn.
6 Lɛ di wan we gɛt yes yɛri wetin di spirit de tɔk to di kɔngrigeshɔn dɛn.’
7 “Rayt to di enjɛl na di kɔngrigeshɔn na Filadɛlfia se: Dis na di tin dɛn we di wan we oli, we na di tru tru wan, we gɛt Devid in ki, we de opin so dat nɔbɔdi nɔ go lɔk ɛn we de lɔk so dat nɔbɔdi nɔ go opin, se:
8 ‘A no di tin dɛn we yu de du—luk! A dɔn opin wan domɔt bifo yu, we nɔbɔdi nɔ go ebul lɔk. Ɛn a no se yu gɛt smɔl pawa, ɛn yu obe mi wɔd ɛn yu nɔ kɔmɔt biɛn mi nem.
9 Luk! A go mek di wan dɛn we de na Setan in sinagɔg* we se dɛn na Ju bɔt we nɔto Ju, we de lay—a go mek dɛn kam butu bifo yu fut, ɛn a go mek dɛn no se a dɔn lɛk yu.
10 Bikɔs yu de du wetin yu yɛri bɔt di bia we a bia,* a go protɛkt yu di tɛm fɔ di tɛst, we go apin na di wan ol wɔl, fɔ tɛst di wan dɛn we de na di wɔl.
11 A de kam kwik kwik wan. Kɔntinyu fɔ ol wetin yu gɛt wit tu an, so dat nɔbɔdi nɔ go tek yu krawn.
12 “‘Di wan we win—a go mek am pila insay mi Gɔd in tɛmpul, ɛn i nɔ go kɔmɔt insay de igen, ɛn a go rayt mi Gɔd in nem pan am, mi Gɔd in siti in nem, dat na, di Nyu Jerusɛlɛm we de kɔmɔt na ɛvin kam dɔŋ frɔm mi Gɔd, ɛn mi yon nyu nem.
13 Lɛ di wan we gɛt yes yɛri wetin di spirit de tɔk to di kɔngrigeshɔn dɛn.’
14 “Rayt to di enjɛl na di kɔngrigeshɔn na Laodisia se: Dis na di tin dɛn we di Emɛn, di tru tru witnɛs we fetful, di fɔs pɔsin we Gɔd mek bifo i mek ɛni ɔda tin, se:
15 ‘A no di tin dɛn we yu de du, yu nɔ kol ɛn yu nɔ wam. A wish yu bin kol ɔ yu bin wam.
16 So bikɔs yu nɔ wam ɛn yu nɔ kol, a go vɔmit yu.
17 Bikɔs yu se, “A jɛntri ɛn a dɔn gɛt jɛntri ɛn a nɔ nid ɛnitin igen,” bɔt yu nɔ no se yu nɔ gɛt gladi-at, yu sɔri, yu po, yu blayn, ɛn yu nekɛd,
18 a de advays yu fɔ bay to mi gold we faya dɔn klin so dat yu go jɛntri, ɛn wayt klos dɛn so dat yu go wɛr dɛn mek ɔda pipul dɛn nɔ si yu nekɛdnɛs we go mek yu shem, ɛn bay mɛrɛsin fɔ rɔb na yu yay so dat yu go si.
19 “‘A de tɛl ɔl di wan dɛn we a rili lɛk wetin bad ɛn kɔrɛkt dɛn. So yu fɔ gɛt zil ɛn ripɛnt.
20 Luk! A tinap na di domɔt de nak. If ɛnibɔdi yɛri mi vɔys ɛn opin di domɔt, a go kam insay in os ɛn it di ivintɛm it wit am ɛn i go it wit mi.
21 A go alaw di wan we win fɔ sidɔm wit mi na mi tron, jɔs lɛk aw a win ɛn sidɔm wit mi Papa na in tron.
22 Lɛ di wan we gɛt yes yɛri wetin di spirit de tɔk to di kɔngrigeshɔn dɛn.’”
Futnot Dɛn
^ Insay Grik, “tu-tri nem.”
^ Ɔ “ires.”
^ Rid Baybul Wɔd dɛn Minin.
^ Ɔ i kin bi, “dɔn falamakata di we aw a bia.”
