Sɔlɔmɔn in Siŋ 5:1-16
5 “E mi sista, mi yawo,A dɔn go insay mi gadin.
A dɔn pik mi ma* ɛn mi spays.
A dɔn it mi ɔnikom ɛn mi ɔni;A dɔn drink mi wayn ɛn mi milk.”
“Padi dɛn, una it!
Una drink ɛn lɛ di tin dɛn we una de du fɔ sho se una lɛk unasɛf
Mek una chak!”
2 “A de slip bɔt mi at nɔ de slip.
A de yɛri di wan we a lɛk de nak ɛn tɔk se:
‘E mi sista, mi lɔv, opin fɔ mi,Mi dɔv, we nɔ gɛt wan bɔt!
Bikɔs di dyu dɔn sok mi ed,Di dyu we de fɔdɔm na nɛt dɔn sok mi ia.’”
3 “‘A dɔn pul mi lɔng klos.
A fɔ wɛr am bak?
A dɔn was mi fut.
A fɔ dɔti am bak?’
4 Di wan we a lɛk pul in an kɔmɔt na di ol we de na di domɔt,Ɛn a bin want fɔ si am.
5 A grap fɔ opin fɔ di wan we a lɛk;Mi an dɛn bin de drip wit ma,*Mi finga dɛn bin de drip wit maPan di lɔk in andul dɛn.
6 A opin fɔ di wan we a lɛk,Bɔt di wan we a lɛk bin dɔn tɔn bak, i dɔn go.
Mi at pwɛl we i go.*
A luk fɔ am, bɔt a nɔ si am.
A kɔl am, bɔt i nɔ ansa mi.
7 Di wachman dɛn we bin de go rawnd di siti si mi.
Dɛn wap mi, dɛn wund mi.
Di wachman dɛn na di wɔl dɛn tek mi vel.
8 E di uman dɛn na Jerusɛlɛm, una swɛ to mi se:
If una si di wan we a lɛk,Una tɛl am se lɔv sik de pan mi.”
9 “E uman we fayn pas ɔl di ɔda uman dɛn,Aw di wan we yu lɛk bɛtɛ pas ɔda pipul dɛn yon?
Aw di wan we yu lɛk bɛtɛ pas ɔda pipul dɛn yonWe mek yu de tɛl wi fɔ swɛ dis kayn swɛ?”
10 “Di wan we a lɛk fayn ɛn frɛsh;Yu kin notis am midul tɛn tawzin man dɛn.
11 In ed na gold, di gold we fayn pas ɔl.
In ia tan lɛk pam tik lif we briz de blo,*Ɛn i blak lɛk revin bɔd.
12 In yay dɛn tan lɛk dɔv dɛn we de nia watasay,Dɛn de was insay milk,Dɛn sidɔm nia pul we ful-ɔp.
13 In jɔ dɛn tan lɛk ip usay dɛn plant spays dɛn,Lɛk ay ples we plant dɛn we gɛt sɛnt de.
In lip dɛn na lili* flawa, dɛn de drip wit ma.*
14 In an dɛn na gold we rawnd we krisolayt de pan.
In bɛlɛ tan lɛk ayvri we de shayn we dɛn kɔva wit safaya.
15 In lɛg dɛn na mabul pila dɛn we dɛn bes na gold we fayn pas ɔl.
I fayn lɛk Libanɔn, ɛn tɔl lɛk di sida tik dɛn.
16 In lip dɛn swit lɛk ɔni,Ɔltin bɔt am de mek a lɛk am.
E di uman dɛn na Jerusɛlɛm,
Na in na di wan we a lɛk, na in na mi lɔv.”
Futnot
^ Ma na tin we gɛt fayn sɛnt.
^ Ma na tin we gɛt fayn sɛnt.
^ Ɔ i kin bi, “We i tɔk, mi sol lɛf mi.”
^ Ɔ i kin bi, “lɛk tamaro dɛn we bɔnch.”
^ Dis na di flawa in nem.
^ Ma na tin we gɛt fayn sɛnt.
