Taytɔs 2:1-15
2 Bɔt yu kɔntinyu fɔ tɔk tin dɛn we gri wit di tichin we gud.*
2 Lɛ di man dɛn we dɔn ol nɔ de du tin pasmak wan, lɛ dɛn siriɔs, lɛ dɛn du tin wit sɛns, lɛ dɛn gɛt strɔng fet, lɛ dɛn rili gɛt lɔv, ɛn lɛ dɛn de rili bia.
3 Semweso, lɛ di uman dɛn we dɔn ol de biev di we we de sho se dɛn de fred Gɔd, lɛ dɛn nɔ de pwɛl pɔsin in nem, lɛ dɛn nɔ bi slev to bɔku wayn, lɛ dɛn de tich wetin gud,
4 so dat dɛn go advays* di yɔŋuman dɛn fɔ lɛk dɛn man dɛn, fɔ lɛk dɛn pikin dɛn,
5 fɔ de du tin wit sɛns, fɔ liv klin layf, fɔ de wok na os,* fɔ de du gud, fɔ de put dɛnsɛf ɔnda dɛn yon man dɛn, so dat pipul dɛn nɔ go tɔk bad bɔt Gɔd in wɔd.
6 Semweso, kɔntinyu fɔ tɛl di yɔŋman dɛn fɔ de du tin wit sɛns,
7 pan ɔltin, sho se yu na ɛgzampul bay we yu de du fayn tin dɛn. Tich wetin tru ɛn rili siriɔs we yu de du am,
8 go de yuz wɔd dɛn we fayn we pɔsin nɔ go fɛn fɔlt wit, so dat di wan dɛn we de agens wi go shem ɛn dɛn nɔ go gɛt natin bad fɔ tɔk bɔt wi.
9 We i kam pan ɛnitin, lɛ slev dɛn put dɛnsɛf ɔnda di wan dɛn we gɛt dɛn, lɛ dɛn tray fɔ de pliz dɛn, lɛ dɛn nɔ de agyu wit dɛn,
10 lɛ dɛn nɔ tif dɛn, bɔt lɛ dɛn de sho se di wan we gɛt dɛn kin rili abop pan dɛn, so dat dɛn go mek Gɔd, we na wi Seviɔ, in tichin fayn mɔ ɛn mɔ ɔlkayn we.
11 Gɔd dɔn sho in spɛshal gudnɛs* we de mek ɔlkayn pipul dɛn sev.
12 I de tren wi fɔ avɔyd tin dɛn we Gɔd nɔ lɛk ɛn di tin dɛn we pipul dɛn na di wɔl de du, ɛn fɔ liv wi layf di we we de sho se wi de du tin wit sɛns, wi de du wetin rayt, ɛn wi fetful to Gɔd insay dis tɛm,*
13 as wi de wet fɔ di wɔndaful op ɛn di tɛm we wi gret Gɔd ɛn we wi Seviɔ, we na Jizɔs Krays, go sho dɛn glori.
14 Jizɔs gi insɛf fɔ fri wi ɛn pul wi pan ɔlkayn bad layf ɛn fɔ klin pipul dɛn fɔ insɛf we go bi in spɛshal prɔpati ɛn we gɛt zil fɔ du fayn wok dɛn.
15 Kɔntinyu fɔ tɔk dɛn tin ya ɛn ɛnkɔrej ɛn kɔrɛkt di wan dɛn we nɔ de du wetin rayt bikɔs yu rili gɛt di rayt fɔ du dat. Nɔ mek ɛnibɔdi tɛkɛ yu.
Futnot Dɛn
^ Ɔ “we de bɛnifit wi.”
^ Ɔ “tren.”
^ Ɔ “tek kia ɔf dɛn os dɛn.”
^ Rid Baybul Wɔd dɛn Minin.
^ Rid Baybul Wɔd dɛn Minin.
