Zɛfanaya 1:1-18
1 Dis na di mɛsej we Jiova gi Zɛfanaya* we na Kushay in bɔypikin. Kushay na Gɛdalaya in bɔypikin, Gɛdalaya na Amaraya in bɔypikin, ɛn Amaraya na Ɛzikaya in bɔypikin. Zɛfanaya bin gɛt dis mɛsej di tɛm we Josaya, we na Emɔn in bɔypikin, na bin kiŋ na Juda:
2 Na dis Jiova se: “A go rili dɔnawe wit ɔltin we de na di wɔl.”
3 Na dis Jiova se: “A go dɔnawe wit mɔtalman ɛn animal.
A go dɔnawe wit di bɔd dɛn ɛn di fish dɛn,Di tin dɛn we de mek pɔsin sin* ɛn di wikɛd wan dɛn;Ɛn a go pul mɔtalman kɔmɔt na di wɔl.
4 A go pɔnish Juda,Ɛn a go pɔnish ɔlman we de na Jerusɛlɛm.A go klia ɔltin na dis ples we gɛt fɔ du wit Beal,Di fɔrin-gɔd prist dɛn nem ɛn di ɔda prist dɛn,
5 Di wan dɛn we de butu to di san, di mun, ɛn di sta dɛn ɔp dɛn ruf dɛn,Di wan dɛn we de butu bifo Jiova ɛn rili prɔmis se dɛn go de biɛn amDɔn dɛn de prɔmis Malkam bak se dɛn go de biɛn am;
6 Di wan dɛn we dɔn stɔp fɔ fala Jiova,Ɛn di wan dɛn we nɔ de luk fɔ Jiova ɔ aks am wetin fɔ du.”
7 Una nɔ tɔk bifo Jiova we na di Masta We De Rul Ɔlman, bikɔs Jiova in de dɔn kam nia.
Jiova gɛt wan sakrifays we i go mek, ɛn i dɔn mek di wan dɛn we i go invayt oli.
8 “Di de we mi, Jiova, de mek sakrifays, a go pɔnish di prins dɛn,We na di kiŋ in bɔypikin dɛn, ɛn ɔl di wan dɛn we de drɛs lɛk pipul dɛn na ɔda neshɔn dɛn.
9 Da de de, a go pɔnish ɔl di wan dɛn we de go ɔp di platfɔm,*Di wan dɛn we de mek fɛt-fɛt ɛn lay lay bɔku na dɛn masta in os.”
10 Jiova se: “Da de de,Dɛn go yɛri we pipul dɛn de kray lawd wan na di Fish Get,Dɛn go yɛri we pipul dɛn de kray lawd wan na di Nyu Pat na di siti,Ɛn dɛn go yɛri lawd nɔys frɔm di il dɛn.
11 Una we de na Maktɛsh,*Una kray lawd wan bikɔs dɛn dɔn dɔnawe wit ɔl di biznɛsman dɛn,Ɛn ɔl di wan dɛn we de yuz skel fɔ we silva.
12 Da tɛm de, a go yuz lamp dɛn fɔ tek tɛm wach na Jerusɛlɛm,A go pɔnish di wan dɛn we satisfay wit di we aw dɛn de liv dɛn layf,*We de tɔk na dɛn at se: ‘Jiova nɔ go du gud, ɛn i nɔ go du bad.’
13 Dɛn go lut dɛn valyu tin dɛn, ɛn dɛn go pwɛl dɛn os dɛn.
Dɛn go bil os dɛn, bɔt dɛn nɔ go de de;Ɛn dɛn go plant vayn gadin dɛn, bɔt dɛn nɔ go pul wayn de.
14 Jiova in gret de dɔn kam nia!
I dɔn nia ɛn i de rili kam kwik kwik wan!*
Di sawnd we Jiova in de go kam wit go fiaful.
Da de de, fɛtman go kray lawd wan.
15 Da de de, Gɔd go vɛks bad bad wan.Na de we pipul dɛn at go pwɛl ɛn dɛn go rili sɔfa,Na de we big big briz go blo ɛn pipul dɛn nɔ go de igen,Na de we di ples go dak bad bad wan,Na de we di klawd go rili dak,
16 Na de we dɛn go blo ɔn, ɛn dɛn go ala lawd wan fɔ wɔAgens di siti dɛn we gɛt tin dɛn fɔ protɛkt dɛnsɛf
Ɛn agens di ay tawa dɛn we de kɔna na di wɔl.
17 A go mek mɔtalman dɛn at pwɛl,Ɛn dɛn go waka lɛk blaynman dɛn,Bikɔs dɛn dɔn sin agens Jiova.
Dɛn blɔd nɔ go gɛt wan valyu lɛk dɔst,Ɛn dɛn bɔdi* nɔ go gɛt valyu lɛk animal tɔylɛt.
18 Da de de we Jiova go vɛks bad bad wan, dɛn silva ɛn dɛn gold nɔ go ebul fɔ sev dɛn;In zil we tan lɛk faya go bɔn di wan ol wɔl,Bikɔs i go kil ɔlman na di wɔl. I go rili fiaful.”
Futnot Dɛn
^ I min “Di Wan We Jiova Dɔn Ayd (Jiova Dɔn Protɛkt Am).”
^ I go bi di tin dɛn we dɛn de yuz ɔ du we gɛt fɔ du wit aydɔl wɔship.
^ I kin bi di ay ples usay di kiŋ in tron de.
^ I go bi se na wansay na Jerusɛlɛm we de nia di Fish Get.
^ Insay Ibru, “di wan dɛn we nɔ de muv lɛk wayn we dɔn sɛtul ɔnda.”
^ Ɔ “i de ɔri fɔ kam kwik kwik wan!”
^ Insay Ibru, “gɔt dɛn.”
